Read Tshiluba Tshibangidilu 46 Bible Online

Tshibangidilu 46 - Tshiluba bible

Tshibangidilu 46

¹Yakobe kubanga luendu ne bena diende bonsu, kabidi ne bintu bionsu. Bafika ku Bersheba, kuambulaye Mvidi Mukulu wa tatuende Izake milambu.

²Butuku abu Mvidi Mukulu kumumuenekela, umuleja malu. Kumubikilaye ne: — Yakobe, Yakobe! Yeye kuitaba ne: — Ke meme ewu.

³Mvidi Mukulu kumuambila ne: — Meme ndi Mvidi Mukulu wa tatuebe Izake. Kutshinyi bua kuya ku Ejipitu to. Nemvudije ndelanganyi yebe mu ditunga dia Ejipitu.

⁴Meme nenye nebe mu Ejipitu. Nempatule ndelanganyi yebe mu ditunga adi. Paudi ufua, Yozefe neakujike.

⁵Yakobe kumuka ku Bersheba. Bana bende kumuteka pamue ne bakaji babu ne bana mu matempu avuabu babatumine kudi mukalenga wa bena Ejipitu bua luendu luabu.

⁶Yakobe kuya mu Ejipitu[197] ne ndelanganyi yende yonsu. Uvua kabidi ne bintu bionsu bivuabu bapete mu ditunga dia Kenaane.

⁷Ke muvua Yakobe muye mu Ejipitu ne bintu biende bionsu, kabidi ne bana bende, ne bikulu bende balume ne bakaji.

⁸Bana ba Yakobe, bavuaye mufike nabu mu Ejipitu, ne bikulu bende, bavua nunku: Rubene, muanende muanabute,

⁹uvua mulele bana ba balume banayi: Anoke, Palu, Esrone ne Karmi.

¹⁰Shimeyone uvua mulele bana ba balume basambombu: Yemuyele, Yamine, Ohade, Yakine, Sohare ne Shawule, muana wa balume uvuaye mulele ne mukaji muena Kenaane.

¹¹Levi uvua mulele bana ba balume basatu: Ngershone, Kehate ne Merari.

¹²Yuda uvua mulele bana ba balume basatu: Shela, Perese ne Zera. Kadi bana bakuabu ba balume ba Yuda, Ere ne Onane, bakavua bafuile mu Kenaane. Perese uvua mulele bana ba balume babidi: Esrone ne Amule.

¹³Isakare uvua mulele bana ba balume banayi: Tola, Puwa, Yashube[198] ne Shimrone.

¹⁴Zebulone uvua mulele bana ba balume basatu: Serede, Elone ne Yaleyele.

¹⁵Aba ke bana bonsu ba balume bavua Leya mulele ne Yakobe mu Mezopotamiya. Uvua mulele kabidi muana wa bakaji, Diina. Bana bonsu ba Yakobe ne Leya, pamue ne bana bavuabu balele ne bikulu babu, bavua makumi asatu ne basatu.

¹⁶Ngade uvua mulele bana ba balume muanda mutekete: Sifiyone, Agi, Shuni, Esbone, Eri, Arodi ne Areli.

¹⁷Ashere uvua mulele bana ba balume banayi ne wa bakaji umue: Imna, Isheva, Isheyi, Beriya ne muanabu wa bakaji Sera. Beriya uvua mulele bana ba balume babidi: Ebere ne Malkiyele.

¹⁸Bana aba bonsu dikumi ne basambombu ke ndelanganyi ivua Yakobe mulele ne Zilpa, mukaji mupika uvua Labane mupeshe muanende wa bakaji Leya.

¹⁹Rakele, mukaji wa Yakobe, uvua mulele bana ba balume babidi: Yozefe ne Binyamine.

²⁰Pavua Yozefe mu Ejipitu, mukajende Asnate, muana wa Potifera, mutuangaji wa mu tshimenga tshia One, uvua mulele bana ba balume babidi: Menashe ne Efrayime.[199]

²¹Binyamine uvua mulele bana ba balume dikumi: Bela, Bekere, Ashebele, Ngera, Namane, Ehi, Roshe, Upime, Mupime ne Arde.

²²Bana aba bonsu dikumi ne banayi ke ndelanganyi ya Yakobe, ivuaye mulele ne Rakele.

²³Dane uvua mulele muana wa balume anu umue, diende Ushime.

²⁴Naftali uvua mulele bana ba balume banayi: Yasiyele, Nguni, Yesere ne Shileme.

²⁵Bana aba bonsu muanda mutekete ke ndelanganyi ivua Yakobe mulele ne Bila, mukaji mupika uvua Labane mupeshe muanende wa bakaji Rakele.

²⁶Ndelanganyi yonsu ya Yakobe, iwaye mufike nayi mu Ejipitu, ivua bantu makumi asambombu ne basambombu, katuyi tubale bakaji ba bana ba Yakobe.

²⁷Yozefe uvua mulele bana ba balume babidi mu Ejipitu. Nanku ndelanganyi ya Yakobe ivua misombe mu ditunga dia Ejipitu kukumbana bantu makumi muanda mutekete.[200]

²⁸Yakobe kutuma Yuda kumpala bua ambile Yozefe ne: tumonangane nebe mu Ngoshene.[201] Pafiki Yakobe ne bena diende mu Ngoshene,

²⁹Yozefe kuangata ditempu diende, kuya mu Ngoshene bua kumonangana ne tatuende. Bamonangana, Yozefe kupukila tatuende, kudila musangu mule, mumuele mu tshitupa.

³⁰Yakobe kuambila Yozefe ne: — Mpindiewu ngakumonu. Ngajadiki ne: utshidi ne muoyi. Nanku diba dianyi dia lufu diakumbanyi.

³¹Yozefe kuambila bana babu ne bantu bonsu bavua nabu tatuende ne: — Ndi nya kumanyisha mukalenga wa bena Ejipitu ne: tatu ne bena diku dietu bonsu bavua bashale mu Kenaane mbafike munemu.

³²Nemmumanyishe kabidi ne: mudimu wenu ngwa kumuna bimuna. Nudi bafike ne bimuna bienu ne bintu bienu bionsu.

³³Panubikila mukalenga wa bena Ejipitu bua kunukonka mudimu unudi bamanye,

³⁴numuambile ne: tuetu katshia bandela, mudimu wetu udi anu wa kumuna bimuna bu muvua bankambua betu benza. Nanku mukalenga wa bena Ejipitu neitabe bua nusombe mu Ngoshene. Yozefe uvua muambe nanku, bualu bena Ejipitu badi bapepeja bamunyi ba bimuna.