Read Tshiluba Tshibangidilu 48 Bible Online

Tshibangidilu 48 - Tshiluba bible

Tshibangidilu 48

¹Malu onsu aa mamane kujika, kumanyishabu Yozefe bua disama dia tatuende. Yozefe kuangata bana bende ba balume babidi: Efrayime ne Menashe, kuya nabu.

²Yakobe upeta lumu lua difika diabu, kudikankamikaye, kusomba pa bulalu.

³Kuambilaye Yozefe ne: — Mvidi Mukulu wa bukole buonsu uvua mummuenekele ku Kenaane mu musoku wa Luze, mungele lupemba.

⁴Uvua mundaye ne: “Neulele bana ba bungi. Ndelanganyi yebe neivulangane, yenza bisamba bivule. Ditunga edi nedishale dienu kashidi.[207]”

⁵Yakobe kuamba kabidi ne: — Mpindiewu, ndi ngangata Efrayime ne Menashe, bana bebe baudi mulele, meme tshiyi muanji kufika mu Ejipitu, bua bikale bana banyi meme, amu bu Rubene ne Shimeyone.[208]

⁶Kadi, bana bakuabu baudi mulele, balondangane ne babidi aba, nebikale bebe wewe. Nebapete bintu bia bumpianyi anu mu buloba bua Efrayime ne Menashe.

⁷Bualu pamvua ngumukila ku Mezopotamiya, mamuebe Rakele kufuila mu njila, muaba umvua mu ditunga dia Kenaane, tshiyi muanji kufika mu musoku wa Efrata. Meme kumujika muine amu ku mpenga kua njila (Efrata ke musoku udibu babikila mpindiewu ne: Betleyeme[209]).

⁸Diakamue Yakobe kumona bana ba balume babidi bavua nabu Yozefe, kumukonka ne: — Bana aba mbanganyi?

⁹Yozefe kumuambila ne: — Bana aba mbanyi, badi Mvidi Mukulu mumpeshe munu mu Ejipitu. Yakobe kuambila Yozefe ne: — Basemeja apa, mbele lupemba.

¹⁰Yakobe katshivua umona bimpe to, bualu ukavua muntu mukole. Yozefe kumusemejila bana pabuipi. Yakobe kubupukila,

¹¹wambila Yozefe ne: — Tshiena mumanye ne: nenkumone kabidi to. Kadi Mvidi Mukulu mmungambuluishe. Ngakumonyi wewe, kumona kabidi ne bana bebe.

¹²Yozefe kumbusha bana pambidi pa tatuende, kuinyikaye mutu panshi.[210]

¹³Yozefe kuimanyika bana: Efrayime ku tshianza tshia bakaji tshia Yakobe, Menashe ku tshia balume. Kubasemejaye tshiakabidi kudi Yakobe, kakuabu.

¹⁴Kadi, Yakobe kupindakaja bianza, kuteka tshianza tshia balume pa mutu pa Efrayime, muana wa mukala, tshia bakaji pa mutu pa Menashe muanabute.[211]

¹⁵Ke kuelaye Yozefe lupemba, wamba ne: Ndi ntendelela Mvidi Mukulu, uvua bankambua banyi, Abrahame ne Izake, bitabe, Ndi ntendelela Mvidi Mukulu, udi mundame too ne ku mpindiewu.

¹⁶Mutumibue wa Mvidi Mukulu, uvua mungepule ku malu mabi onsu, neele bana banyi aba lupemba. Dina dianyi ne dia bankambua banyi, Abrahame ne Izake, disanguke ku bukole bua bana ba balume aba! Bana aba bikale ne ndelanganyi ya bungi, buwuje ditunga edi!

¹⁷Yozefe umona tatuende muteke tshianza tshia balume pa mutu pa Efrayime, kavua ne disanka to. Kumushaye tshianza tshia tatuende pa mutu pa Efrayime, bua kutshiteka pa mutu pa Menashe muanabute.

¹⁸Yozefe kuambila tatuende ne: — Tatu, lekela kuenza nanku. Teka tshianza tshia balume amu pa mutu pa Menashe muanabute.

¹⁹Tatuende kubenga, wamba ne: — Muananyi, ndi mumanye tshindi ngenza. Ndelanganyi ya Menashe neyikale tshisamba tshinene. Kadi ndelanganyi ya muakunyende Efrayime neyipite bungi, yenza bisamba bivule.

²⁰Dituku adi Yakobe kuela bana abu lupemba, wamba ne: — Bua kujingila bantu diakalenga, bena Izrayele nebatele mena enu, bamba ne: “Mvidi Mukulu anusankishe bu muvuaye musankishe Efrayime ne Menashe![212]” Ke muvua Yakobe muteke Efrayime kumpala kua Menashe nanku.

²¹Pashishe Yakobe kulaya Yozefe, umuambila ne: — Nkadi mikolu ku tshiina. Kadi Mvidi Mukulu neanulame, anupingaje mu ditunga dia bankambua benu.

²²Kadi tshitupa tshia buloba bua Shekeme, bumvua munyenge bena Amore ku muela wanyi wa mvita ne ku buta buanyi bua miketa,[213] tshiena mbupesha bana benu to, ndi nkupeshabu anu wewe.