Read Tshiluba Tshibangidilu 49 Bible Online

Tshibangidilu 49 - Tshiluba bible

Tshibangidilu 49

¹Yakobe kubikila bana bende bonsu, ubambila ne: — Semenayi pabuipi, unumanyishe malu adi mua kunuenzekela matuku adi kumpala aa.

²Semenayi pabuipi! Nuteleje tshindi nnuambila nuenu, bana banyi meme Yakobe. Ntelejayi, meme Izrayele tatuenu.

³Wewe Rubene, udi muananyi, muanabute, udi mashi anyi a kumpala. Udi muana undi mulele, pantshivua ne dikanda dionsu. Lumu luebe ne bukole buebe, nebipite bia bana benu bonsu.

⁴Kadi wewe udi bu mukulu muindila, kulua kuditapa nsesu. Kuena muanabute kabidi to. Bualu kuvua munnemeke to. Uvua mubuelele mukajanyi mukuabu mu nzubu.[214]

⁵Shimeyone ne Levi, mbana balondangane. Bavua bumvuangane bua kujula tshimvundu.

⁶Tshiena musue kubuela mu bifufu bidibu bela. Tshiena musue kubuelakana nabu to. Bualu bavua bashipe bantu bua tshiji.[215] Bavua bakose bibelu bia ngombe milume bua kudisankisha patupu.

⁷Ndi mbenga tshiji tshiabu tshikole, ndi mpidia lonji luabu kaluyi luse! Ndi ntangalaja ndelanganyi yabu, munkatshi mua bena Izrayele. Ndi nyimuangalaja mu ditunga dijima.

⁸Yuda, bana benu nebakutumbishe, [216] Neufyekele bena lukuna bebe mu nshingu. Bana benu, nansha ba tatu mene, nebakukukuile.

⁹Yuda, muananyi, udi bu muana wa ntambue.[217] Udi ushipa nyama, upingana muaba uvuaye mulale. Ntambue udi utua tshiadi panshi, ulala. Kakuena udi mua kumujula ku bukole.

¹⁰Nsesu wa bukalenga neashale mu diku dia Yuda. Dikombu dia bumfumu nedishale kudi ndelanganyi yende, too ne pafika muena bukalenga,[218] udi bantu bonsu ne bua kutumikila.

¹¹Mionji ya maluvu a mvinyo neikale miaba yonsu, nansha muntu usuikaku nyama wa mpunde ki mbualu to.[219] Neasukule bilamba biende ne maluvu, nansha tshinkutu tshiende mu mashi a tumuma tua mvinyo.

¹²Maluvu a mvinyo neakunjije mesu a Yuda. Mabele neatokeshe menu ende.[220]

¹³Zebulone nease ku muelelu wa mayi manene, muaba udi majuwa a mayi imanyina. Ditunga diende nedikale dialabale toone ku Sidone.

¹⁴Isakare udi bu nyama wa bukole bua bungi, mulale tshisaka ku luseke, tshisaka ku lukuabu.

¹⁵Isakare mmumone ne: muaba undi ndala mmuimpe, ditunga dindi nsomba ndilenga. Udi wambula majitu pa makaya, wenza mudimu bu mupika.

¹⁶Dane neikale mfumu wa tshisamba tshiende,[221] netshikale bu bisamba bikuabu bia Izrayele.

¹⁷Dane udi bu nyoka udi mu njila, bu nyoka wa ntoke ku mpenga kua njila: nyoka udi usuma kabalu mu lutambiku lua tshibelu. Udi mubandapu udishinda, ubunguluka.

¹⁸Maweja-Nangila, ndi mutekemene lupandu kuudi.[222]

¹⁹Ngade, udi bivi baluisha,[223] udi utua nkanana, ubalondakaja.

²⁰Madimi a Ashere adi ne bia kunowa bivule,[224] biakudia bimpe bidibu mua kudia kudi mukalenga.

²¹Naftali udi nyama wa ntole, wendakana miaba yonsu, ulela bana bimpe batambe.[225]

²²Yozefe udi bu mutshi udi udiunda bimpe, utoloka ku mpokolu wa mayi. Matamba awu adi alepa, apita bimana bia nzubu.[226]

²³Baluishi badi bamukengesha bikole, bamuela miketa, bamutatshisha.

²⁴Kadi Yozefe udi ukuata buta bikole. Maboku ende ne bianza kabiena bipungila. Udi umukolesha ke Mvidi Mukulu wa Yakobe, muena bukole buonsu, Mulami[227] wa bena Izrayele, dibue didibu beyemina.

²⁵Mvidi Mukulu wa tatuebe udi ukuambuluisha. Mvidi Mukulu wa bukole buonsu udi ukuela lupemba. Neakupeteshe bintu bimpe padi mvula uloka. Akupeteshe mayi adi apatuka munda mua buloba. Ulele bana ba bungi, bimuna biebe bivulangane.

²⁶Tatuebe udi ukuela lupemba, lupite ne luvua baledi banyi bangele meme.[228] Neupete bintu bimpe, bidi pa mikuna ya kale. Lupemba lua kudi tatuende lupueke mu mutu mua Yozefe, bualu Yozefe udi mfumu wa bana babu.

²⁷Binyamine udi bu nyama wa lonji. Mu dinda udi umina nyama. Dilolu udi wabanya bidiye mupete!

²⁸Bana bonsu aba, ke badi benza bisama dikumi ne bibidi bia bena Izrayele. Tatuabu uvua muele muana yonsu lupemba ne miaku ayi. Yakobe kulayangana ne muana yonsu wende mushindu.

²⁹Yakobe kuambila bana bende ne: — Nkadi nkeba kulonda bankambua banyi. Nunjike anu mu lubuebue ludi mu budimi bua Efrone, muena Iti, mu nkita ya bankambua banyi.

³⁰Lubuebue alu ludi mu ditunga dia Kenaane, mu buloba bua Makpela, pabuipi ne Mambre. Ke muaba uvua Abrahame musumbe kudi Efrone, muena Iti, bua muaba wa kujika bafue awu wikale wende.[229]

³¹Ke muaba uvuabu bajike Abrahame ne mukajende Sara, bajike kabidi Izake[230] ne mukajende Rebeka. Meme kujikamu kabidi Leya.

³²Budimi ne lubuebue bidi muaba awu, mbatusumbishabi kudi bena Iti.

³³Amu Yakobe mumane kulayangana ne bana bende, kudiololaye pa bulalu, kufuaye,[231] kulonda bankambua bende.