Read Tshiluba Tshibangidilu 6 Bible Online

Tshibangidilu 6 - Tshiluba bible

Tshibangidilu 6

¹Pavua bantu batuadija kuvulangana pa buloba, kulelabu bana ba bakaji.

²Kadi, badi basombele mulu, kumonabu bana ba bakaji ba bantu babalengelela. Kusungulabu munkatshi muabu bakaji bavuabu basue kusela.

³Kadi Maweja-Nangila kuamba ne: “Bua buenzayi bua muntu pa buloba, ndi nkepesha bidimu biende, bishale anu lukama ne makumi abidi, bualu muntu udi anu wa mubidi. Tshiena musue bua Mueyelu wa muoyi undi mumupesha ushale kashidi munda muende.”

⁴Tshikondu atshi bantu bale ba kafiondu[27] bavua pa buloba. — Bavua bashale kabidi pa buloba pashishe —. Bavua bana ba badi basombele mulu bavuabu balele ne bana ba bakaji ba bantu bavuabu basela. Bantu ba kafiondu aba bavua bilobu bia kalanda musenga ku kale.

⁵Maweja-Nangila kumona ne buenzayi bua bantu budi buenda buvulangane pa buloba, meji adibu bela matuku onsu adi anu mabi.

⁶Nanku Maweja-Nangila kunyingalala bua muntu uvuaye mufuke, muteke pa buloba.

⁷Kubungamaye wamba ne: “Nembutule muntu undi mufuke pa buloba. Nembutule kabidi nyama yonsu minene ne mikese too ne nyunyi yonsu idi ibuka mulu, bualu ndi ne kanyinganyinga bua pandi mubifuke.”

⁸Kadi Nowa uvua muena diakalenga kudi Maweja-Nangila.[28]

⁹Ndelanganyi ya Nowa idi nunku: Nowa nkayende munkatshi mua bantu ba tshikondu atshi,[29] uvua muntu muakane, witaba Mvidi Mukulu, udisanga nende mu malu onsu.

¹⁰Nowa uvua ne bana ba balume basatu: Sheme, Kame ne Yefete.

¹¹Mvidi Mukulu uvua mumone buenzayi bua bantu pa buloba bujima.

¹²Miaba yonsu iwaye utangila uvua umona amu muvua bantu banyanguke ne buenzayi.

¹³Nanku kuambilaye Nowa ne: “Tshikondu tshia kubutula bionsu bidi ne muoyi pa buloba tshiakumbanyi! Bualu buenzayi budi pa buloba bujima, mbufume anu kudi bantu. Nanku ndi musue kubabutula pa buloba.

¹⁴Kadi wewe usonge buatu bua mutshi wa budimbu, ubukosolole tuzubu munda. Ubulabe budimbu munda ne panyima.

¹⁵Buatu abu buikale bule bua metre lukama makumi atanu, butshiama bua metre makumi atanu, butumbuke bua metre dikumi ne atanu.

¹⁶Buatu buikale ne musonga, kadi pankatshi pa musonga ne bimana pikale ntanta wa santimetre makumi atanu. Buatu abu buikale ne mushiku ku luseka. Buikale ne nzubu isatu milungakaja ya tshilalakulu: wa panshi, wa pankatshi ne wa kulu.

¹⁷Meme nenguwuje buloba ne mayi a tshipupu, bua kubutula bionsu bidi ne muoyi pa buloba. Tshintu tshionsu tshidi ne muoyi pa buloba netshifue.

¹⁸Kadi nentue nebe ndondu.[30] Mu buatu amu, ubuele ne mukajebe, bana bebe ba balume ne bakaji babu.

¹⁹Ubuejemu kabidi nyama ya mishindu ne mishindu, mulume umue ne mukaji umue bua ishale ne muoyi.

²⁰Nanku mulume ne mukaji ku nyunyi yonsu, ku bimuna bionsu, ku nyama yonsu minene ne mikese ibuele nebe mu buatu, bua ipande ku lufu.

²¹Usangishe biakudia bia mishindu yonsu, ubitekele mu buatu bua numone mua kudia wewe ne bena diebe, kabidi ne nyama.”

²²Nowa kuitaba, kuenza bionsu bivua Mvidi Mukulu mumuambile.[31]