Read Tshiluba Tshibangidilu 8 Bible Online

Tshibangidilu 8 - Tshiluba bible

Tshibangidilu 8

¹Mvidi Mukulu kuvuluka Nowa ne nyama yonsu minene ne mikese ivuaye nayi mu buatu. Mvidi Mukulu kutuma tshipepela pa buloba, mayi kutuadija kukepela.

²Miaba yonsu ivua mayi apatukila muinshi mua buloba ne mulu kudikangayi, mela kukama.

³Mayi avua anu enda akepela pa buloba too matuku lukama ne makumi atanu.

⁴Nanku mu matuku dikumi ne muanda mutekete a ngondu wa muanda mutekete, buatu kuimana pa mukuna wa Ararate.

⁵Mayi avua apueka anu kupueka. Dituku dia kumpala dia ngondu wa dikumi, nsongu ya mikuna kumueneka.

⁶Matuku makumi anayi mamane kupita, Nowa kunzulula dididishi dia buatu buvuaye muenze.

⁷Kutumaye nyunyi wa tshikololu, kunyungulukatshi too ne pamuenekela buloba bume.

⁸Kutumaye kabidi nyunyi wa nkudimba bua kujadika dipueka dia mayi pa buloba.

⁹Nyunyi wa nkudimba mumane kuya, kena mupeta muaba wa kuikila, bualu mayi atshivua pa buloba. Nanku nyunyi kupingana. Nowa kuolola tshianza kumukuata, kumubueja mu buatu.

¹⁰Kupita matuku muanda mutekete, Nowa kutuma nyunyi wa nkudimba tshiakabidi.

¹¹Ku dilolu, nyunyi kupingana ne katamba ka mutshi wa olive kabishi kasuma ku muinu. Nanku Nowa kujadika ne: mayi akepedi pa buloba.

¹²Kupita matuku muanda mutekete kabidi, Nowa kutuma nyunyi wa nkudimba musangu muisatu, nkudimba kuya kashidi.

¹³Dituku dia kumpala dia tshidimu tshipiatshipia tshivua Nowa mukumbaje bidimu nkama isambombu ne tshimue, mayi onsu kukama pa buloba. Nowa kutula musonga wa buatu, kuinangila panshi, kumona ne buloba buonsu budi bume.

¹⁴Dituku dia makumi abidi ne muanda mutekete dia ngondu muibidi, buloba kuuma kashidi.

¹⁵Ke Mvidi Mukulu kuambila Nowa ne:

¹⁶“Patuka mu buatu, ne mukajebe ne bana bebe ba balume ne bakaji babu.

¹⁷Upatuke kabidi ne nyama yonsu iuvua nayi, nyunyi, bimuna ne nyama minene ne mikese, bua ivulangane imuangalaka pa buloba bujima.”

¹⁸Nowa kupatuka mu buatu ne mukajende, ne bana bende ba balume ne bakaji babu.

¹⁹Pashishe nyama yonsu minene ne mikese, bilandadi ne nyunyi yonsu, kupatukabi mu buatu ku tshisumbu ku tshisumbu.

²⁰Nowa kuashila Maweja-Nangila tshilambuilu. Kuangataye nyama umue ne nyunyi umue wa ku tshisumbu tshionsu tshia nyama idi kayiyi ne mikiya, kuyilambula Maweja-Nangila pa tshilambuilu bu milambu ya kuosha.

²¹Mulambu kununkilawu Maweja-Nangila mupuya muimpe. Kununganaye wamba ne: “Nansha bantu bikale anu ne meji mabi biangatshile ku buana buabu, kadi tshiena ntshipa buloba kabidi bua buenzayi bua muntu. Tshiena mua kubutula bionsu bidi ne muoyi musangu muibidi bu mumvua muenze emu.

²²Matuku onsu atshidi bantu pa buloba, tshikondu tshia kukuna ne tshia kunowa, tshia mashika ne tshia luya, tshia mvula ne tshia mushipu, tshia munya ne tshia midima kabiena bijika kabidi to.”