Read Tshiluba Tshibangidilu 9 Bible Online

Tshibangidilu 9 - Tshiluba bible

Tshibangidilu 9

¹Mvidi Mukulu kuela Nowa ne bana bende lupemba wamba ne: “Tantayi, nuvu-langane buloba bujima.[36]

²Nyama yonsu ya pa buloba ne nyunyi idi ibuka mulu, ne minyinyi ya mu mayi neyinutshine bikole ikuatshika buowa. Bionsu abi mbintu bienu bindi munupe.

³Nanku, bu mumvua munupe bisekiseki bua nuenu kudia,[37] ke mundi munupe kabidi nyama yonsu ikale biakudia bienu.

⁴Kadi kanuena mua kudia munyinyi wa nyama muikale ne mashi. Bualu muoyi wa tshintu udi mu mash[38] atshi.

⁵Bu mudi muoyi wa tshintu muikale mu mashi, ndi nnukandika bua kanushipi muntu nenu, tshianana meme nennushipeshe panyi. Pashishe nyama kayena mua kushipa muntu to, tshianana meme nenyishipeshe kabidi.

⁶Udi upumuna mashi a muntu, nebapumune ende kudi muntu, bualu mbafuke muntu mufuanangane ne Mvidi Mukulu.[39]

⁷Nuenu tantayi, nuvulangane, numuangalake pa buloba bujima.[40]”

⁸Mvidi Mukulu kuambila Nowa ne bana bende ne:

⁹“Ndi ntua nenu ndondu,[41] kabidi ne ndelanganyi yenu.

¹⁰Ndi ntua kabidi ndondu ne bionsu binuvua bapatuke nabi mu buatu: nyunyi, bimuna ne nyama ya muitu, kabidi ne bivuavua kuenda ne muoyi pa buloba pashishe.

¹¹Ndondu undi ntua nenu biangatshile ku lelu udi nunku: tshiena nguwuja kabidi buloba ne mayi a tshipupu bua kubutula bionsu bidi ne muoyi, kunyangakaja bidi pa buloba.

¹²Tshimanyinu tshia ndondu wetu ewu nenu, kabidi ne bionsu bidi pa buloba tshidi nunku:

¹³Ndi nteka muanzankongolu mulu mu mavuba bua wikale tshimanyinu tshidi tshivuluija ndondu udi pankatshi panyi ne bantu, kabidi ne bionsu bidi ne muoyi pa buloba.

¹⁴Pafinda mvula kulu, pambamona muanza-nkongolu,

¹⁵nemvuluke ndondu awu. Mayi a tshipupu kakubutula kabidi bantu ne bidi ne muoyi pa buloba to.

¹⁶Nemmone muanza-nkongolu mvuluka ndondu undi mutue ne bionsu bidi ne muoyi pa buloba.

¹⁷Muanza-nkongolu udi tshimanyinu tshidi tshivuluija ndondu wa kashidi undi mutue ne bantu ne bionsu bidi ne muoyi pa buloba.”

¹⁸Bana ba balume ba Nowa bapatukila mu buatu bavua: Sheme, Kame ne Yefete. Kame udi tatuende wa Kenaane.

¹⁹Bantu bonsu ba pa buloba mbafume anu kudi bana aba basatu ba Nowa.

²⁰Nowa ke tshidime wa kumpala uvua mukuna mitshi ya maluvu.

²¹Nowa uvua munue maluvu mukuatshike. Kulalaye mu nzubu muende butaka.

²²Kame, tatuende wa Kenaane, kumona butaka bua tatuende Nowa, kupatuka bua kuambila bana babu babidi bavua pa mbelu.

²³Nanku Sheme ne Yefete kuangata tshilamba tshia Nowa, kutshibuikila pa makaya abu. Bonsu babidi kuya natshi tshianyima, kubuikila tatuabu uvua butaka. Bavua batangila luseke lukuabu bua kabamonyi butaka bua tatuabu.

²⁴Maluvu mamane kumutenduka, Nowa kumvua tshivua muanende wa mukala mumuenzele atshi.

²⁵Kumuelaye mulawu wamba ne: “Kenaane ikale muena diakabi! Ikale mupika wa bana babu.”

²⁶Kuambaye kabidi ne: “Bantu batumbishe Maweja-Nangila, Mvidi Mukulu wa Sheme! Kenaane ashale mupika wa Sheme!

²⁷Mvidi Mukulu asankishe Yefete,[42] ndelanganyi ya Yefete isombe mu nzubu ya ntenta ya bena Sheme; Kenaane ikale mupika wa Yefete!”

²⁸Mayi a tshipupu mamane kukama, Nowa kushala ne muoyi bidimu nkama isatu ne makumi atanu.

²⁹Bidimu bia Nowa bidi nkama tshitema ne makumi atanu. Pashishe kufuaye.