Read Tshiluba 2 Samuwele 1 Bible Online

2 Samuwele 1 - Tshiluba bible

2 Samuwele 1

¹Davide mumane kutshimuna bena Amaleke, kuyaye kusombela mu tshimenga tshia Siklaje. Diba adi, Shawule ukavua mumane kufua.[1] Davide kushala mu tshimenga atshi matuku abidi.

²Dituku disatu, nsongalume kufika, ufumina mu mitanda ya Shawule. Uvua ne bilamba bipandike, ne maloba mu mutu, bua kuleja madilu. Anu nsongalume ufika pabuipi ne Davide, kudielaye mpala panshi.

³Davide kumukonka ne: — Udi ufuma penyi? Kuandamunaye ne: — Ndi munyeme mu mitanda ya bena Izrayele.

⁴Davide kumuambila ne: — Ndondela bivua bienzeka. Nsongalume kumuambila ne: — Bena mvita ba bena Izrayele mbanyeme mvita. Mbashipe bena mvita ba bungi. Mbashipe too ne mukalenga Shawule ne muanende Yonatane.

⁵Davide kumukonka kabidi ne: — Muudi mumanye ne: Shawule ne Yonatane mbafue mmunyi?

⁶Nsongalume kumuambila ne: — Meme mvua mufike ku mukuna wa Ngilbowa[2] mu mpukapuka. Meme kumona Shawule mudishinde pa difuma diende. Bavua bamubambakaja bikole kudi baluishi bende, bavua ne matempu a mvita, ne kudi bavua babanda pa nyama ya tubalu.

⁷Shawule ukenzakana, kummonaye, kumbikila. Meme kuitaba ne: “Eyowa, mukalenga.”

⁸Kunkonkaye ne: “Wewe udi muena nganyi?” Meme kumuambila ne: ndi muena Amaleke.[3]

⁹Ke Shawule kungamba bua meme kumushipa. Bualu nansha yeye ne lungenyi luende lujima, uvua ukengakana bikole.

¹⁰Nanku meme kusemena pabuipi, kumushipa. Bualu mvua mumone ne: baluishi mbamane kumutshimuna, kakushala ne muoyi to. Pashishe meme kuangata tshifulu tshiende tshia bukalenga tshivua ku mutu, ne lukanu luvua ku diboku. Ndi mukutuadilebi muaba ewu.

¹¹Davide ne bantu bonsu bavua pabuipi nende, kudipandabu bilamba.

¹²Kudilabu muadi too ne ku dilolu, bajila biakudia. Ke mushindu uvuabu benza madilu a Shawule, a Yonatane, ne a bena Izrayele bonsu, bantu ba Maweja-Nangila, bavua bafue mu mvita dituku adi.

¹³Ke Davide kukonka nsongalume uvua mumuambile bualu abu ne: — Wewe udi muena nganyi? Nsongalume kuandamuna ne: — Ndi muana wa muena Amaleke, udi musombela mu ditunga edi.

¹⁴Davide kuela lubila ne: — Muudi kuyi mutshine bua kushipa mukalenga uvua Maweja-Nangila musungule mbishi?

¹⁵Davide kubikila muntu wa ku bena mudimu bende, kumutumina diyi ne: — Semena apa, ushipe nsongalume ewu! Muena mudimu wa Davide kushipa muena Amaleke awu.

¹⁶Davide kuela muena Amaleke awu lusanzu ne: — Wewe nkayebe udi mudikebele lufu. Udi mumane kudienzela bibi, bualu udi ujadika ne: “Meme ke udi mushipe mukalenga uvua Maweja-Nangila musungule.”

¹⁷Ke Davide kusaka musambu wa lufu lua Shawule ne Yonatane.

¹⁸Kutumaye diyi bua balongeshe bena Yuda musambu awu. Badi binyika musambu awu ne: “Kasala ka madilu ka buta bua mikete.” Bavua baufunde mu Mukanda wa muntu wa Nsongu,[4] mushindu ewu:

¹⁹Izrayele, bilobu biebe bia mvita mbifue munyi? Benu ba lumu mbafuile pa mikuna bua tshinyi?

²⁰Kanumanyishi bena Ngate lumu elu lubi, kanulutangalaji mu misesu ya Askalone.[5] Bakaji ba bena Peleshete kabasanki nanku! Nsongakaji ya bantu benyi, kayedi mbila ya disanka!

²¹Ku mikuna ya Ngilbowa,[6] lumuma nansha mvula kabiloki! Mu bibandabanda biayi, kamuikadi biakudia mu madimi! Bualu ke muaba uvuabu bimanshe ngabu ya bena mvita ngabu wa Shawule udibu kabayi mua kufita kabidi manyi.

²²Nansha baluishi babu bakeba mua kubashipa, nansha bena lukuna babu ne bukole, buta bua miketa bua Yonatane kabuvua butshina, muela wa Shawule uvua ukumbaja mudimu wawu kashidi.

²³Matuku abu onsu Shawule ne Yonatane bavua banangangana bikole. Dia lufu luabu, kabena bashiyangana. Bavua banyema lubilu, bapite biminyi. Bukitu buabu buvua bupite bua ntambue.

²⁴Bakaji ba mu ditunga dia Izrayele, dilayi Shawule! Uvua unuvuadika bilamba bimpe, bia mushinga mukole, ulengeja bilamba bienu ne bintu bia mpawungi.

²⁵Bilobu bia mvita mbifue mu mvita bua tshinyi? Yonatane mmufuile pa mikuna munyi?

²⁶Mwoyi wanyi udi unyingalala bualu buebe, Yonatane wanyi, muanetu mulunda wanyi wa pa muoyi. Dinanga diuvua munnange nadi, divua dinsankisha mudi dinanga dia bakaji kadiyi mua kunsankisha.

²⁷Bilobu bia mvita mbifue bua tshinyi? Ba kalanda musenga mbabutuke munyi?