Read Tshiluba 2 Samuwele 12 Bible Online

2 Samuwele 12 - Tshiluba bible

2 Samuwele 12

¹Bualu buvua Davide muenze, buvua bufikisha Maweja-Nangila munda. Nanku Maweja-Nangila kutuma muambi Natane kudi Davide.[75] Muambi Natane kufika ku nzubu kua Davide, umuambila ne: — Mu tshimenga tshikuabu, muvua bantu babidi, ewu mubanji, mukuabu mupela.

²Mubanji uvua ne bimuna bia bungi, ngombe ne mikoku.

³Mupela uvua anu ne kana ka mukoku kamue, kavuaye musumbe. Uvua ukadishe, koku kenda kakola ku nzubu kua mupela awu pamue ne bana bende. Kana ka mukoku aku, kavua kadia ne mupela awu diampa dimue, kanua nende kabidi mabela dikopu dimue, kalala anu pabuipi ne mupela awu. Uvua mukengeleke anu bu muanende wa bakaji.

⁴Dituku dikuabu, muntu muenyi kufika ku nzubu kua muntu mubanji. Mubanji kena muangate tshimuna tshia ku bimuna biende bua kushipela muenyi awu to. Kuangataye anu kana ka mukoku ka mupela, bua kukalambila muenyi wende awu.

⁵Davide kufikila mubanji awu munda bikole. Kuambilaye muambi Natane ne: — Maweja-Nangila udi ne muoyi, anteleje! Muntu udi muenze nanku, udi ne bua kufua!

⁶Bu mudi muntu awu muenze bualu abu, kayi ne luse, neapingaje mikoku inayi bua mukoku umue uvuaye muibe awu.

⁷Muambi Natane kuandamuna ne: — Muntu udi muenze bualu abu, ngwewe mene Davide! Maweja-Nangila Mvidi Mukulu wa bena Izrayele udi wamba ne: “Mvua mukujidile bua wewe kuikala mukalenga wa bena Izrayele. Mvua mukusungidile kudi Shawule uvua ukuluisha.

⁸Mvua mufile bena nzubu wa mfumuebe Shawule mu bianza biebe. Mvua mukupeshe bakaji ba mfumuebe Shawule. Meme kuteka bena Izrayele bonsu ne bena Yuda ku bumfumu buebe wewe. Bionsu abi kabivua bikumbana anyi? Meme ndi mua kukuenzela malu makuabu a bungi.

⁹Kadi wewe, kuena munemeke mikenji[76] yanyi bua tshinyi? Udi muenze bindi mbenga bua tshinyi? Udi mushipe Uriya, muena Iti, ku muela. Eyowa, udi muenze muebe muonsu, bua bena Amone bashipe Uriya. Pashishe wewe kuangata mukajende, kumusela.

¹⁰Nanku biangatshile mpindiewu, kashidi dishipangana kadiena dijika mu nzubu muebe to. Bualu paudi musele mukaji wa Uriya, udi mundembakaje meme.

¹¹Teleja bimpe tshindi nkuambila: Meme nensake bana ba mu nzubu muebe bua kukukengeshabu. Nengangate bakaji bebe, mbafile kudi muanenu bua kubabuelelaye mu nzubu mu munya, wewe mutangile.[77]

¹²Wewe uvua muenze bualu ebu mu musokoku. Kadi meme nembuenzeje mu munya, bantu bebe bena Izrayele batangile.”

¹³Davide kuandamuna muambi Natane ne: — Ndi mumanye ne: ndi muenze bibi kumpala kua Maweja-Nangila. Muambi Natane kumuambila ne: — Nanku, Maweja-Nangila udi ukufuila luse. Kuena ufua to.

¹⁴Kadi bua paudi muenze bualu ebu, baluishi ba Maweja-Nangila bapetshi mushindu wa kudiwula Maweja-Nangila.[78] Nanku, muanebe udibu balele mpindiewu, neafue.

¹⁵Ke muambi Natane kupingana kuende. Maweja-Nangila Itusamisha muana uvua Batsheba mulele ne Davide. Batsheba uvua mukaji mukamba, uvua Uriya mushiya.

¹⁶Davide kusengelela Maweja-Nangila bua muana awu, kujila biakudia. Pavuaye mubuele mu nzubu muende, kulalaye panshi butuku bujima.

¹⁷Bena mudimu bende bakulumpe kumutendakena bua ajuke panshi. Kubengaye. Kabidi kubengaye bua kudia nabu kantu nansha kamue.

¹⁸Lumingu lujima lumane kujika, muana kufua. Bena mudimu kutshina bua kumanyisha Davide bua lufu lua muana. Bavua bambilangana ne: “Patshi wa muana ne muoyi, mukalenga kavua witaba bionsu bituvua tumuambila to. Kadi mpindiewu, katuena mua kumuambila ne: muana mmumane kufua to, bualu udi mua kudienzela bibi!”

¹⁹Davide kumona muvua bantu bambilangane malu munkatshi muabu. Kumvuaye ne: kudi bualu. Nanku kubakonkaye ne: — Muananyi mmumane kufua anyi? Bena mudimu kuitaba ne: — Eyowa, mmumane kufua.

²⁰Ke Davide kujuka panshi, kuowa mayi, kulaba manananshi, kuvuala bilamba bimpe. Kuyaye muaba wa tshijila bua kutendelela Maweja-Nangila. Upingana ku nzubu kuende, kulombaye biakudia, kudiaye.

²¹Bena mudimu bende kumukonka ne: — Mukalenga, udi wenza nanku bua tshinyi? Patshivua muanebe ne muoyi, uvua mujile biakudia, udila. Kadi mpindiewu, padi muana mufue, udi ujuka, udia biakudia!

²²Davide kuandamuna ne: — Eyowa, patshivua muana ne muoyi, mvua mujile biakudia, ndila muadi, ndikonka ne: “Udi mumanye meji a Maweja-Nangila nnganyi? Misangu mikuabu udi mua kumfuila luse, kufululula muana, ashale ne muoyi.”

²³Kadi mpindiewu, muana mmumane kufua, nenjile kabidi biakudia bua tshinyi? Kashidi meme tshiena mua kubisha muana ku lufu to! Meme nennye muaba udi muana, kadi muana kena upingana kundi meme to.

²⁴Davide kuya kusamba mukajende Batsheba, kumubuelela mu nzubu. Batsheba kulela muana wa balume, kumuinyika ne: Shelomu. Maweja-Nangila kunanga muana awu.

²⁵Maweja-Nangila kuambila muambi Natane bua amanyishe Davide bualu ebu. Bu muvua Maweja-Nangila munange muana ewu, muambi Natane kumuinyika dina dikuabu ne: Yedidiya, mmumue ne: “Muana udi Maweja-Nangila munange.”

²⁶Tshikondu atshi, Yowabe mfumu wa bena mvita, kuluisha Raba, tshimenga tshinene tshia bena Amone. Kukuataye tshitupa tshinene tshia tshimenga, muaba uvua mukalenga musombe.

²⁷Yowabe kutuma bantu bua kuambila Davide ne: “Ndi muluishe tshimenga tshia Raba. Ndi mumane kukuata muaba udi tshiina tshia mayi.

²⁸Nanku, mpindiewu usangishe bena mvita badi bashala, ufike nabu bua wewe nkayebe udikuatshila tshimenga etshi. Meme tshiena musue kutshikuata to, bua bantu kabantumbishi amu meme.”

²⁹Davide kusangisha bena mvita bavua bashala, kuya nabu bua kuluisha tshimenga tshia Raba, kutshikuata.

³⁰Davide kuangata tshifulu tshia bukalenga tshivua ku mutu kua Milkome,[79] mvidie wa bena Amore. Tshifulu atshi ntshia tshiamu tshia mpawungi, tshivua ne bujitu bua kilo makumi asatu ne pa mutu. Dibue ditoke dia mushinga mukole divua ku tshifulu aku. Kutekabu tshifulu atshi pa mutu wa Davide. Mu tshimenga atshi, bavua bapawula kabidi bintu bipite bungi.

³¹Davide kukuatshisha bena tshimenga kuya nabu, kubenzeja midimu mikole, ya kupanda mabaya, kusonga mabue, kupula mitshi muitu, nansha ya kuenza tushola.[80] Nanku bena bimenga bikuabu bionsu bia bena Amone, Davide uvua ubenzeja midimu anu mushindu ewu. Pashishe Davide kupingana mu Yerushalayime ne bena mvita bende bonsu.