Read Tshiluba 2 Samuwele 15 Bible Online

2 Samuwele 15 - Tshiluba bible

2 Samuwele 15

¹Pashishe, Absalome kusumba ditempu, ne nyama ya tubalu, kusangisha kabidi bena mvita makumi atanu bavua banyema lubilu kumpala kua ditempu diende.

²Butshia dinda, Absalome kuimana kumpenga kua njila ku tshibuelelu tshia tshimenga. Misangu yonsu pavua muntu upita bua kuya ne tshilumbu tshiende kudi mukalenga Davide bua atshikose, Absalome uvua umukonka ne: — Udi ufuma penyi? Muntu uvua wandamuna ne: — Muana wa mukalenga, ndi mfuma mu tshisamba kampande tshia bena Izrayele.

³Nanku Absalome uvua umuandamuna ne: — Mbimpe, tshilumbu tshiebe ntshimpe kabidi, udi mubinge. Kadi kakuena muntu udi mukalenga Davide musungule bua kumvuaye tshilumbu tshiebe.

⁴Absalome uvua umuambila kabidi ne: — Eyowa, bu meme ndumbuluisha bilumbu mu ditunga edi, bantu bonsu badi batandangana, ne badi ne bilumbu bia kulumbulula, bavua mua kufika nabi kundi. Meme mvua mua kubikosa bimpe.

⁵Pavua muntu awu usemena pabuipi bua kudiela mpala panshi kumpala kua Absalome, Absalome uvua umujula, umupukila.

⁶Ke muvua Absalome wenzela bantu bonsu bavua baye ne bilumbu biabu kudi mukalenga Davide. Nanku, Absalome uvua utekesha bena Izrayele ku kakese ku kakese bua kumunangabu.

⁷Bidimu binayi bimane kukumbana, dituku dikuabu, Absalome kulomba mukalenga Davide ne: — Ndi musue kuya mu tshimenga tshia Ebrone,[92] bua kukumbaja bualu bumvua mulaye Maweja-Nangila.

⁸Pantshivua mu Ngeshure mu Siriya, mvua mulaye Maweja-Nangila ne: Pawikala mmupingaje mu Yerushalayime, nenkulambule milambu ku Ebrone.[93]

⁹Mukalenga Davide kulayangana nende ne: — Waya bimpe. Ke Absalome kuya ku Ebrone.

¹⁰Pavuaye mu tshimenga atshi, kutumaye bantu bende mu musokoku mu bimenga bionsu bia bena Izrayele. Bantu abu, bavua baye bua kuambila bena Izrayele ne: “Panuikala bumvua miadi ya mpungi, nuele mbila ne: Absalome ke udi mushale mukalenga mu Ebrone.”

¹¹Bantu nkama ibidi ba mu Yerushalayime, bavua Absalome mubikidishe, bavua bafike nende. Kadi bavua baye ne Absalome nanku kabayi bamanya bualu, kabayi nende mu tshipangu tshia kutombokela mukalenga.

¹²Pavua Absalome ulambula milambu, kubikidishaye Akitofele, mufidi wa ngenyi wa mukalenga Davide, uvua musombela mu tshimenga tshia Ngilo.[94] Nanku, bantu bavua ku luseke lua Absalome bavua benda basangana. Buntomboji buabu buvua buenda bukole.

¹³Musangu awu, kuambilabu Davide ne: “Bena Izrayele mbasungule Absalome.”

¹⁴Nanku, mukalenga Davide kuambila balombodi ba mu bukalenga buende bonsu bavuaye nabu mu Yerushalayime ne: — Jukayi, tunyeme, bualu Absalome neakebe mua kutushipa. Kena mua kutulekela ne muoyi to. Tuyayi lubilu, bualu neafike lukasa bua kutuluisha. Neatukengeshe bikole, kabidi neabutule bena mu tshimenga bonsu.

¹⁵Balombodi ba mu bukalenga kuandamuna ne: — Mukalenga, tuetu tudi tuitaba bua kuenza tshionsu tshiudi musue.

¹⁶Nanku, mukalenga Davide, bena nzubu wende, ne balombodi ba mu bukalenga buende, kumuka ku nzubu wa bukalenga ku makasa. Mukalenga Davide uvua mushiye anu bakaji bende bakuabu dikumi bua kulamabu nzubu wa bukalenga.

¹⁷Mukalenga Davide ne bonsu bavuaye nabu kupatuka mu tshimenga, kuimana pabuipi ne nzubu wa ndekelu wa mu tshimenga.

¹⁸Bena mudimu ba mukalenga Davide bonsu, kutuadija kuenda kumpala kua mukalenga: bena Kereti ne bena Peleti, bena mvita bavua balame mukalenga; pashishe bena mvita nkama isambombu ba bena Ngate[95] bavua ku luseke lua mukalenga Davide. Bonsu kuendabu kumpala kua mukalenga Davide bua abamone.

¹⁹Mukalenga Davide kukonka Kayi, mfumu wa bena mvita ba bena Ngate, ne: — Wewe udi musue kuya netu bua tshinyi? Pingana mu tshimenga, ushale ne mukalenga mupiamupia. Bualu wewe udi muntu muenyi, musombe mu ditunga dia bende.

²⁰Wewe udi mufike kundi anu matuku makese aa. Lelu tukadi mua kuya nebe, meme tshiyi mumanye muaba undi nya anyi? Nansha kakese, pingana mu tshimenga. Uye ne bena kuenu. Maweja-Nangila akuambuluishe, akuenzele bimpe.[96]

²¹Kadi Itayi kuandamuna ne: — Mukalenga wanyi, bu mudi Maweja-Nangila ne muoyi, ne bu muudi wewe kabidi ne muoyi, ndi nditshipa ne: Tuyaya nebe muaba uudi uya. Pavuafua netufue nebe: pawikala ne muoyi, nengikale ne muoyi kabidi.

²²Mukalenga Davide kuandamuna ne: — Eyowa mbimpe. Pita kumpala tuye. Nanku, Kayi kupita ne bena mvita bende ne bena nzubu yabu.

²³Bena mvita bavua anu benda kumpala kua mukalenga Davide. Bena ditunga kudila miadi bikole, kuela mbila. Mukalenga Davide ne bantu bende, kusabuka musulu wa Sedrone,[97] balonda njila wa ku tshipela.

²⁴Mutuangaji Sadoke uvua ku bantu abu, ne bena Levi bambula mushete wa ndondu wa Mvidi Mukulu. Bena levi kutula mushete panshi. Mutuangaji Abiyatare kulambula milambu, too ne pakasabuka bantu bonsu bavua bafuma mu Yerushalayime.[98]

²⁵Pashishe mukalenga Davide kuambila mutuangaji Sadoke ne: — Upingaje mushete wa tshijila mu Yerushalayime. Pikala Maweja-Nangila musue kungenzela bimpe, neampingaje kabidi mu Yerushalayime bua meme kumona kabidi mushete ne nzubu wa Mvidi Mukulu.

²⁶Pikalaye kayi musue, bidi amu bimpe. Angenzele bu mudiye musue.

²⁷Mukalenga Davide kuambila kabidi mutuangaji Sadoke ne: — Tangila, upingane mu tshimenga anu bimpe. Uye ne muanebe wa balume Akimase. Uye kabidi ne mutuangaji Abiyatare ne muanende wa balume Yonatane.

²⁸Kadi meme, ndi nshala muindile mu tshipela tshidi pabuipi ne dilobu dia Yardene, too ne pangikala mupeta lumu ne: nudi bafike bimpe.

²⁹Nanku batuangaji Sadoke ne Abiyatare kupingana ne mushete wa tshijila mu Yerushalayime, kusombamu.

³⁰Mukalenga Davide kubanda mukuna wa olive,[99] wenda udila. Uvua mudibuikila tshilamba ku mesu, wenda ku makasa kutupu. Bantu bonsu bavuaye nabu, bavua anu badibuikila bilamba ku mesu, benda badila.

³¹Kuambilabu Davide ne: Akitofele[100] udi munkatshi mua bantu badi ku luseke lua Absalome, bakeba mua kuangata bukalenga. Ke Davide kuamba ne: “Maweja-Nangila ndi nkusengelela ne: ngenyi yonsu idi Akitofele ufila, ikale ya budingidingi, kayiyi mimpe to”

³²Anu mukalenga Davide ufika ku lusongu lua mukuna, muaba udibu batendelela Mvidi Mukulu, kumonaye mufidi wende wa ngenyi Ushayi, muena Arki, ulua bua kusambakena nende. Uvua ne muntumpu mupandike, muikale kabidi ne buloba ku mutu.

³³Mukalenga Davide kumuambila ne: — Kuena mua kuya nanyi to. Udi mua kunnemena bujitu.

³⁴Pingana anu mu tshimenga, wambile Absalome ne: “Mukalenga, ndi musue kuikala muena mudimu webe. Bangabanga mvua muena mudimu wa tatuebe Davide. Kadi mpindiewu ndi musue kukuenzela mudimu!” Wewe muenze nanku, neungambuluishe bua kubenga ngenyi idi Akitofele ufila.

³⁵Kabidi neumwangane ne batuangaji Sadoke ne Abiyatare. Newikale ubamanyisha malu onsu audi umvua mu nzubu wa mukalenga.

³⁶Akimase, muana wa Sadoke, ne Yonatane, muana wa Abiyatare, bonsu babidi badi ne batatuabu mu tshimenga amu. Neubatume bua kungambilabu malu onsu awikala mumvue.

³⁷Ushayi, mufidi wa ngenyi wa mukalenga Davide, kupingana mu Yerushalayime. Diba adi Absalome utshivua utshifikilamu.