Read Tshiluba 2 Samuwele 17 Bible Online

2 Samuwele 17 - Tshiluba bible

2 Samuwele 17

¹Matuku makese mamane kupita, Akitofele kuambila Absalome ne: — Itaba bua nsungule bena mvita binunu dikumi ne bibidi bua meme kulondakaja Davide butuku ebu.

²Nemmukuate, pikalaye yeye mumane kupungila, mmuteketa mu maboku. Nemmukuatshishe bowa. Nanku bantu bonsu badiye nabu nebanyeme. Diba adi nenshipe anu Davide nkayende.

³Pashishe nempingane ne bena Izrayele bende bonsu kuudi. Muntu udi ukuatshisha mumane kufua, bena Izrayele bonsu nebapingane kuudi, kabidi nebasombe anu bimpe.[108]

⁴Lungenyi alu kusankisha Absalome ne bakulu ba bena Izrayele bonsu.

⁵Kadi Absalome kutuma diyi ne: — Babikile kabidi Ushayi, muena Arki, bua tumvue tshidiye wamba.

⁶Ushayi mumane kufika, Absalome kumuambila bionsu bivua Akitofele muambe. Pashishe Absalome kukonka Ushayi ne: — Tuenze bionsu bidi Akitofele mutuambile abi, anyi udi utupesha lungenyi lukuabu?

⁷Ushayi kuandamuna Absalome ne: — Musangu ewu, lungenyi ludi Akitofele mufila kaluena luimpe to.

⁸Wewe udi mumanye tatuebe Davide bimpe ne bantu badiye nabu: bonsu mbena mvita ba bukitu. Badi ne lonji bu nyama ya nkashama, padi mamuende mujimine mu tshisuku. Kabidi tatuebe mmuena mvita, kena mua kulala muaba umue ne bena mvita bakuabu to.

⁹Bulelela, mpindiewu udi mua kuikala musokome mu lubuebue, nansha muaba mukuabu. Pikalabu badianjila kushipa bantu bakuabu ba munkatshi muetu, lumu neluye ne: Mbatshimune bena mvita ba Absalome.

¹⁰Diba adi bena mvita bonsu, too ne badi ne bukitu ne muoyi mukole bu nyama wa ntambue, nebatekete mu maboku. Bualu bena Izrayele bonsu mbamanye ne: tatuebe Davide udi muena mvita wa bukitu, kabidi bantu bonsu badiye nabu mbilobu.

¹¹Lungenyi luanyi ludi nunku: Ubikidishe bena mvita bonsu ba bena Izrayele, biangatshile ku Dane too ne ku Bersheba, bikale bungi bu lusenga ludi ku muelelu wa mayi manene. Pashishe, wewe nkayebe uye nabu mu mvita amu.[109]

¹²Netupete Davide muaba onsu wikalaye musokome. Netumunguile bu mudi lumuma lumata pa buloba. Tatuebe ne bantu bonsu badiye nabu, netubabutule bonsu.

¹³Pikalabu banyemene mu thimenga kampande, bena mvita betu bonsu nebaye ne mionji, netukoke tshimenga atshi bua kutshiela mu musulu udi pabuipi too ne padi mu tshimemga atshi kamuyi mushala nansha lusoka.

¹⁴Absalome ne bena Izrayele kuamba ne: — Lungenyi lua Ushayi nduimpe lupite lua Akitofele! Maweja-Nangila ke uvua muenze bua babenge lungenyi lua Akitofele luvua luimpe. Bualu Maweja-Nangila uvua musue kukengesha Absalome.

¹⁵Ushayi kumanyisha batuangaji: Sadoke ne Abiyatare lungenyi luvua Akitofele muambile Absalome ne bakulu ba bena Izrayele, kubamanyisha kabidi ne lungenyi luvuaye mufile yeye nkayende.

¹⁶Ke Ushayi kubambila kabidi ne: — Nanku mpindiewu, tumayi diyi lukasa kudi Davide. Numuambile bua kaladi butuku mu mpata udi ku Yardene to. Asabuke musulu lukasa, bua kabamushipi ne bantu bonsu badiye nabu.

¹⁷Yonatane, muana wa Abiyatare, ne Akimase, muana wa Sadoke, bavua basombela pabuipi ne mpokolu wa Enrojele. Ke batuangaji abu kubatumina mukaji muena mudimu bua kubamanyisha malu avuabu mua kuya kuambila mukalenga Davide.[110] Bualu Yonatane ne Akimase kabawa mua kubuela mu Yerushalayime to, bua kabamanyi kudi bantu.

¹⁸Kadi nsongalume mukuabu, uvua mumane kubamona, kuyaye kuambila Absalome. Nanku Yonatane ne Akimase kunyema lubilu, kufika ku nzubu kua muntu mukuabu mu musoku wa Bakurime.[111] Mu lubanza lua muntu awu, muvua tshiina tshia mayi. Kusokomabu mu tshiina atshi.

¹⁹Mukaji wa muena nzubu awu, kubuikila tshilamba ku mushiku wa tshiina atshi. Kuadijaye ntete pa tshilamba apu mushindu udi muntu kayi mua kumona tshiina to.

²⁰Bantu bavua Absalome mutume kufika ku nzubu kua mukaji awu, kumukonka ne: — Akimase ne Yonatane badi penyi? Mukaji kuandamuna ne: — Bakadi bamane kupitshila ku tshiina tshia mayi.[112] Bantu bavua Absalome mutume, kukeba Yonatane ne Akimase, kupanga. Kupinganabu mu Yerushalayime.

²¹Bobu bamane kuya, Akimase ne Yonatane kupatukabu mu tshiina, kuya kudimuja mukalenga Davide, bamuambile bionsu bivua Akitofele muambe. Pashishe kumuambilabu ne: — Jukayi lukasa, nusabuke Yardene.

²²Nanku, Davide kujuka lukasa ne bantu bavuaye nabu, kusabuka Yardene. Butshia dinda, bantu bonsu bavua bamane kusabuka, kakuyi muntu mushale nansha umue.

²³Akitofele umona ne: kabena bitabe lungenyi luende, kusuikaye biseba bia kusomba pa nyama wende wa mpunde, kupinganaye mu tshimenga tshia Ngilo, nuwuaye musombela.[113] Kulayaye bena nzubu wende, pashishe kudiowaye. Kumujikabu mu lukita lua tatuende.

²⁴Davide kufika ku Makanayime,[114] patshivua Absalome usabuka Yardene ne bena mvita ba bena Izrayele bonsu.

²⁵Absalome uvua mumane kusungula Amasha bua kuikalaye mfumu wa bena mvita, mupingana muaba wa Yowabe. Amasha uvua muana wa Yetere, muena Izrayele. Yetere uvua musele Abigale, muana wa Nakashe, kabidi muanabu wa Seruya, mamuende wa Yowabe.[115]

²⁶Absalome ne bena Izrayele kuasa mitanda yabu mu ditunga dia Ngilaade.[116]

²⁷Davide mumane kufika ku Makanayime, kupetangana ne Shobi, muana wa Nakashe wa mu Raba, tshimenga tshinene tshia bena Amone. Kumonanganaye kabidi ne Makire, muana wa Amiyele, wa mu tshimenga tshia Lodabare, kabidi ne Barzilayi, wa mu musoku wa Rogelime mu ditunga dia Ngilaade.[117]

²⁸Bantu aba bavua batuadile Davide ne bantu bavuaye nabu: malalu, bilamba bienza ne boya bua nyama, malongu ne biakudia, ntete ya kuenza bukula, ntete ya orje, bukula mene, ntete mikanga, nkunde ya mishindu mishilangane, buitshi, manteka, fromaje muenza ne mabela a ngombe, makuabu muenze ne a mikoku.[118] Bualu bantu abu bavua bambilangane ne: “Bantu aba bavua bapitshile mu tshipela, badi mua kuikala bapungila, bafue ne nzala ne nyota.”