Read Tshiluba 2 Samuwele 21 Bible Online

2 Samuwele 21 - Tshiluba bible

2 Samuwele 21

¹Tshikondu tshivua Davide mu bukalenga, tshiyole tshia nzala kushala mu ditunga bidimu bisatu bilondangane. Mukalenga Davide kukonka Maweja-Nangila bua tshiyole atshi. Maweja-Nangila kuandamuna ne: — Nudi mu tshiyole, bualu Shawule ne bantu bende mbena tshibawu: bavua bashipe bena Ngibone.[138]

²Mukalenga Davide kubikidisha bena Ngibone bua kuyukila nabu. Bena Ngibone kabawa bena Izrayele to. Bavua bena Amone bavua bashala ne muoyi, bualu bena Izrayele bavua babalaya ne: katuena mua kunushipa to. Kadi pavua Shawule ukeba kusankisha bena Izrayele ne bena Yuda, uvua ukeba kubutula bena Ngibone.[139]

³Mukalenga Davide kukonka bena Ngibone ne: — Bua meme kudia nenu tshibalu, nuenu kuela bena Izrayele lupemba bua makenga onsu awa manuenzekele, nnuenzele tshinyi?

⁴Bena Ngibone kuandamuna ne: — Bualu budi pankatshi petu ne Shawule ne bena nzubu wende, kabuena mua kujika ne nkanu ya mushinga mukole, anyi ne tshiamu tshia mpawungi, nansha bua kushipa muena Izrayele[140] umue to. Mukalenga Davide kubakonka kabidi ne: — Nanku ngambilayi tshinudi nujinga, nnupeshatshi.

⁵Bena Ngibone kumuambila ne: — Shawule uvua musue kutujikija bonsu, kutubutula. Kavua musue bua muntu wa kutudi nansha umue ashale mu buloba bua bena Izrayele to.

⁶Nanku batupeshe bantu balume muanda mutekete ba ku ndelanganyi ya Shawule. Netubowe kumpala kua Maweja-Nangila ku Ngibeya,[141] mu tshimenga tshivuabu basombe kudi Shawule, mukalenga uvua Maweja-Nangila musungule. Mukalenga Davide kuitaba ne: — Eyowa, ndi nnupesha.

⁷Mukalenga Davide kufuila Mefibaale, muana wa Yonatane, muikulu wa Shawule luse, bualu uvua mumane kutua ndondu wa bulunda ne Yonatane mu dina dia Maweja-Nangila.[142]

⁸Kadi kubikidishaye Armoni ne Mefiboshete, bana ba balume babidi bavua Rispa, muana wa Aya, mulele ne bayende Shawule. Kubikidishaye kabidi bana ba balume batanu bavua Mikale, muana wa Shawule, mulele ne bayende Adriyele, muana wa Barzilayi wa mu Abele-Mekola.[143]

⁹Mukalenga Davide kufila bana abu kudi bena Ngibone. Bena Ngibone kuya ne bana abu pa kakuna, kubowa kumpala kua Maweja-Nangila. Bana abu kufua bonsu muanda mutekete musangu umue. Bavua babashipe mu matuku a kumpala menemene avuabu batuadija kunowa ntete ya orje.[144]

¹⁰Rispa, mukaji mukamba uvua Shawule mushiye, kuangata tshilamba tshikayabale tshivuaye muvuale, kutshibuikila pa lubuebue. Kusombaye muaba awu, biangatshile ku ntuadijilu kua dinowa too ne ku tshikondu tshiwa mvula mutuadije kutokela bitalu bia bana abu. Mu munya, mukaji awu uvua wipata nyunyi bua kayikidi pa bitalu abi. Butuku uvua wipata nyama ya tshisuku bua kayifiki muaba awu.

¹¹Kumanyishabu mukalenga Davide bionsu bivua mukaji awu wenza.

¹²Nanku, mukalenga kuya kunyenga mifuba ya Shawule, ya muanende Yonatane ivua mu tshimenga tshia Yabeshe, mu ditunga dia Ngilaade. Bualu pavua bena Peleshete batshimuna Shawule ku Ngilbowa, bavua balembeleje tshitalu tshia Shawule ne tshia Yonatane ku Bete-Sheyane muaba udi bantu batuilangane. Muaba awu, ke uvua bena tshimenga tshia Yabeshe baye kuiba[145] bitalu abi.

¹³Davide kumuka mu tshimenga tshia Yabeshe ne mifuba ya Shawule ne ya Yonatane. Pashishe, kungujabu kabidi mifuba ya bana muanda mutekete bavuabu bowa.

¹⁴Kuyabu kuyijika muaba umue ne mifuba ya Shawule ne ya Yonatane, mu lukita lua Kishe, tatuende wa Shawule, luvua ku Sela[146] mu buloba bua bena Binyamine. Bantu bamane kuenza bonsu bivua mukalenga Davide muambe, Mvidi Mukulu kukumbaja bionsu bivua bena ditunga balombe.

¹⁵Mvita kujuka kabidi pankatshi pa bena Peleshete ne bena Izrayele. Davide ne bena mvita bende kupueka bua kuluisha bena Peleshete. Diakamue mukalenga Davide kupungila.

¹⁶Ishebi-Benobe, muntu wa mpolondu wa ku ndelanganyi ya Arafa,[147] uvua musue kushipa Davide. Uvua muvuale bia mvita bipiabipia. Lusongu lua difuma diende luvua lua tshiamu tshikunze, luvua ne bujitu bua kilo isatu ne pa mutu.

¹⁷Kadi Abishayi, muana wa Seruya, kusungidila mukalenga Davide, kushipa muena Peleshete awu. Ke bena mvita kuambila mukalenga Davide ne: kuena mua kuya netu kabidi mu mvita to. Bualu wewe udi bu muendu wa bena Izrayele udi kauyi mua kujima.

¹⁸Matuku mamane kupita, bena Izrayele kuluisha bena Peleshete tshiakabidi ku Ngobe,[148] Mu mvita ayi, Sibekayi, wa mu Usha, kushipa Safe, muntu mukuabu wa ku ndelanganyi ya Arafa.

¹⁹Mu mvita mikuabu ivuabu baluisha bena Peleshete, ku Ngobe kabidi, Elanane, muana wa Yari, wa mu musoku wa Betleyeme, kushipa Ngoliyate, wa mu tshimenga tshia Ngate.[149] Mutshi wa musongolu uvua nawu Ngoliyate uvua munene bu wa kukuma nawu madiba.

²⁰Kuluanganabu kabidi ku Ngate. Muluishi mukuabu uvua muaba awu, muikale ne minu isambombu ku tshianza tshionsu, kabidi ne bana ba nkasa basambombu ku dikasa dionsu. Bionsu bivua bienza makumi abidi ne binayi. Muntu uvua kabidi wa ku ndelanganyi ya Arafa. Uvua munange mvita bikole.

²¹Kupendaye bena Izrayele. Nanku Yonatane muana wa Shama, tatuende wa Davide, kumushipa.

²²Nanku bena mvita aba banayi ba bena Peleshete, ndelanganyi ya Arafa, muena Ngate, kubashipabu kudi Davide ne bena mvita bende. Davide mumane kutshimuna mvita kuelaye Mvidi