Read Tshiluba 2 Samuwele 3 Bible Online

2 Samuwele 3 - Tshiluba bible

2 Samuwele 3

¹Matuku mavule, muvua mvita pankatshi pa bena mvita ba Davide ne ba Shawule. Kadi bukalenga bua Davide buvua buenda budiunda, bua ndelanganyi ya Shawule buenda buteketa bushepeketa.

²Davide uvua mulele bana ba balume ba bungi mu Ebrone: Muanabute udi Amnone, muana wa Akinowame, muena Yizreyele.

³Muana muibidi udi Kilabe, muana wa Abigayile, muena mu Karmele, mukaji mukamba uvua Nabale mushiye. Muana muisatu udi Absalome, muana wa Maaka, muana wa Talmayi, mukalenga wa bena Ngeshure.[16]

⁴Muana muinayi udi Adoniya, muana wa Angite. Muana muitanu udi Shefatya, muana wa Abitale.

⁵Muana muisambombu udi Itreyame, muana wa Egla. Egla uvua kabidi mukaji wa mukalenga Davide. Aba ke bana ba balume ba mukalenga Davide, bavuaye mulele mu Ebrone.

⁶Patshivua bena mvita ba Davide ne ba Shawule baluangana, Abnere uvua bukole bua bena mvita ba Shawule.

⁷Shawule uvua ne mukaji mukuabu, dina diende Rispa, muana wa Aya. Dituku dikuabu, Ishebaale kukonka Abnere bua mukaji awu ne: — Uvua mubuelele mukaji wa tatuanyi Shawule mu nzubu bua tshinyi?[17]

⁸Abnere umvua nanku, kupeta tshiji tshikole. Kukonkaye Ishebaale ne: — Meme ndi mbua mutomboke udi uditua ku tshia bena Yuda anyi? Too ne mpindiewu, ndi muleje mundi ngitaba diku dia tatuebe Shawule, bana babu ne balunda bende. Ndi muenze muanyi muonsu bua Davide kakukuatshi to. Kadi lelu, udi untandisha bua pandi mubuelele mukaji ewu mu nzubu!

⁹Maweja-Nangila annyoke bikole, pangikala tshiyi ngenzela Davide bionsu bivua Maweja-Nangila mumulaye.

¹⁰Bualu Maweja-Nangila uvua mumane kuditshipa bua kumusha bukalenga mu nzubu mua Shawule,[18] kubupesha Davide, bua bukalenga bua Davide budiunde mu ditunga dia bena Izrayele, ku mutu wadi too ne kuinshi, mudiye nabu mu ditunga dia bena Yuda.

¹¹Ishebaale uvua uzakala bikole ne bowa, kayi ne mushindu wa kuandamuna Abnere muaku nansha umue to.

¹²Ke Abnere kutuma bantu kudi Davide bua kumukonka ne: “Ditunga edi ndia nganyi? Tutue nebe ndondu. Nenkuambuluishe bua bena Izrayele bonsu bumvuangane nebe.”

¹³Davide kuitaba ne: “Eyowa, ndi muanyishe bua kutua nebe ndondu. Kadi ndi nkulomba anu tshintu tshimue: bua meme kumonangana nebe, ufike ne mukajanyi Mikale,[19] muana wa Shawule. Anu wewe mufike nende, nanku netuyukile nebe.”

¹⁴Ke Davide kutuma bantu kudi Ishebaale, muana wa Shawule, bua kumuambila ne: “Umpingajile mukajanyi Mikale, umvua musele ku makoba lukama[20] a misosu ya bena Peleshete.”

¹⁵Nanku Ishebaale kubikidisha Mikale uvua kua bayende Palti yele,[21] muana wa Layishe.

¹⁶Paltiyele kuya ne Mikale, wenda udila Mikale too ne ku Bakurime.[22] Bafike ku Bakurime, Abnere kutuma diyi bua Paltiyele apingane kuende. Awu kupingana.

¹⁷Abnere kuyukila ne bakulu ba bena Izrayele, kubambila ne: — Kukadi bidimu bia bungi binudi nujinga amu kujinga bua Davide kuikalaye mukalenga wenu.

¹⁸Mpindiewu, tshikondu tshiakumbanyi tshia kuenza bualu abu! Bualu Maweja-Nangila uvua mumane kuamba bua Davide ne: “Anu muntu wanyi Davide ke wasungidila bantu banyi bena Izrayele, mu bianza bia bena Peleshete ne mu bianza bia baluishi babu bakuabu bonsu.”

¹⁹Abnere kuyukila kabidi ne bena Binyamine. Pashishe kuyaye ku Ebrone bua ajadikile Davide, tshivua bena Binyamine ne bena Izrayele bakuabu, bitabe ne muoyi umue bua kuenza.[23]

²⁰Abnere kufika kua Davide mu Ebrone ne bantu makumi abidi. Davide kubalambishila biakudia bia disanka.

²¹Abnere kuambila Davide ne: — Mukalenga, ndi musue kupingana bua kuyukila ne bena Izrayele bonsu bua bashale ku luseke luebe. Nebatue nebe ndondu. Nanku neushale mukalenga wa ditunga dijima bu muudi ujinga. Davide kulayangana bimpe ne Abnere. Awu kumuka, kabayi bamutatshishe kudi muntu.

²²Mutantshi mukese, Yowabe kufika ne bena mvita bavua balame Davide. Yowabe uvua ufuma ku mvita, mumane kupawula bintu bipite bungi. Abnere katshivua kabidi kua Davide mu Ebrone to. Bualu mukalenga Davide ukavua mumane kulayangana nende anu bimpe, bua aye, bantu kabayi bamutatshisha.

²³Amu Yowabe ufika ne bena mvita bonsu bavuaye nabu, muntu mukuabu kumuambila ne: Abnere muana wa Nere, uvua mufike muaba ewu bua kumonangana ne mukalenga Davide. Kadi mukalega Davide kumulaya anu bimpe.

²⁴Ke Yowabe kuya kudi mukalenga Davide, umukonka ne: — Udi muenze nenku bua tshinyi? Abnere mumane kufika, wewe kumulekela kuyaye!

²⁵Wewe udi mumanye Abnere bimpe! Padiye mufike kuudi mbua kukushima, bua kutentekela njila iudi wendela, kabidi bua kumanya bionsu biudi wenza.

²⁶Yowabe umuka kua mukalenga Davide, kutumaye bantu bua bakuate Abnere. Kumukuatabu ku tshiina tshia mayi tshia Sira,[24] Davide kayi mumanye to. Kupinganabu nende mu Ebrone.

²⁷Bamane kufika ne Abnere ku tshiibi tshia tshimenga, Yowabe kubuela nende mu tshimenga, kuya nende pa nkayende, bu udi musue kumuambila bualu bua musokoku. Muaba awu, Yowabe kutua Abnere muela mu difu. Kumushipaye bua kusombuela lufu lua muanabu Ashayele.

²⁸Amu Davide upeta lumu lua bionsu bivua bienzeka abi, kuambaye ne: — Maweja-Nangila udi mumanye ne: meme ne bena mu bukalenga buanyi, tudi babinge kashidi bua lufu lua Abnere, muana wa Nere.

²⁹Amu Yowabe ne bena mu nzubu wende bonsu, ke bena tshibawu. Ku ndelanganyi yende mu bikondu bionsu, muntu neapete disama dia tufina tupatuka mu mubidi, nansha nsudi, ikale wenda ne dikombu, afue ku muela wa mvita, apanga biakudia!

³⁰Ke muvua Yowabe ne muanabu Abishayi bashipe Abnere, bualu Abnere uvua mushipe muanabu Ashayele mu mvita ya mu Ngibone.[25]

³¹Davide kutumina Yowabe ne bantu bende bonsu diyi ne: — Pandayi bilamba bienu, vualayi bilamba bikayabala, nuikale ne madilu a Abnere. Bantu bonsu bavua balonda tshitalu tshia Abnere, ne mukalenga Davide kabidi.

³²Kujikabu Abnere mu Ebrone. Mukalenga Davide kudila muadi mukole ku lukita lua Abnere. Bantu bonsu kudila.

³³Ke mukalenga Davide kuela kasala ka muadi, utumbisha Abnere, wamba ne: Abnere wanyi ee! Udi mufue lufu lua muntu mutshimbakane bua tshinyi?

³⁴Bianza biebe kabavua babisuika mionji, makasa ebe kabavua baela mu tshikunyi. Udi mufue bu muntu mutapa kudi bantu babi, bashipianganyi! Bantu bonsu bavua ku lukita aku, bavua amu badila.

³⁵Butuku kabuyi buanji kuila, bantu kusemena kudi mukalenga Davide bua kumupesha biakudia. Kadi mukalenga Davide kuditshipa, wamba ne: — Meme mudie tshipese tshia diampa, nansha tshintu tshikuabu, butuku kabuyi buanji kuila, Maweja-Nangila annyoke ne dinyoka dikole!

³⁶Bantu bonsu kumanya bualu abu, kusanka. Misangu yonsu bantu bavua banyisha bivua Davide wenza.

³⁷Nanku dituku adi, bena Yuda ne bena Izrayele bonsu kujadika ne: mukalenga Davide kavua mutume diyi bua bashipe Abnere, muana wa Nere, to.

³⁸Mukalenga Davide kuambila kabidi Balombodi ba mu bukalenga buende ne: — Mfumu, mfumu munene wa bena Izrayele mmufue lelu. Nudi bela meji bimpe ku bualu ebu anyi?

³⁹Bulelela, meme Davide ndi mukalenga. Kadi lelu ndi ngunwua butekete bua bungi. Bana aba ba Seruya, mbana babi, badi bampite bukole. Nanku Maweja-Nangila nkayende anyoke bantu badi benza bualu ebu.