Read Tshiluba 2 Samuwele 5 Bible Online

2 Samuwele 5 - Tshiluba bible

2 Samuwele 5

¹Bantu ba mu bisamba bionsu bia bena Izrayele, kuya kudi Davide mu Ebrone[32] bamuambila ne: — Tudi nebe bena muntu, bena diku dimue.

²Kale patshivua Shawule mukalenga wetu, ukavua ulombola bena Izrayele mu mvita yabu. Maweja-Nangila uvua mumane kukuambila ne: “Wewe Davide newikale, mukalenga wa bantu banyi bena Izrayele, newikale mfumuabu.”

³Nanku bakulu bonsu ba bena Izrayele kufika, kuya kudi mukalenga Davide mu Ebrone. Davide kutua nabu ndondu kumpala kua Maweja-Nangila. Kujidilabu Davide bua ikale mukalenga wa bena Izrayele.

⁴Tshikondu tshivua Davide mubuele mu bukalenga, uvua ne bidimu makumi asatu. Kushalaye mu bukalenga bidimu makumi anayi.

⁵Mu Ebrone, uvua mushale mukalenga wa bena Yuda bidimu muanda mutekete ne tshitupa. Mu Yerushalayime, uvua mushale mukalenga wa bena Izrayele bonsu ne wa bena Yuda,[33] bidimu makumi asatu ne bisatu.

⁶Mukalenga Davide ne bantu bavuaye nabu, kuya kuluisha bena mu tshimenga tshia Yerushalayime. Ke bena Yebusa[34] bavua base mu tshimenga atshi, kuambila Davide ne: — Kuakubuela mu tshimenga tshietu to. Bualu nansha bampofu ne bantu badi batebuke badi anu mua kupeta bukole bukumbane bua kukuipata. Bavua bafuna mushindu ewu bua kujadika ne: Davide kena mua kukuata tshimenga to.

⁷Kadi Davide kukuata mukuna wa Siyone uvuabu bakolesha ne bimana. Ke pavuabu binyika mukuna wa Siyone awu ne: Tshimenga tshia Davide.

⁸Dituku adi, Davide kuamba ne: “Pikala muntu musue, kutshimuna bena Yebusa, abuele mu mukidi wa mayi, udi muinshi mua buloba, bua kufika muaba udibu. Kuntelela bampofu ne batebuki nkunseka menemene.” Ke padi bantu bamba ne: “Mpofu ne bantu badi batebuka, kabena mua kubuela mu nzubu wa Mvidi Mukulu to.[35]”

⁹Davide kuya kusomba muaba uvuabu bakolesha ne bimana. Kuinyikaye muaba awu ne: “Tshimenga tshia Davide” Pashishe Davide kuibakaye bimana bikuabu, pankatshi pa nzubu wende, ne tshibumba tshia Milo.[36]

¹⁰Nanku bukole bua Davide buvua buenda buvulangane, bualu Maweja-Nangila Mvidi Mukulu wa bena Izrayele uvua nende.

¹¹Irame, mukalenga wa Tire, kutuma bantu kudi Davide, ne mitshi ya sedre kabidi ne bena mabaya ne basongi ba mabue, bua bashile Davide nzubu wa bukalenga.

¹²Ke Davide kujadika ne: Maweja-Nangila nkayende mmumpe bukalenga bua bena Izrayele, mmuele bukalenga buanyi lupemba, bualu bua bantu bende, bena Izrayele.

¹³Mukalenga Davide mumane kumuangata mu Ebrone, muye mu tshimenga tshia Yerushalayime, kuselaye bakaji bakuabu, bana ba bakalenga ne bana ba bantu bakuabu. Bakaji abu, kulela bana ba balume ne ba bakaji.

¹⁴Mena a bana ba balume bavua Davide mulele mu Yerushalayime adi nunku: Shamuwa,[37] Shobabe, Natane, Shelomu,

¹⁵Ibare, Elishuwa, Nefeje, Yafiya,

¹⁶Elishame, Eliyada[38] ne Elifelete.

¹⁷Bena Peleshete kupeta lumu ne: mbamane kujidila Davide bua kuikalaye mukalenga wa bena Izrayele bonsu. Nanku kuyabu bonsu kuluisha Davide bua kumukuata. Davide upeta lumu alu, kuyaye muaba uvuabu bibaka ne bimana bikole.[39]

¹⁸Bena Peleshete kufika mu tshibandabanda tshia mu Refayime.[40]

¹⁹Davide kukonka Maweja-Nangila ne: — Ndi mua kuya kuluisha bena Peleshete anyi? Maweja-Nangila neubafile mu bianza bianyi anyi? Maweja-Nangila kuitaba ne: — Eyowa, uye kubaluisha! Nembafile mu bianza biebe bulelela.

²⁰Nanku Davide kuya ku Bale-Perashime,[41] kutshimuna bena Peleshete muaba awu, wamba ne: — Maweja-Nangila mmupandulule baluishi banyi kumpala kuanyi, anu bu mudi musulu upanda nkita. Ke padibu binyika muaba awu ne: Bale-Perashime, mmumue ne: “Mfumu udi upanda nkita.”

²¹Pavua bena Peleshete banyema, bavua bashiya mpingu yabu muaba awu. Davide ne bantu bavuaye nabu kuyambula.

²²Bena Peleshete kuya kabidi kuluisha Davide. Kubuelabu mu tshibandabanda tshia Refayime.

²³Dayide kukonka kabidi Maweja-Nangila. Maweja-Nangila kuandamuna ne: — Kuena mua kubaluisha muaba ewu to! Kadi ubapingane pa nyima. Usemene pabuipi nabu ku mpenga kua ditu dia mitshi ya mikokuliye.[42]

²⁴Kadi paumvua mikuma ku nsongu ya mitshi, ujuke lukasa, utuadije kubaluisha. Diba adi, meme Maweja-Nangila nempite kumpala kuebe bua kutshimuna bena mvita ba bena Peleshete.

²⁵Davide kuenza amu muvua Maweja-Nangila muambe. Ke pavuaye mutshimune bena Peleshete, kubalondakaja biangatshile ku Ngeba too ne ku tshibuelelu tshia musoku wa Ngezere.[43]