Read Tshiluba 1 Bakalenga 1 Bible Online

1 Bakalenga 1 - Tshiluba bible

1 Bakalenga 1

¹Mukalenga Davide ukavua mumane kukola mukulakaje. Pavuabu bamubuikila bilamba, katshivua umvua luya pambidi to.

²Nanku bena mudimu bende kumuambila ne: — Mukalenga, netuye kukukebela nsongakaji udi mua kukuenzela mudimu, kabidi udi mua kukulama. Nealale pamue nebe, bua wewe kumvua luya.

³Bena mudimu kukeba mu ditunga dijima dia bena Izrayele, nsongakaji muimpe.

⁴Kupetabu nsongakaji muimpe mutambe wa mu musoku wa Shuneme,[1] dina diende Abishayi. Bena mudimu kuya nende kudi mukalenga Davide. Nsongakaji kutuadija kuenzela mukalenga Davide mudimu, umulama. Kadi mukalenga Davide kavua usangila nende to.

⁵Tshikondu atshi Adoniya, muana uvua Davide mulele ne mukajende Agite, uvua nsongalume muimpe mutambe. Adoniya kuakula bu mupinganyi wa mukalenga, wamba ne: “Meme nengikale mukalenga!” Bualu katshia Absalome wafua, Adoniya uvua mushale muanabute wa Davide. Uvua mumane kusumba matempu a mvita ne tubalu.[2] Uvua kabidi ne bena mvita makumi atanu, bavua banyema lubilu kumpala kua matempu ende a mvita.

⁶Kadi tatuende Davide kavua umutandisha bua bionsu abi to. Kawa nansha ukonka Adoniya tshivuaye wenzela bionsu abi to.

⁷Adoniya kutuadija kumyuangana ne Yowabe,[3] muana wa Seruya, mfumu wa bena mvita. Kumvuanganaye kabidi ne mutuangaji Abiyatare. Bonsu babidi kuditua ku tshiende.

⁸Kadi mutuangaji Sadoke, ne Benaya, muana wa Yoyada, nansha muambi Natane, ne Shimeyi, Reyi, kabidi ne bena mvita bavua balame mukalenga Davide, kabavua baditua ku tshia Adoniya to.

⁹Dituku dikuabu, Adoniya kulongolola tshibilu tshinene ku “Dibue-dia-busenu,” divua pabuipi ne mpokolu wa Enrojele.[4] Muaba awu, kulambulabu mikoku, ngombe milume, ne nyama mikuabu ya manyi. Adoniya uvua mubikidishe bana babu, bana ba mukalenga Davide, ku tshibilu atshi. Uvua mubikidishe kabidi bantu babanji bonsu ba mu buloba bua bena Yuda, bavua benzela mukalenga Davide mudimu.

¹⁰Kadi kavua mubikile muambi Natane, nansha Benaya, nansha muanabu Shelomu ne bena mvita bavua balame mukalenga Davide.

¹¹Nanku, muambi Natane kuya kudi Batsheba, mamuende wa Shelomu[5] umuambila ne: — Bushuwa ukadi mumane kumvua ne: Adoniya, muana wa Agite, mmuditeke mu bukalenga. Kadi mukalenga Davide kena mumanye bualu ebu.

¹²Nanku, ndi musue kukupa lungenyi. Wewe muenze tshindi nkuambila, neushale ne muoyi, ne muanebe Shelomu neashale ne muoyi.

¹³Uye kudi mukalenga Davide, umuambile ne: “Mukalenga, uvua mumane kundaya[6] ne: muananyi Shelomu neakupingane mu bukalenga. Neasombe mu nkuasa webe wa bumfumu. Kadi, Adoniya ukadi mukalenga bua tshinyi?”

¹⁴Muambi Natane kuambila Batsheba kabidi ne: — Pawikala mumane kuambila mukalenga bionsu abi, meme kabidi nemfike bua kumujadikila bionsu biwikala mumuambila.

¹⁵Ke Batsheba kuya kua Davide, uvua anu mu nzubu muende, bualu uvua mumane kukulakaja bikole. Abishayi, muena Shuneme, uvua mu nzubu amu, umuenzela mudimu, umuambuluisha.

¹⁶Batsheba kutua binu, kuinyika mpala panshi bikole menemene kumpala kua mukalenga Davide. Mukalenga kumukonka ne: — Tshiudi ujinga ntshinyi?

¹⁷Batsheba kuandamuna ne: — Mukalenga wanyi, uvua mundaya kumpala kua Maweja-Nangila Mvidi Mukulu webe ne: muananyi Shelomu neakupingane mu bukalenga. Neasombe mu nkuasa webe wa bumfumu.

¹⁸Kadi mpindiewu, ndi mumvue ne: Adoniya mmumane kuikala mukalenga, wewe kuyi mumanye.

¹⁹Kabidi, Adoniya mmulongolole tshibilu tshinene. Mu tshibilu atshi, mmulambule ngombe milume, nyama mikuabu ya manyi, ne mikoku ya bungi. Uvua mubikilemu bana bebe ba balume bonsu, mutuangaji Abiyatare, ne Yowabe, mfumu wa bena mvita. Kadi kavua mubikile muanebe Shelomu to.

²⁰Mukalenga wanyi, mpindiewu bena Izrayele bonsu mbindile ne muoyi mujima bua wewe kubambila patoke dina dia muntu udi ukupingana mu bukalenga.

²¹Wewe kuyi muenze nanku, pawikala mumane kufua, meme Batsheba ne muananyi Shelomu nebatukengeshe bu bena tshibawu.

²²Anu Batsheba ujikija kuakula ne mukalenga Davide, muambi Natane kufika ku nzubu wa bukalenga.

²³Kumanyishabu mukalenga difika dia Natane. Ke Natane kubuela, kuinyika mpala panshi kumpala kua mukalenga Davide.

²⁴Natane kuambila mukalenga Davide ne: — Mukalenga wanyi, wewe ke udi muambe bua Adoniya kukupingana mu bukalenga, kusomba mu nkuasa webe wa bumfumu anyi?

²⁵Bualu lelu, Adoniya mmupueke ku “Dibue-dia-busenu,” mmulongolole tshibilu tshinene. Mu tshibilu atshi, mmulambule ngombe ya bungi, nyama mikuabu ya manyi, ne mikoku. Uvua mubikilemu bana bebe ba balume. Uvua mubikile kabidi bamfumu balombodi ba bena mvita, ne mutuangaji Abiyatare. Bantu bonsu aba, badi badia, banuane Adoniya diba ditudi edi, bamba ne: “Mukalenga Adoniya akuate ku mundundu!”

²⁶Kadi kena mubikile mutuangaji Sadoke, nansha Benaya, muana wa Yoyada, nansha muanebe Shelomu, nansha meme mene Natane.

²⁷Nanku mukalenga wanyi, wewe mumane kusungula muntu udi mua kukupingana, kadi kuena mutumanyishe tuetu bena mudimu bebe badi bakuitaba ne muoyi umue bua tshinyi?

²⁸Ke mukalenga Davide kutuma diyi ne: — Numbikidile Batsheba! Padi Batsheba upingana tshiakabidi kumpala kua mukalenga Davide,

²⁹mukalenga kumuambila uditshipa ne: — Bu mudi Maweja-Nangila ne muoyi, uvua mungambuluishe misangu yonsu imvua munkatshi mua makenga makole,

³⁰ndi nditshipa ne: ndi nkumbaja lelu mene bionsu bimvua mumane kukulaya kumpala kua Maweja-Nangila Mvidi Mukulu wa bena Izrayele. Mvua mukulaye ne: “Muanebe Shelomu neampingane mu bukalenga, neasombe mu nkuasa wanyi wa bumfumu.”

³¹Ke Batsheba kutua binu, kuinyika mpala panshi kumpala kua mukalenga Davide, wamba ne: — Mukalenga wanyi Davide akuate ku mundundu kashidi!

³²Ke Davide kubikidisha mutuangaji Sadoke, muambi Natane, ne Benaya, muana wa Yoyada. Bobu bamane kufika kumpala kua mukalenga Davide,

³³kubatuminaye diyi ne: — Nubikile bena mvita bonsu batshidi bangitaba. Nubandishe muananyi Shelomu pa nyama wa mpunde wa bukalenga. Nuye nende ku mpokolu wa ku Ngikone.[7]

³⁴Muaba awu, mutuangaji Sadoke, ne muambi Natane, nebamuele mafuta[8] pa mutu bua kumujidila, bua ashale mukalenga wa bena Izrayele. Pashishe, nuele mpungi, nuele mbila, nuamba ne: “Mukalenga Shelomu akuate ku mundundu.”

³⁵Pashishe nubande, nupingane ku tshimenga, nulonde Shelomu. Shelomu alue kusomba mu nkuasa wanyi wa bukalenga bua kumpinganamu. Bualu Shelomu ke undi musungule bua kuikala mukalenga wa bena Izrayele ne bena Yuda.

³⁶Benaya kuandamuna ne: — Eyowa, mbimpe mukalenga wanyi! Maweja-Nangila Mvidi Mukulu webe udi muakuile mukana muebe.

³⁷Alame Shelomu bu nuwuaye mukulame wewe. Atumbishe bukalenga bua Shelomu, buikale ne lumu bupite buebe wewe Davide!

³⁸Mutuangaji Sadoke, muambi Natane, Benaya, muana wa Yoyada, bena Kreti ne bena Peleti[9] bavua balame mukalenga Davide, kuya kudi Shelomu. Kumubandishabu pa nyama wa mpunde wa mukalenga Davide wa bukalenga, kuya nende ku mpokolu wa ku Ngikone.

³⁹Mutuangaji Sadoke uvua muangate lusengu, luvua mu ntenta wa Maweja-Nangila, luikala ne mafuta a tshijila tente. Kuelaye mafuta awu pa mutu pa Shelomu, bua kumujidila mu bukalenga. Pashishe, kuelabu mpungi. Bantu bonsu bavua muaba awu kuela mbila ne: “Mukalenga Shelomu akuate ku mundundu!”

⁴⁰Nanku bantu bonsu kupingana mu tshimenga, benda balonda Shelomu panyima. Bantu bavua benda, bela nshiba bua kuleja ne: bavua ne disanka dinene. Bibingu biabu bivua bikeba kunyungisha buloba.

⁴¹Adoniya, ne bantu bonsu bavuaye mubikile, bamane kujikija kudia, kumvuabu mitoyi. Yowabe mumane kumvua muadi wa mpungi, kukonkaye ne: — Awu mutoyi mukole udi mu tshimenga ngua tshinyi?

⁴²Anu Yowabe ukonka nanku, Yonatane, muana wa mutuangaji Abiyatare, kufika. Adoniya kuambila Yonatane ne: — Buelaku, bualu udi muntu wa bushuwa, kabidi udi mufike ne malu a disanka.

⁴³Yonatane kuandamuna ne: — Eyi nansha! Ndi mufike bua kunumanyisha ne: mukalenga Davide mmumane kusungula Shelomu bua amupingane mu bukalenga.

⁴⁴Davide mmutume diyi kudi mutuangaji Sadoke, kudi muambi Natane, kudi Benaya, muana wa Yoyada, ne kudi bena Kreti ne bena Peleti badi bamulame, bua baye ne Shelomu. Bantu abu, bavua babandishe Shelomu pa nyama wa mpunde wa bukalenga.

⁴⁵Pashishe, mutuangaji Sadoke, ne muambi Natane, kujidila Shelomu mu bukalenga pabuipi ne mpokolu wa Ngikone. Bantu bonsu mbumuke muaba awu, benda babanda mu tshimenga ne disanka. Bena mu tshimenga bonsu badi batua tshianga. Ke bibingu bionsu binudi bumvue abi.

⁴⁶Shelomu mmumane kusomba mu nkuasa wa bukalenga.

⁴⁷Balombodi ba bukalenga, mbafike kudi mukalenga Davide, bamuela tuasakidila[10] bamuamba ne: “Tudi tujinga bua Mvidi Mukulu webe atumbishe bikole Shelomu. Ikale ne lumu lupite luebe wewe Davide. Mvidi Mukulu atumbishe kabidi bukalenga bua Shelomu buikale ne lumu, bupite buebe wewe Davide.” Nanku, pavua mukalenga Davide mu bulalu buende, kuinyikaye mutu panshi bikole,

⁴⁸utendelela wamba ne: “Ndi ngela Maweja-Nangila Mvidi Mukulu wa bena Izrayele tuasakidila. Yeye ke udi mumpeshe lelu muntu udi mua kumpingana mu bukalenga. Kabidi Maweja-Nangila ke udi mungambuluishe bua meme kumona bionsu ebi.”

⁴⁹Bantu bavua Adoniya mubikile ku-mvua bowa bua meyi onsu awu. Kujukabu kutangalaka, muntu yonsu kuya luende luseke.

⁵⁰Adoniya kuzakala bikole, utshina Shelomu. Kunyemenaye pabuipi ne tshilambuilu,[11] kukuataye ku nsengu yatshi.

⁵¹Muntu mukuabu kuya kumanyisha Shelomu ne: — Adoniya udi ukutshina bikole. Mmunyeme muye pabuipi ne tshilambuilu. Padiye muaba awu, udi wamba ne: “Bua meme kumuka muaba ewu, anu pikala mukalenga Shelomu munjadikile, mundaye ne: tshiena nkushipa to.”

⁵²Shelomu kuandamuna ne: — Pikala Adoniya wenza malu mimpe, tshiena mua kumuenzela bibi to. Kadi pikalaye ne meji mabi, neafue!

⁵³Mukalenga Shelomu kutuma muntu bua kukeba Adoniya, uvua pabuipi ne tshilambuilu. Kumukabu nende muaba awu, kuyaye kutua mpala panshi kumpala kua mukalenga Shelomu. Ke mukalenga Shelomu kumuambila ne: — Udi mua kupingana ku nzubu kuebe!