Read Tshiluba 1 Bakalenga 13 Bible Online

1 Bakalenga 13 - Tshiluba bible

1 Bakalenga 13

¹Nanku, Maweja-Nangila kutuma muambi ufuma mu ditunga dia bena Yuda, uya ku Betele. Muambi awu ufika, kusanganaye Yerobowame osha mulambu pa tshilambuilu.

²Nanku, muambi kuela diyi divua Maweja-Nangila mumuambile, ubenga tshilambuilu atshi, wamba ne: — Tshilambuilu! Tshilambuilu! Teleja tshidi Maweja-Nangila wamba! Nebalele muana wa balume mu nzubu wa Davide. Nebamuinyike ne: Yosiyase.[110] Nanku, Yosiyase nealambule batuangaji badi bakuata mudimu miaba ya kutendelela mvidie, pambidi pebe wewe tshilambuilu, muaba uvuabu boshila milambu. Tshilambuilu, pambidi pebe, neboshilepu too ne mifuba ya bantu!

³Muambi kuamba kabidi ne: — Tshilambuilu etshi netshiupuke, butu bua mafuta budipu nebumate panshi. Nanku, nenujadike ne: Maweja-Nangila ke uvua muakule.

⁴Mukalenga Yerobowame umvua bionsu bivua muambi wamba, muvuaye ubenga tshilambuilu atshi tshivua mu Betele, kuololaye diboku pa mutu pa tshilambuilu, wela diyi ne: — Kuatayi muntu ewu! Kadi, diboku diende kushala ditandabala, diuminyine, kayi ne mushindu wa kuditunya kabidi to.

⁵Anu musangu awu, tshilambuilu kupuka, butu bua mafuta buvua pa mutu patshi, kumata panshi, bilondeshile meyi avua muambi muambe mu dina dia Maweja-Nangila.

⁶Pashishe mukalenga Yerobowame kuambila muambi ne: — Ndi nkusengelela ne: utendakene Maweja-Nangila Mvidi Mukulu webe bua amfuileku luse, ampingajile diboku dianyi edi muadi mua kale. Muambi kulomba Maweja-Nangila, diboku dia mukalenga Yerobowame kupingana muadi mua kale.

⁷Pashishe, mukalenga Yerobowame kuambila muambi awu ne: — Tuye nebe ku nzubu kuanyi bua kudia. Pashishe, nenkupe tshintu tshia kukusankisha natshi.

⁸Kadi muambi kuandamuna mukalenga Yerobowame ne: — Nansha wewe mumpeshe tshia bibidi tshimue tshia bubanji buebe, tshiena mua kuya ku nzubu kuebe to. Muaba ewu, tshiena mua kudia kapese ka diampa, nansha kunua kamata ka mayi to.

⁹Bualu Maweja-Nangila uvua munkandike ne: “Kuena mua kudia, kuena mua kunua. Kabidi bua wewe kupinqana ku nzubu kuebe, uyile mu njila mukuabu. Kupinganyi mu njila uuvua muyile bua kufika ku Betele to.”

¹⁰Nanku, muambi kupingena mu njila mukuabu, kulekela uvuaye muvuile.

¹¹Kadi, mu Betele muvua muambi mukuabu mukulakaje. Bana ba muambi awu,[111] kumuambila bionsu bivuabu benza mu Betele kudi muambi uvua mufume mu ditunga dia bena Yuda, kabidi bionsu bivua muambi awu muambile mukalenga Yerobowame.

¹²Tatuabu, kubakonka ne: — Muambi awu mmuyile njila kaayi? Bana bende kuya, kumona njila uvua muambi awu muyile.

¹³Pashishe tatuabu kubambila ne: — Ntekelayi biseba pa nyama wanyi wa mpunde! Bana bende kusuika biseba pa nyama wa mpunde, tatuabu kubanda pa nyama.

¹⁴Kulondaye njila uvua muambi mukuabu muyile. Kupetaye muambi awu, bualu uvua muikishe muinshi mua mutshi munene. Kumukonkaye ne: — Wewe ke muambi uvua mufume ku ditunga dia bena Yuda anyi? Muambi kuitaba ne: — Eyowa! Mmeme.

¹⁵Muambi wa kumpala kumuambila ne: — Tuye kuanyi bua kudia biakudia.

¹⁶Awu kubenga, wamba ne: — Tshiena mua kupingana nebe mu njila ewu kabidi to. Mu tshimenga atshi, tshiena mua kudia, tshiena mua kunua nebe.

¹⁷Bualu Maweja-Nangila uvua munkandike ne: “Pawafika, kuena mua kudia, kuena mua kunua. Kabidi, bua wewe kupingana ku nzubu kuebe, uyile njila mukuabu. Kupinganyi mu njila uuvua muyile to!”

¹⁸Kadi, muambi mukulumpe kusuminyina bikole, wamba ne: — Meme kabidi ndi muambi bu wewe. Mutumibue wa Mvidi Mukulu uvua muakule nanyi mu dina dia Maweja-Nangila. Uvua muntume bua tupingane nebe ku nzubu kuanyi bua wewe kudia ne kunua. Bulelela, uvua ushima bionsu ebi.

¹⁹Nanku, muambi uvua mufume ku ditunga dia bena Yuda, kupingana ku nzubu kuende bua kudia ne kunua.

²⁰Kadi, pavua bambi abu bonsu babidi ku mesa, Maweja-Nangila kuambila muambi mukulumpe wa mu Betele,

²¹bua kumanyishaye muambi, uvua mufumine mu ditunga dia bena Yuda, ne: — Maweja-Nangila udi wamba ne: “Wewe udi mutombokele Maweja-Nangila, kuena munemeke diyi dia Maweja-Nangila Mvidi Mukulu webe divuaye mukuambile.

²²Udi mupingane muaba ewu bua kudia ne kunua. Kadi, Maweja-Nangila uvua mukukandike ne: kuena mua kudia, kuena mua kunua. Bumuudi muenze nanku, neufue. Tshitalu tshiebe kabena mua kutshijika mu lukita lua bankambua bebe to.”

²³Bambi babidi abu bamane kujikija kudia ne kunua, muambi mukulumpe kusuika biseba pa nyama wa mpunde wa muambi wa ditunga dia bena Yuda.

²⁴Awu kuya. Pavuaye mu njila, kusambakenaye ne nyama wa ntambue. Nyama awu kumushipa. Tshitalu tshia muambi kushala panshi mu njila. Kadi, nyama wa mpunde, ne nyama wa ntambue, kushala mimane, ewu ku luseke lua tshitalu, mukuabu ku luseke.

²⁵Bantu bavua bapita, kumona tshitalu mu njila, ne nyama wa ntambue muimane ku luseke. Kuyabu kuamba bualu ebu mu tshimenga tshia Betele, muaba uvua muambi mukulumpe musombe.

²⁶Muambi mukulumpe awu ke uvua mupingaje mu Betele muambi wa ku ditunga dia bena Yuda ukavua mu njila. Nanku, muambi mukulumpe awu umvua lumu lua lufu luende, kuambaye ne: — Tshitalu atshi, ntshia muambi wa ku ditunga dia bena Yuda. Yeye uvua mutombokele Maweja-Nangila. Maweja-Nangila mmutumine muambi nyama wa ntambue awu, bua kumuluishaye, kumushipa, bu muvua Maweja-Nangila mumane kumulaya.

²⁷Ke muambi mukulumpe kuambila bana bende ba balume ne: — Nunsuikile biseba pa nyama wanyi wa mpunde. Bana bende kumusuikila biseba pa nyama wa mpunde.

²⁸Muambi mukulumpe kuya. Kusanganaye tshitalu mu njila, ne nyama wa ntambue, ne nyama wa mpunde mimane, ewu ku luseke lua tshitalu, mukuabu ku luseke. Kadi, nyama wa ntambue kavua mudie tshitalu atshi to, kavua muluishe nyama wa mpunde to.

²⁹Nanku, muambi mukulumpe kuambula tshitalu tshia muambi mukuabu atshi, kutshiteka pa nyama wa mpunde, kuya natshi mu Betele bua kutshijika, ne kuenza madilu.

³⁰Kujiikaye tshitalu tshia muambi nende atshi mu lukita luende yeye. Bantu bonsu kudila muambi awu, bamba ne: “Eyi, muambi wetu mmufue!”

³¹Bobu bamane kujiika tshitalu, muambi mukulumpe kuambila bana bende ne: — Meme mufue, nunjiike anu mu lukita lutudi bajiike muambi elu. Nuladike tshitalu tshianyi ku luseke lua tshiende.

³²Bualu muambi ewu uvua muambe malu malelela mu dina dia Maweja-Nangila. Uvua mubenge tshilambuilu tshia mu Betele. Uvua mubenge kabidi nzubu yonsu ya kutendelela, idibu base mu bimenga bia Samariya. Nanku, bionsu bivua-ye muambe abi nebienzeke bulelela.

³³Kadi, nansha bobu badimuja mukalenga Yerobowame, kavua mulekele buenzayi to. Uvua anu usungula bantu munkatshi mua bena Izrayele bavua kabayi bena Levi, bua bikale batuangaji miaba ivuabu batendelela mvidie. Muntu yonsu uvua ujinga bua kuikala mutuangaji, bavua anu bamujidila. Nanku uvua ushala mutuangaji mu miaba ivuabu batendelela mvidie.

³⁴Buenzayi bua Yerobowame abu kutampakana kudi bena nzubu wende bonsu. Ke pavua bena nzubu wa Yerobowame bafue, babutuke bonsu pa buloba.