Read Tshiluba 1 Bakalenga 14 Bible Online

1 Bakalenga 14 - Tshiluba bible

1 Bakalenga 14

¹Tshikondu atshi, Abiya, muana wa Yerobowame, kutuadija kusama.

²Ke Yerobowame kuambila mukajende ne: — Udisokoke, uvuale bilamba bia mukaji mukuabu, bua bantu kabamanyi ne: udi mukajanyi to. Pashishe uya ku Silo, kudi muambi Akiya. Bualu muambi Akiya uvua mungambile ne: wewe Yerobowame neushale mukalenga wa bena Izrayele.

³Umutuadile mampa dikumi, mikata, ne buitshi mu mulondu. Uye nabi kudiye. Yeye neakuambile patoke tshienzekela muanetu wa balume udi usama ewu.

⁴Mukaji wa Yerobowame, kuenza bionsu abi. Kuyaye ku Silo. Kufikaye ku nzubu kua muambi Akiya. Muambi Akiya uvua mumane kukola mukulakaje, katshiyi umona kabidi to.

⁵Kadi, Maweja-Nangila uvua mumane kumumanyisha ne: — Mukaji wa Yerobowame neafike. Neikale mudileje bu mukaji mukuabu. Pafikaye, neakukonke bua muanende wa balume udi usama. Nanku, umuambile bionsu bindi mukuambile.

⁶Anu muambi Akiya umvua mikuma mu tshiibi tshiende, kuelaye diyi ne: — Muena kua Yerobowame, buelaku! Kadi, udi mudisokoke, udileja bu mukaji mukuabu bua tshinyi? Nansha wewe muenze nanku, ndi nkuambila bualu bua dibungama.

⁷Pingana kudi Yerobowame, umuambile ne: Maweja-Nangila wa bena Izrayele udi wamba ne: “Wewe udi bu bena Izrayele bonsu. Kadi meme kukusungula munkatshi mua bena Izrayele bua kuikala mukalenga wa bantu banyi bena Izrayele.

⁸Meme kunyenga bukalenga kudi bena nzubu wa Davide, bua kukupabu wewe. Kadi, wewe kuena muenze muvua muntu wanyi Davide wenza to. Davide uvua utumikila meyi anyi. Uvua ungenzela mudimu ne muoyi mujima, kayi umfikisha munda to.

⁹Wewe udi muenze bibi, mupite bonsu bavua bakudianjidile mu bukalenga. Udi mumfikishe munda, bualu udi musonge mpingu ya mvidie ya bisamba bikuabu. Ke paudi mumbenge meme Maweja-Nangila.

¹⁰Nanku, nennyoke bena nzubu webe. Nembutule bena diku diebe bonsu: bana ne bantu bakulumpe. Nembutule bena nzubu bebe bonsu, anu bu mudibu bimansha bintu ku dyala ne lukombu.[112]

¹¹Pikala muntu wa mu nzubu muebe mufuile mu tshimenga, nebadie tshitalu tshiende kudi mbua. Pikalaye mufuile mu tshisuku, nebatshizokole kudi nyunyi ya mikanku.” Ke mudi Maweja-Nangila wamba nanku.

¹²Muambi Akiya kumuambila kabidi ne: — Nanku, wewe muena kua Yerobowame, pingana ku nzubu kuebe. Kadi, anu pawafika mu tshimenga, diba adi, muanebe neashishe kufua.

¹³Bena Izrayele bonsu nebamujiike, nebenze madilu ende. Ku ndelanganyi yonsu ya Yerobowame, anu muana awu nkayende nebamujiike mu lukita. Bualu mu nzubu wa Yerobowame muonsu, Maweja-Nangila Mvidi Mukulu wa bena Izrayele, mmusanganemu anu muana awu umusankisha.

¹⁴Pashishe, Maweja-Nangila, neasungule mukalenga mupiamupia wa bena Izrayele. Mukalenga awu, neabutule bena diku dia Yerobowame. (Ndi ngamba ne: bualu ebu nebuenzeke anu lelu![113])

¹⁵Pashishe Maweja-Nangila neanyoke bena Izrayele. Nebazakale bu bisosa bidi ku muelelu wa mayi. Maweja-Nangila neumushe bena Izrayele mu buloba ebu buimpe buvuaye mumane kupesha bankambua babu. Neabatangalaje dishiya dia musulu wa Perate wa bena Babilone. Bena Izrayele nebakenge nenku, bualu bavua benza makunji a kutendelela mvidie bua kufikisha Maweja-Nangila munda.

¹⁶Maweja-Nangila nealekele bena Izrayele, bualu Yerobowame mmuenze bibi, kabidi mmufikishe bena Izrayele ku dienza bibi.

¹⁷Muena kua Yerobowame kupingana mu tshimenga tshia Tirsa. Ufika anu ku nzubu kuende, muana kufua.

¹⁸Kumujiikabu. Bena Izrayele bonsu kuenza madilu a muana awu, bu muvua Akiya muambe mu dina dia Maweja-Nangila.

¹⁹Malu makuabu a Yerobowame adi mafunda mu mukanda udibu babikila ne: Malu adi bakalenga ba bena Izrayele benza. Mu mukanda awu, mbafundemu mvita idi Yerobowame muluangane, ne mushindu uvuaye muenze mudimu wa bukalenga.

²⁰Yerobowame mumane kushala mu bukalenga bidimu makumi abidi ne bibidi, kufuaye. Muanende wa balume Nadabe kumupingana mu bukalenga.

²¹Robowame, muana uvua Shelomu mulele ne mukaji Naama wa bena Amone, uvua mubuele mu bukalenga bua bena Yuda, muikala ne bidimu makumi anayi ne tshimue. Kushalaye mu bukalenga mu Yerushalayime bidimu dikumi ne muanda mutekete. Tshimenga atshi, ke tshivua Maweja-Nangila musungule mu buloba bujima bua kudilejamu kudi bantu bende.

²²Bena Yuda kuenza bidi Maweja-Nangila ubenga. Maweja-Nangila uvua ne tshiji, bualu bavua benza malu mapite bubi ku avuabu benza kudi bankambua babu.

²³Bena Yuda kabidi bavua bibake miaba ya kutendelela mvidie, bibake bibumba bia mabue, bibake kabidi makunji a kutendelela mvidie ku nsongu ya mikuna yonsu, ne muinshi mua mitshi ivua ne dileji dia bungi.[114]

²⁴Kabidi, balume ne bakaji ba mu ditunga adi dia bena Yuda bavua benda tshiendenda mu nzubu ya mvidie yabu.[115] Mu tshikosu, bena Yuda bavua benza malu mabi onsu, avuabu benza kudi bena bisamba bivua Maweja-Nangila muipate, bua bashile bena Izrayele muaba.

²⁵Mu tshidimu tshitanu tshivua Robowame mu bukalenga, mukalenga Shishake wa bena Ejipitu kufika bua kuluisha bena mu Yerushalayime.

²⁶Kupawulabu bintu bimpe bionsu bivua mu nzubu wa Maweja-Nangila, ne bivua mu nzubu wa bukalenga. Kuangataye bintu abi bionsu, nangananga ngabu ya tshiamu tshia mpawungi ivua Shelomu muenze.[116]

²⁷Pashishe, mukalenga Robowame kuenzeja ngabu mikuabu ya tshiamu tshikunze ya kupingaja pa kuabu bangata ayi. Ngabu ayi, Robowame kuyipesha bamfumu ba bena mvita, bavua balame biibi bia nzubu wa bukalenga.

²⁸Nanku, misangu yonsu ivua mukalenga Robowame ubuela mu nzubu wa Maweja-Nangila, bena mvita bavua balame ku biibi abi, bavua bambula ngabu ayi, pashishe, bayipingaja anu muaba uvuabu basombe bua kulama biibi.

²⁹Malu makuabu a Robowame mbaafunde mu mukanda udibu babikila ne: Malu adi bakalenga ba bena Yuda benza.

³⁰Robowame uvua uluangana mvita ne Yerobowame misangu yonsu.

³¹Robowame mumane kufua, kumujiikabu mu lukita lua bena diku diende, luvua mu Tshimenga tshia Davide. Mamuende wa Robowame uvua muena Amone, dina diende Naama. Abiyame,[117] muana wa balume wa Robowame, kumupingana mu bukalenga.