Read Tshiluba 1 Bakalenga 17 Bible Online

1 Bakalenga 17 - Tshiluba bible

1 Bakalenga 17

¹Muambi Eliya uvua mu musoku wa Tishebe, mu ditunga dia Ngilaade. Kuambilaye mukalenga Akabe ne: — Bu mudi Maweja-Nangila ne muoyi, Mvidi Mukulu wa bena Izrayele undi ngenzela mudimu, ndi ngamba ne: “Bidimu bidi kumpala ebi, lumuma kaluena mua kumata kabidi, mvula kena mua kuloka, amu meme mumulombe.[134]”

²Pashishe, Maweja-Nangila kuambila muambi ne:

³— Umuka muaba ewu, uye luseke ludi diba dipatukila. Uye kusomba pabuipi ne musulu wa Kerite, luseke ludi diba dipatukila lua Yardene.

⁴Muaba awu, newikale unua mayi a musulu. Nentume kabidi nyunyi ya bikololu bua kukutuadila biakudia.

⁵Eliya kuenza bionsu bivua Maweja-Nangila muambe. Kuyaye kusomba pabuipi ne musulu wa Kerite.

⁶Nyunyi ya bikololu ivua imutuadila mampa ne munyinyi matuku onsu dinda ne dilolu. Uvua unua anu mayi a musulu awu.

⁷Matuku makuabu mamane kupita, musulu kuuma, bualu mwla katshivua uloka mu ditunga adi to.

⁸Ke Maweja-Nangila kuambila muambi Eliya ne:

⁹— Juka, uye kusomba mu tshimenga tshia Sarepta, pabuipi ne tshimenga tshia Sidone. Meme ndi mumane kutuma diyi bua mukaji mukamba wa mu tshimenga atshi, kukupeshaye biakudia.[135]

¹⁰Eliya kuya mu Sarepta. Yeye mumane kufika ku tshibuelelu tshia tshimenga, kumonaye mukaji mukamba wangula nkunyi. Eliya kumubikila, umuambila ne: — Umpeshe mayi makese a kunua bu wewe musue.

¹¹Mukaji kuya bua kumuangatshila mayi. Kadi, muambi Eliya kumubikila kabidi, umuambila ne: — Untuadileku ne tshipese tshia diampa.

¹²Mukaji kuandamuna ne: — Bu mudi Maweja-Nangila Mvidi Mukulu webe ne muoyi, ndi nkujadikila ne: tshiena ne diampa to. Ndi mushale anu ne dianza dia bukula mu mulondu, ne mafuta makese mu kasu. Ndi mufike muaba ewu bua kuangula tukunyi, bua kuya kulamba biakudia bidi bishala abi, bua meme kudia ne muananyi wa balume. Patuadia biakudia abi netufue, bualu katuena ne bikuabu to.

¹³Muambi Eliya kumuambila ne: — Kutshinyi to. Uye kuenza bu muudi wamba amu. Kadi, bangabanga ungenzele meme diampa dikese, umpeshe. Pashishe, wenza diampa diebe wewe ne dia muanebe.

¹⁴Bualu Maweja-Nangila Mvidi Mukulu wa bena Izrayele udi wamba ne: “Bukula kabuena bujika mu mulondu, mafuta kaena ajika mu kasu,” too ne padi Maweja-Nangila ulokesha mvula pa buloba.

¹⁵Mukaji kuya kuenza muvua muambi Eliya mumuambile. Kupetabu biakudia bikumbane bua kudiabu matuku a bungi kudi mukaji awu, muanende wa balume, ne muambi Eliya.

¹⁶Bukula kabuvua bujika mu mulondu, mafuta kaavua majika mu kasu to, anu muvua Maweja-Nangila muambile muambi Eliya.

¹⁷Matuku makuabu mamane kupita, muana wa mukaji mukamba uvua muakidile muambi Eliya ku nzubu kuende awu, kutuadija kusama. Disama kukola, muana kufua.

¹⁸Mamuende wa muana kukonka muambi Eliya ne: — Muambi wa Mvidi Mukulu, udi mungenzele nenku bua tshinyi? Udi mufike muaba ewu bua wewe kuvuluija Maweja-Nangila buenzayi bundi muenze, bua Maweja-Nangila kushipa muananyi anyi?

¹⁹Muambi kumulomba ne: — Mpeshaku muanebe awu! Mukaji uvua muambule muanende awu. Muambi Eliya kumuangata. Kubandaye nende mu nzubu wa tshilala kulu, mu tshibambalu[136] tshivuaye yeye muambi Eliya ulala. Kuladikaye muana pa bulalu abu.

²⁰Pashishe, muambi Eliya kutendelela Maweja-Nangila, wamba ne: — Maweja-Nangila Mvidi Mukulu wanyi, mukaji mukamba ewu, uvua mungakidile ku nzubu kuende. Kadi, udi ufuisha muanende wa balume, bua kumukengesha nenku bua tshinyi?

²¹Ke muambi Eliya kudiolola pambidi pa muana misangu isatu, utendelela Maweja-Nangila, wamba ne: — Maweja-Nangila Mvidi Mukulu wanyi, ndi nkusengelela ne: ubishe muana ewu ku lufu.

²²Maweja-Nangila kuitaba dilomba dia muambi Eliya. Kubishaye muana awu ku lufu. Muana kutuadija kupuyakana.

²³Muambi Eliya kuambula muana. Kutulukaye nende panshi. Kumupingajaye kudi mamuende, umuambila ne: — Tangila muanebe, udi ne muoyi!

²⁴Mukaji kumuambila ne: — Mpindiewu ndi njadika ne: wewe udi muambi wa Mvidi Mukulu, kabidi ne: udi wakula mu dina dia Maweja-Nangila bulelela.