Read Tshiluba 1 Bakalenga 18 Bible Online

1 Bakalenga 18 - Tshiluba bible

1 Bakalenga 18

¹Matuku a bungi mamane kupita, munkatshi mua tshidimu tshisatu tshia munanga, Maweja-Nangila kuambila muambi Eliya ne: — Uye kudi mukalenga Akabe, umuambila ne: Meme Maweja-Nangila nendokeshe mvula pa buloba buvua bumisha kudi munanga.

²Muambi Eliya kuya kumonangana ne mukalenga Akabe. Mu tshimenga tshia Samariya tshiyole tshia nzala tshivua tshipite bukole.

³Akabe uvua mubikile Obadya, mulombodi wa nzubu wa bukalenga. Obadya uvua muitabe Maweja-Nangila muende muonsu.

⁴Pavua mukalenga mukaji Yezabele mushipeshe bambi ba Maweja-Nangila, Obadya uvua mupandishe bambi lukama, mubasokoke mu mbuebue: emu makumi atanu, emu makumi atanu. Mu mbuebue amu, Obadya uvua ubabadila biakudia ne mayi a kunua.

⁵Mukalenga Akabe kuambila Obadya ne: — Ufike, tuye mu ditunga dijima, bendakane ku mpokolu ya mayi yonsu ne ku misulu yonsu, ne tudi mua kupeta bisosa bia kudisha nyama ya tubalu ne mpunde. Nanku, katuakuikala ne tshilumbu tshia kushipa nyama yetu to.

⁶Kusanganabu maloba a mu ditunga adi, avua yonsu wa kudibu ne bua kuya kukeba bisosa bia nyama. Akabe kuya luseke lumue, Obadya ku luseke lukuabu.

⁷Obadya ufika mu njila, diakamue kusambakenaye ne muambi Eliya. Obadya kumanya muambi Eliya. Kuinyikaye mutu panshi bikole kumpala kua muambi Eliya, umukonka ne: — Ewu mmukalenga wanyi Eliya anyi?

⁸Muambi Eliya kuandamuna ne: — Eyowa mmeme. Uye kuambila mfumuebe Akabe ne: “Muambi Eliya wafiki.”

⁹Obadya kukonka muambi Eliya ne: — Paudi umfila mu bianza bia Akabe, ndi mukuenzele bualu bubi kaayi? Udi untuma bua meme kufua!

¹⁰Bu mudi Maweja-Nangila Mvidi Mukulu webe ne muoyi, ndi nkujadikila ne: mfumuanyi Akabe mmutume bantu mu bisamba bionsu ne mu makalenga onsu bua kukukebabu. Pavua bamfumu ba matunga bamba ne: “Muambi Eliya kena kuetu to,” bavua ne bua kuditshipa bua kujadika ne: kabena bakumona to.

¹¹Mpindiewu udi untuma bua meme kuya kumanyisha mfumuanyi Akabe ne: “Muambi wafiki!”

¹²Kadi, patuikala bashiyangana nebe, Mueyelu wa Maweja-Nangila neuye nebe muaba mukuabu undi tshiyi mumanye. Pangikala mumane kuambila Akabe ne: muambi Eliya wafiki, pikalabu kabayi bakumona, nebanshipe! Meme Obadya ndi ngitaba Maweja-Nangila muanyi muonsu, biangatshile ku buana buanyi.

¹³Mukalenga wanyi Eliya, kabena bakuambila tshimvua muenze pavua mukalenga mukaji Yezabele ushipesha bambi ba Maweja-Nangila anyi? Kabena bakuambila mumvua musokoke bambi lukama mu mbuebue: emu makumi atanu, emu makumi atanu, mbapesha biakudia ne mayi a kunua anyi?

¹⁴Mpindiewu, udi untuma bua meme kuya kumanyisha mfumuanyi Akabe ne: “Muambi Eliya wafiki!” Yeye neanshipe.

¹⁵Muambi Eliya kuandamuna ne: — Bu mudi Maweja-Nangila ne muoyi, Maweja-Nangila wa bukole buonsu, undi nkuatshila mudimu, ndi nkujadikila ne: lelu netumonangane ne Akabe.

¹⁶Nanku, Obadya kuya kuambila Akabe bionsu abi. Akabe kuya bua kusambakena ne muambi Eliya.

¹⁷Anu Akabe umona muambi Eliya, kumuambilaye ne: — Wewe ke udi ukengesha bena Izrayele!

¹⁸Muambi Eliya kuandamuna ne: — Meme tshiena nkengesha bena Izrayele to, kadi anu wewe ne bena diku diebe. Bualu nudi babenga kutumikila mikenji ya Maweja-Nangila. Nudi nutendelela mvidie Baale.

¹⁹Kadi, mpindiewu, utume bantu, basangishe bena Izrayele bonsu, bafike muaba undi ewu ku mukuna wa Karmele. Ubikidishe bambi ba mvidie Baale nkama inayi ne makumi atanu, ne bambi ba mvidie mukaji Ashera nkama inayi, badi mukalenga mukaji Yezabele udisha.

²⁰Akabe kubikidisha bisamba bionsu bia bena Izrayele, ne bambi bonsu, ku mukuna wa Karmele. Bantu bonsu bamane kubilangana,

²¹Eliya kusemena kumpala kua bena Izrayele bonsu, ubakonka ne: — Nenulekele kutendelela bakalenga babidi, dikasa mu mayi, dikuabu ku mukuna, diba kaayi? Padi Maweja-Nangila muikale Mvidi Mukulu bulelela, nutendelele Maweja-Nangila! Kadi, padi Baale muikale Mvidi Mukulu bulelela, nutendelele Baale! Muntu nansha umue kena muandamune to.

²²Ke Eliya kubambila kabidi ne: — Meme ndi mushale muambi wa Maweja-Nangila anu nkayanyi. Kadi, bambi ba Baale badi nkama inayi ne makumi atanu.

²³Batupeshe ngombe milume ibidi. Bambi ba Baale nebasungule ngombe umue, bamusaye, bamuteke pa nkunyi bua kumulambula. Kadi, kabatemeshi kapia to. Meme nensaye ngombe mukuabu, mmuteke pa nkunyi. Tshiena ntemesha kapia to.

²⁴Bambi ba Baale nebalombe mvidie wabu, meme nendombe Maweja-Nangila. Nanku, Mvidi Mukulu witaba ku malomba, watemesha kapia, asangane Mvidi Mukulu mulelela kuenza anyi? Bantu bonsu ne: — Enzee.

²⁵Ke muambi Eliya kuambila bambi ba Baale ne: — Bu munudi ba bungi, nudianjile kusungula ngombe, numusaye. Pashishe, nulombe mvidie wenu. Kadi kanutemeshi kapia to.

²⁶Bambi ba Baale, kuangata ngombe uvuabu babapesha. Kulongololabu mulambu. Pashishe, kulombabu kapia kudi Baale biangatshile ku dinda too ne munda munya, bamba ne: “Mvidie Baale wetu utuitabe!” Bavua baja maja, banyunguluke tshilambuilu tshivuabu bibake. Kadi, mvidie Baale kena mubandamune diyi nansha dimue to.

²⁷Munda munya, muambi Eliya kutuadija kubaseka, wamba ne: — Nukoleshe diyi! Bualu yeye mvidie, udi mua kuikala ne mudimu wa bungi. Udi mua kuikala muye kusesuka. Udi mua kuikala muye ku luendu. Misangu mikuabu udi mua kuikala mulale. Mbimpe kumubisha.

²⁸Bambi ba Baale kuela mbila bikole bipite, bilondeshile tshilele tshiabu, kuditapabu miela ne mafuma. Mashi kupatuka pambidi pabu.

²⁹Diba dia munda munya dimane kupita, kubikilabu kabidi mvidie Baale bikole, bamutendakena too ne ku dilolu diba didibu balambula. Kadi, mvidie Baale kena mubandamune diyi nansha dimue: kena mubambile bualu, kena mubaleje nansha tshimanyinu to.

³⁰Ke muambi Eliya kubikila bena Izrayele bonsu bua basemene pabuipi nende. Bena Izrayele bamane kusemena, muambi Eliya kutuadija kulongolola tshilambuilu tshia Maweja-Nangila tshivua tshinyanguke.

³¹Kuangataye mabue dikumi ne abidi, bilondeshile bisamba dikumi ne bibidi bia ndelanganyi ya Yakobe. (Yakobe ewu ke uvua Maweja-Nangila muambile ne: “Kutuadija mpindiewu, nebakubikile ne: Izrayele.[137]”)

³²Nanku, muambi Eliya kuibakulula tshilambuilu tshia Maweja-Nangila ne mabue awu. Kuimbaye mukidi munyungulule tshilambuilu tshionsu. Mukidi awu uvua mukumbane mua kuelamu mayi litre makumi asatu.

³³Muambi Eliya kulongolola nkunyi, kuyiteka pa tshilambuilu. Kusayaye ngombe, kuteka munyinyi pa nkunyi apu.

³⁴Pashishe, kutumaye diyi, wambila bantu bavua muaba awu, ne: — Elayi mayi mu milondu inayi tente. Nuele mayi awu pa mulambu ne pa nkunyi. Kuenzabu nanku.[138] Muambi Eliya kubambila kabidi ne: — Enzayi nanku musangu muibidi. Kuambaye kabidi ne: — Enzayi kabidi musangu muisatu. Kuenzabu nanku.

³⁵Mayi kuwula mukidi tente, kupuekawu anyunguluka tshilambuilu.

³⁶Dilolu, diba dia kulambula Maweja-Nangila dikumbane, muambi Eliya kusemena pabuipi ne tshilambuilu, kuamba ne: — Maweja-Nangila Mvidi Mukulu wa Abrahame, wa Izake ne wa Yakobe, lelu uleje bantu ne: udi Mvidi Mukulu wabena Izrayele, bajadike kabidi ne: meme ndi muntu webe, bionsu bindi ngenza ebi, ndi mbienza anu ku diyi diebe.

³⁷Maweja-Nangila, ungitabe. Ungitabe, bua bantu bamanye ne: wewe Maweja-Nangila ke Mvidi Mukulu mulelela. Nanku, bena Izrayele nebakuitabe kabidi, bu muvuabu bakuitabe kale.

³⁸Maweja-Nangila kutuma kapia, kuoshaku mulambu, nkunyi, mabue ne buloba. Kukamishaku mayi onsu avua mu mikidi.

³⁹Bena Izrayele bamone nanku, kutuabu mpala panshi bonsu. Pashishe, kutuadijabu kuela mbila ne: “Anu Maweja-Nangila ke Mvidi Mukulu mulelela. Anu Maweja-Nangila ke Mvidi Mukulu mulelela!”

⁴⁰Muambi Eliya kubambila ne: — Kuatayi bambi ba Baale. Muntu nansha umue wa kudibu kanyemi to. Kukuatabu bambi ba Baale bonsu. Muambi Eliya kupueka nabu ku muelelu wa musulu wa Kishone, kubakosaye mitu.[139]

⁴¹Ke muambi Eliya kuambila Akabe ne: — Uye, udie, unue,[140] bualu ndi mumvue mvula ukungula.

⁴²Akabe kuya, kudia, kunua. Muambi Eliya kuya ku lusongu lua mukuna wa Karmele. Kuinamayemu panshi bikole, mutue mpala pankatshi pa binu biende.

⁴³Pashishe, kuambilaye muena mudimu wende ne: — Uye kutangila luseke lua ku mayi manene. Muena mudimu kuya kutangila. Upingana, kuambilaye muambi Eliya ne: — Kakuena tshintu to. Muambi Eliya, kumutuma misangu muanda mutekete bua kutangila.

⁴⁴Kadi, musangu wa muanda mutekete, muena mudimu kumuambila ne: — Divuba dikese didi dibanda pa mayi manene, kadiena dipite tshianza ku bunene to. Ke muambi Eliya kuambila muena mudimu ne: — Uye kuambila Akabe, asuike nyama yende ya tubalu ku matempu apueke, mvula kayi muanji kumupumbisha.

⁴⁵Tshitupa tshikese, diulu kufika ne mavuba avua alua ne lupepela. Mvula mukole kutuadija kuloka. Ke mukalenga Akabe pa ditempu diende dia mvita, kupingana mu tshimenga tshia Yizreyele.[141]

⁴⁶Muambi kusuika mukaba wende mu tshimonu bua kuya. Maweja-Nangila kumupa bukole bua bungi. Kunyemaye lubilu kumpala kua ditempu dia Akabe too ne pafikibu mu Yizreyele.