Read Tshiluba 1 Bakalenga 21 Bible Online

1 Bakalenga 21 - Tshiluba bible

1 Bakalenga 21

¹Malu awu mamane kujika, bualu bukuabu kuenzeka mu tshimenga tshia Yizreyele, muvua muntu mukuabu dina diende Nabote. Uvua ne budimi bua mvinyo mu tshimenga atshi, pabuipi ne nzubu kampande wa bukalenga wa Akabe, mukalenga wa Samariya.

²Dituku dikuabu, mukalenga Akabe kuambila Nabote ne: — Umpe budimi buebe bua mvinyo ebu, bua meme kuenzamu budimi bua biseki. Bualu budimi ebu budi pabuipi ne nzubu wanyi wa bukalenga. Nenkupe budimi bukuabu bua mvinyo buimpe bupite buebe ebu. Anyi ndi mua kukusumba budimi ebu, pawikala musue.

³Kadi, Nabote kuandamuna ne: — Maweja-Nangila kena mua kuanyisha bua meme kukupa budimi bua mvinyo bundi mupiane kudi bankambua banyi[155] to.

⁴Mukalenga Akabe kupingana ku nzubu kuende, mubungame, mufike munda bua diandamuna dia Nabote adi. Akabe kulala pa bulalu, mutangile ku tshimana, kayi mua kudia kantu nansha kamue.

⁵Mukajende Yezabele ubuela, kumusangana mulale, kumukonka ne: — Udi mubinduluke nenku bua tshinyi? Kuena musue kudia biakudia munyi?

⁶Mukalenga Akabe kuandamuna ne: — Mvua mumonangane ne Nabote, muena mu tshimenga tshia Yizreyele. Meme kumulomba ne: “Umpe budimi buebe bua mvinyo. Ndi musue kubusumba. Anyi pawikala musue, tudi mua kushintakaja, meme kukupa budimi bukuabu.” Kadi, Nabote mmungandamune ne: “Tshiena mua kukupa budimi buanyi bua mvinyo to.”

⁷Yezabele kuandamuna ne: — Bulelela! Kuena muvuluke ne: wewe udi mukalenga wa bena Izrayele anyi? Juka! Udie biakudia, usanke! Meme Yezabele ndi nkupesha budimi bua mvinyo bua Nabote wa Yizreyele.

⁸Yezabele kufunda mikanda mu dina dia mukalenga Akabe. Kutumaye mikanda ayi, mitue tshitampi tshia bukalenga, kudi bakulu ne balombodi ba tshimenga tshia Yizreyele, muaba uvua Nabote musombe.

⁹Mu mikanda ayi, Yezabele uvua mufunde ne: ‘Mubikidishe bantu bonsu, nubafundile dituku dia kujilabu biakudia. Nuambile Nabote bua alombole tshisangilu atshi.

¹⁰Muaba udi Nabote muimanyine awu, nushikikepu bantu babidi bena dikamakama, bikale balulamangane ne Nabote. Bantu abu, nebamushiminyine ne: Nabote udi usendeka Mvidi Mukulu, usendeka ne mukalenga Akabe. Pashishe, nupatuke nende mu tshimenga, numuase mabue, numushipe.[156]”

¹¹Bakulu ne balombodi ba tshimenga tshia Nabote, kuenza bionsu bivua Yezabele mufunde mu mikanda yende.

¹²Kubikidishabu bantu, kubafundila dituku dia kujila biakudia. Kuambilabu Nabote bua alombole tshisangilu atshi.

¹³Bantu babidi kusomba, balulamangane ne Nabote. Bantu abu, kumushiminyina malu kumpala kua bantu bonsu, bamba ne: — Nabote udi usendeka Mvidi Mukulu, usendeka ne mukalenga Akabe kabidi! Diakamue, kupatukabu ne Nabote mu tshimenga, kumuasa mabue, kumushipa.

¹⁴Ke balombodi ba tshimenga kutuma bantu kudi Yezabele bua kumumanyisha ne: mbamane kuasa Nabote mabue, bamushipa.

¹⁵Yezabele umvua bualu abu, kuyaye kuambila mukalenga Akabe ne: — Uye kuangata budimi bua mvinyo, buvua Nabote, muena mu tshimenga tshia Yizreyele, ubenga mua kukusumbisha. Bualu mmumane kufua.

¹⁶Mukalenga Akabe umvua nanku, kuyaye kuangata budimi bua mvinyo bua Nabote.

¹⁷Pashishe, Maweja-Nangila kuambila muambi Eliya wa ku Tishebe ne:

¹⁸— Uye kudi Akabe, mukalenga wa bena Izrayele, udi musombe mu Samariya. Neumusangane mu budimi bua mvinyo bua Nabote, bualu mmuye bua kuangata budimi abu.

¹⁹Uye, umuambile ne: Maweja-Nangila udi wamba ne: “Udi mushipe muntu. Mpindiewu udi mufike bua kuangata bintu biende!” Maweja-Nangila udi wamba kabidi ne: “Muaba udi mbua milake mashi a Nabote, neyilakilepu ne mashi ebe kabidi.”

²⁰Eliya kuya kuambila Akabe bionsu abi. Akabe kumuambila ne: — Wewe muluishi wanyi, wapinganyi kabidi kundi! Eliya kuitaba ne: — Eyowa, ngapinganyi kabidi kuudi, bualu wewe udi usanka bua kuenza bidi Maweja-Nangila ubenga.

²¹Maweja-Nangila udi wamba ne: “Nenkutumine makenga makole. Nenkubutule wewe ne bantu bonsu ba mu diku diebe, bakulumpe ne bana batekete.

²²Nembutule bena nzubu webe, bu mumvua mubutule bena nzubu wa Yerobowame, muana wa Nebate, ne bena nzubu wa Basha, muana wa Akiya. Bualu wewe Akabe udi mumfikishe munda bikole. Kabidi udi mufikishe bena Izrayele ku dienza bibi.”

²³Nanku, Maweja-Nangila udi wamba kabidi bua Yezabele ne: “Mbua neyidile Yezabele pabuipi ne bimana bia Yizreyele.[157]”

²⁴Mukalenga Akabe, muena nzubu wa mu diku diebe udi ufuila mu tshimenga, nebamudie kudi mbua. Udi ufuila mu tshisuku, nebamuzokole kudi nyunyi ya mikanku.

²⁵Bulelela, katshia kabena banji kumona muntu usanka bua kuenza bidi Maweja-Nangila ubenga, bu mudi mukalenga Akabe usanka bua kuenza nanku. Kadi badi bamuenzeja bionsu ebi kudi mukajende Yezabele.

²⁶Mukalenga Akabe udi mutambe kuenza bibi, nangananga padiye utendelela mvidie bu muvua bena Amore batendelela. Bena Amore ke bavua Maweja-Nangila muipate mu ditunga bua kushilabu bena Izrayele muaba.

²⁷Mukalenga Akabe umvua malu onsu avua Maweja-Nangila mumuambile mukana mua muambi, kunyingalalaye bikole. Kupandaye bilamba biende. Kuvualaye anu tshilamba tshikayabale nkayatshi pambidi. Kujilaye biakudia. Uvua anu ne tshilamba atshi tshikayabale too ne pa kulala. Uvua wenda anu bitekete.

²⁸Nanku, Maweja-Nangila kuambila Eliya, muena Tishebe ne:

²⁹— Udi mumone mudi Akabe mudipuekeshe kumpala kuanyi. Bu mudiye mudipuekeshe nanku, tshiena nkengesha bena diku diende patshidiye mu bukalenga to. Nembakengeshe anu pabuela muanende mu bukalenga.