Read Tshiluba 1 Bakalenga 4 Bible Online

1 Bakalenga 4 - Tshiluba bible

1 Bakalenga 4

¹Shelomu uvua mukalenga wa bisamba bia bena Izrayele.

²Mena a bamfumu balombodi[24] ba midimu ya mukalenga Shelomu adi nunku: Azariya, muana wa mutuangaji Sadoke;

³Elikorefe ne Akiya, bana ba Shisha, bafundi; Yosafate, muana wa Akilude, ke uvua mukalenga utuma ne mikenji;

⁴Benaya, muana wa Yoyada, uvua mfumu mulombodi wa bena mvita. Sadoke ne Abiyatare, batuangaji.

⁵Azariya, muana wa Natane, uvua mfumu wa balombodi ba mu bukalenga; Zabude, muana wa Natane, uvua mutuangaji, kabidi mufidi wa ngenyi wa mukalenga Shelomu.

⁶Akishare, uvua mfumu wa bena mudimu ba mu nzubu wa bukalenga; Adonirame, muana wa Abda, uvua mulombodi wa midimu ya kulongolola ditunga.

⁷Mukalenga Shelomu uvua kabidi ne balombodi dikumi ne babidi, bavua basombe miaba mishilangane mu ditunga dia bena Izrayele, bua bikale batuma biakudia bia mukalenga, ne bia bantu bonsu bavuaye nabu ku nzubu wa bukalenga. Nanku, mfumu mulombodi yonsu, uvua utuma biakudia ngondu mujima ku tshidimu ku tshidimu.

⁸Mena a bamfumu balombodi abu adi nunku[25]: muana wa Ure, uvua mu buloba bua mikuna bua Efrayime;

⁹Muana wa Dekere, uvua mu buloba bua Makase, Shalbime, Beteshemeshe ne Elone-Betanane;

¹⁰muana wa Eshede, uvua mu tshimenga tshia Arubote, ulombola buloba bua Soko, ne ditunga dijima dia Efere;

¹¹muana wa Abinadabe, uvua ulombola buloba bujima bua tukuna tua Dore (uvua musele Tafate, muana wa mukalenga Shelomu);

¹²Baana, muana wa Akilude, uvua ulombola buloba bua bimenga bia Tanake ne Megido, ne buloba bujima bua Betesheyane (Buloba bua Betesheyane budi bufika ku Sartane, kuinshi kua Yizreyele. Buloba ebu mbualabale ku Betesheyane too ne ku Abele-Mekola, too ne dishiya dia Yokneyame).

¹³Muana wa Ngebere, ku Ramote, mu Ngilaade, uvua ulombola buloba bua misoku ya Yayire, muana wa Menashe, mu Ngilaade, ne buloba bua Argobe mu mpata ya Bashane. Buloba ebu bujima, buvua ne bimenga makumi asambombu, bivuabu bakolesha ne bimana, kabidi ne biibi bivuabu bakanga ne mulonda wa tshiamu tshikunze.

¹⁴Akinadabe, muana wa Ido, uvua ulombola buloba bua Makanayime.

¹⁵Akimase, uvua ulombola buloba bua bena Naftali (Yeye kabidi uvua musele muana wa mukalenga Shelomu, diende Basmate).

¹⁶Baana, muana wa Ushayi, uvua ulombola buloba bua bena Ashera, ne bua Beyalote.

¹⁷Yosafate, muana wa Paruwa, uvua ulombola buloba bua bena Isakare.

¹⁸Shimeyi, muana wa Ela, uvua ulombola buloba bua bena Binyamine.

¹⁹Ngebere, muana wa Uri, uvua ulombola ditunga dia Ngilaade, ditunga dia Sihone, mukalenga wa bena Amone, ne dia Oje, mukalenga wa Bashane. Ku bamfumu balombodi ba mu bukalenga aba dikumi ne babidi, bavua basakidilaku kabidi mfumu mukuabu, bua kulombolaye ditunga dia bena Yuda.[26]

²⁰Bena Izrayele ne bena Yuda bavua bungi bu lusenga ludi ku muelelu wa mayi manene, ludi muntu kayi mua kubala. Kadi bavua ne biakudia ne bia kunua bia bungi, basomba anu ne disanka.