Read Tshiluba 1 Bakalenga 5 Bible Online

1 Bakalenga 5 - Tshiluba bible

1 Bakalenga 5

¹Bualu mukalenga Shelomu uvua ukokesha makalenga makese onsu, biangatshile ku musulu munene wa Perate ne ku ditunga dia bena Peleshete, too ne ku mukalu wa ditunga dia bena Ejipitu mene.[27] Bakalenga bonsu bavua mu matunga aa bavua amu ku bumfumu bua mukalenga Shelomu. Bavua bamulambula milambu, bamuenzela mudimu matuku onsu avuaye ne muoyi.

²Dituku dionsu, biakudia bivua mukalenga Shelomu ukengela ne bantu bende bivua nenku: kilo binunu tshitema bia bukula kabuyi busengulula, kilo binunu dikumi ne muanda mukulu ya bukula busengulula bimpe,

³ngombe dikumi minene ya manyi, ivuabu badisha pa mbelu, ne ngombe makumi abidi miangata mu mpata, ne mikoku lukama, katuyi tubala nyama mikuabu bu mudi: nyama ya ngulungu, ya tubuluku, ntole, ne nyunyi minene ya manyi ivuabu badisha pa mbelu.

⁴Nanku, mukalenga Shelomu uvua ukokesha buloba bujima, bua kuinshi kua musulu wa Perate, luseke ludi diba dibuelela, biangatshile ku musoku wa Tifsa ne ku tshimenga tshia Ngaza.[28] Bakalenga bonsu bavua mu buloba ebu, bavua anu ku bumfumu bua Shelomu. Ke muvua Shelomu musombe talala ne bena mutumba nende bonsu nanku.

⁵Bena Yuda ne bena Izrayele, bavua ne ditalala, biangatshile ku Dane too ne ku Bersheba,[29] Matuku onsu avua Shelomu ne muoyi, muntu yonsu uvua ukuna mionji yende ya mvinyo ne mitshi ya mfiku anu mu ditalala.

⁶Mukalenga Shelomu uvua kabidi ne nyama ya tubalu binunu dikumi ne bibidi, kabidi ne bikumbi bikumbane bua kutekamu nyama ya tubalu binunu makumi anayi ivua ikoka matempu ende a mvita.[30]

⁷Bamfumu dikumi ne babidi, balombodi ba maloba, bavua mukalenga Shelomu musungule, bavua bafile biakudia bikumbane bua mukalenga Shelomu ne bantu bonsu ba-vuaye ubikila. Mfumu yonsu wa kudibu, uvua ufila biakudia ngondu mujima ku tshidimu tshionsu. Uvua utangila bikole bua biakudia bionsu bikaleku.

⁸Kadi, bua ntete ya oije, ne bisosa bia kudisha nyama ya tubalu, ne nyama ivua ikoka matempu, balombodi bavua babifila pavua mukalenga Shelomu ubilomba, muaba uvua mukalenga.

⁹Mvidi Mukulu uvua mupeshe Shelomu meji mapite ne lungenyi lupite bungi. Malu avua Shelomu mumanye avua a bungi bu lusenga lua ku muelelu wa mayi manene.

¹⁰Shelomu uvua ne meji a bungi, mupite bena meji bonsu ba bena Arabe ne ba bena Ejipitu.

¹¹Uvua mupite bonsu ku meji, mupite Etane, muena Ezraki, mupite kabidi Emane, Kalkole ne Darda, bana ba Makole.[31] Lumu lua meji a Shelomu luvua lutangalaka kudi bantu bonsu bavuaye nabu mutumba.

¹²Uvua muele nsumuinu binunu bisatu, musake misambu ya meji tshinunu ne pa mutu.[32]

¹³Uvua ulongesha bua mitshi ya mishindu yonsu, biangatshile ku mutshi munene wa Sedre uvua mu Lebanone, too ne ditamba dia mutshi wa Isope didi disasa ku tshimana. Uvua mumanye nyama, nyunyi, bilandadi, minyinyi ya mu mayi.

¹⁴Bantu ba mu bisamba bionsu, bavua balua bua kumvua muvua Shelomu wakula ne meji. Bantu abu, bavua babatume kudi bakalenga bonsu ba pa buloba, bavua bamane kumvua lumu lua meji a Shelomu.

¹⁵Irame, mukalenga wa mu tshimenga tshia Tire,[33] kuonsu eku uvua amu mulunda wa Davide. Kumvuaye lumu ne: mbamane kujidila Shelomu mu bukalenga, bua kupingana tatuende Davide. Nanku, kutumaye bantu kudi Shelomu bua kumujingila diakalenga.

¹⁶Shelomu ku luende luseke, kumutumina bantu bua kumuambila ne:

¹⁷“Udi mumanye ne: tatu wanyi Davide kena muashile Maweja-Nangila Mvidi Mukulu wende nzubu wa tshijila to. Bualu baluishi bende bavua bamuluishe nseke yonsu, kabayi balekela to. Kadi Maweja-Nangila kumuambuluisha bua atshimune baluishi abu.

¹⁸Mpindiewu, Maweja-Nangila Mvidi Mukulu wanyi, mmumpe ditalala ku mikalu yanyi yonsu. Tshiena ne muluishi, tshiena ntshina dikenga.

¹⁹Nenku, ndi musue kuasa nzubu wa tshijila wa Maweja-Nangila Mvidi Mukulu wanyi. Bualu Maweja-Nangila uvua muambile tatu wanyi Davide ne: ‘Anu muanebe, ungikala musungule bua kukupingana mu bukalenga, ke wangashila nzubu bua bikale bantendelelamu.[34]

²⁰Nanku, ndi nkusengelela ne: mpindiewu utume diyi kudi bena mudimu bebe, baye ku mukuna wa Lebanone bua kukosa mitshi ya sedre indi nayi dijinga. Bualu, udi mumanye bimpe ne: kuetu kuneku kakuena muntu udi mumanye mua kukosa mitshi munupite nuenu bena Fenisiya[35] to. Bena mudimu banyi abambuluishe bena mudimu bebe. Pashishe, nenkufute difutu dionsu diwikala mundombe bua bena mudimu bebe.”

²¹Mukalenga Irame mumane kupeta mukenji wa Shelomu, kusankaye bikole, wamba ne: “Lelu ndi ngela Mvidi Mukulu tuasakidila. Bualu mmupeshe Davide muana wa meji a bungi, bua kulombolaye tshisamba tshinene tshia bena Izrayele!”

²²Nanku, Irame kuandamuna Shelomu ne: “Ngapetshi dilomba diudi muntumine. Ndi muitabe bua kukutumina mitshi ya sedre ne ya pin[36] iudi ujinga.

²³Bena mudimu banyi nebambule bitupa bia mitshi ku mikuna ya Lebanone too ne ku mayi manene. Nebayisuike mu bisumbu bua kuyipuekesha pa mayi manene too ne muaba uwikala mundeje. Muaba awu, nebasulule mitshi. Bena mudimu bebe nebalue kuambula bitupa bia mitshi abi. Bua difutu, newikale umpesha biakudia bindi nkengela, bua kudisha bantu banyi badi mu nzubu wa bukalenga.”

²⁴Nanku, Irame kupesha mukalenga Shelomu mitshi yonsu ya sedre ne ya pin ivuaye ujinga.

²⁵Mukalenga Shelomu ku luende luseke, uvua umupesha ku tshidimu tshionsu: ntete ya kuenza bukula kilo binunu tshinunu bisambombu, ne mafuta mimpe matambe a olive litre binunu muanda mukulu, bua biakudia bia bena mu nzubu wa bukalenga wa Irame.

²⁶Maweja-Nangila uvua mupeshe Shelomu meji bu muvuaye mumulaye. Nanku, Shelomu kumyuangana ne Irame, kutuabu nende ndondu.

²⁷Mukalenga Shelomu kutuma bantu ku midimu mishilangane. Bena Izrayele bavua benza midimu ayi bavua binunu makumi asatu.

²⁸Ku ngondu yonsu, bavua batuma bantu ba munkatshi muabu binunu dikumi ku mukuna wa Lebanone. Bavua balombola bantu abu kudi Adonirame, mfumu mulombodi wa midimu ayi. Bantu abu bavua benza mudimu ngondu mujima. Pashishe bantu abu bavua bapingana kuabu ngondu ibidi.

²⁹Bantu bavua bambula bintu bavua binunu makumi muanda mutekete. Bavua basongela Shelomu mabue ku mukuna, bavua binunu makumi muanda mukulu.

³⁰Balombodi ba midimu binunu bisatu ne nkama isatu, bavua ku diyi dia balombodi ba mu maloba a mukalenga Shelomu. Bantu aba bavua batangila midimu yonsu ivua bena mudimu bapite bungi abu benza.

³¹Nanku, bu muvua mukalenga Shelomu mutume diyi, bena mudimu kujulabu mabue mimpe manene, kuasongabu bua kuibaka tshitaku tshia nzubu wa Mvidi Mukulu.

³²Bena mudimu ba Shelomu ne ba Irame kujikijabu disonga dia mabue. Bavua babambuluisha kudi basongi ba mabue bapiluke ba mu tshimenga tshia Biblose.[37] Ke muvuabu balongolole mabaya ne mabue makumbane bua kuibaka nzubu wa Mvidi Mukulu.