Read Tshiluba 1 Bakalenga 8 Bible Online

1 Bakalenga 8 - Tshiluba bible

1 Bakalenga 8

¹Diba adi, mukalenga Shelomu kubikila bakulu ba bena Izrayele bonsu, bamfumu bavua ku mutu kua bisamba, ne bavua ku mutu kua meku a kale onsu. Kufikabu mu Yerushalayime, muaba uvua mukalenga Shelomu, bua kuambula mushete wa ndondu wa Maweja-Nangila uvua mu Tshimenga tshia Davide,[61] tshivuabu kabidi babikila ne: Siyone, ne bua kuya kuuteka mu nzubu wa Mvidi Mukulu.

²Ke bena Izrayele bonsu kudisangisha kabidi muaba uvua mukalenga Shelomu, bua kuenza tshibi lu tshia ngondu wa Etanime, mmumue ne: ngondu wa muanda mutekete.[62]

³Bakulu ba bena Izrayele bamane kufika, batuangaji kuambula mushete wa ndondu.

⁴Batuangaji ke bavua bambula mushete wa ndondu wa Maweja-Nangila, kadi bena Levi bavua babambuluisha bua kuambula ntenta wa kusambakena, ne bintu bia tshijila bionsu bivua mu ntenta amu.

⁵Mukalenga Shelomu ne bena Izrayele bonsu bavua badisangisha kumpala kua mushete. Kulambulabu milambu ya bungi: mikoku ne ngombe. Kabavua mua kubala bungi buayi to.

⁶Pashishe batuangaji kubueja mushete muaba uvuabu balongolola, mu tshibambalu tshivuabu babikila ne: muaba wa tshijila menemene, muinshi mua mapuapua a bakerubine.

⁷Bualu mapuapua a bakerubine avua muolola pa mutu pa muaba uvuabu bamane kulongolola bua kuteka mushete. Nanku, mapuapua avua mabuikila mushete, ne milonda ivuabu bawambuila nayi.

⁸Milonda ayi ivua mile. Nsongu yayi ivua imueneka kudi muntu uvua mu tshibambalu tshinene tshivua kumpala kua tshibambalu tshivua mushete wa ndondu. Kadi, kayivua imueneka kudi muntu uvua pambelu. Milonda ayi itshidi muaba awu too ne mpindiewu.

⁹Mu mushete amu, muvua anu mabue abidi avua ne mikenji. Moshe ke uvua muteke mabue awu mu mushete. Uvua muapete ku mukuna wa Sinayi[63] pavua Maweja-Nangila utua ndondu ne bena Izrayele, mumane kubapatula mu Ejipitu.

¹⁰Pavua batuangaji bapatuka mu muaba wa tshijila, divuba divua diuwula mu nzubu wa Maweja-Nangila.

¹¹Batuangaji kabawa ne mushindu wa kuenza mudimu to, bualu bua divuba adi, butumbi bua Maweja-Nangila ke buvua buwule mu nzubu.[64]

¹²Ke Shelomu kuela lubila ne: “Maweja-Nangila uvua mumane kuamba ne: ndi nsomba mu midima.

¹³Kadi, ndi mukuibakile nzubu muimpe, muaba uudi mua kusomba kashidi!”

¹⁴Bena Izrayele bonsu bamane kudisangisha, kuimanabu kulu. Mukalenga Shelomu kubatangila, kubela muoyi.[65]

¹⁵Pashishe, kuambaye ne: — Ndi ngela Maweja-Nangila Mvidi Mukulu wa bena Izrayele tuasakidila! Yeye nkayende ke udi mukumbaje bionsu bivuaye mulaye tatu wanyi Davide. Uvua mumuambile ne:

¹⁶“Biangatshile dituku dimvua mupatule bantu banyi bena Izrayele mu Ejipitu, katshia tshivua musungule tshimenga nansha tshimue munkatshi mua bimenga bia bena Izrayele bua kungibakilamu nzubu undi mua kusomba to. Kadi ndi mukusungule wewe Davide, bua wikale mukalenga wa bantu banyi bena Izrayele.[66]”

¹⁷Bushuwa, tatu wanyi Davide uvua muele meji a kuibakila Maweja-Nangila Mvidi Mukulu wa bena Izrayele nzubu wa tshibilu.

¹⁸Kadi, Maweja-Nangila uvua mumuambile ne: “Udi muele meji mempe bua kungibakila[67] nzubu.

¹⁹Kadi, wewe kuena ungibakila nzubu to, anu muanebe wa balume. Eyowa, anu muanebe menemene neangibakile nzubu ewu.[68]”

²⁰Nanku, Maweja-Nangila ke udi mukumbaje bionsu bivuaye mulaye. Meme ndi mupingane tatu wanyi Davide mu bukalenga. Ndi musombe mu nkuasa wa bukalenga wa bena Izrayele, bu muvua Maweja-Nangila muambe. Ndi muibake nzubu ewu wa tshijila wa Maweja-Nangila Mvidi Mukulu wa bena Izrayele.

²¹Mu nzubu emu, ndi mulongololemu muaba wa kuteka mushete, udi ne mabue a ndondu uvua Maweja-Nangila mutue ne bankambua betu, tshikondu tshivuaye mubapatule mu Ejipitu.

²²Pashishe, Shelomu kuimana kumpala kua tshilambuilu tshia Maweja-Nangila, muele bianza mulu, bena Izrayele bonsu batangila. Uvua utendelela Maweja-Nangila,

²³wamba ne: — Maweja-Nangila Mvidi Mukulu wa bena Izrayele, kakuena Mvidi Mukulu mukuabu bu wewe, nansha mu diulu nansha pa buloba. Wewe udi ukumbaja ndondu uuvua mutue ne bena mudimu bebe. Wewe udi anu mubanange ne muoyi umue, padibu bakuitaba ne muoyi wabu mujima.

²⁴Udi muenzele tatu wanyi muntu webe Davide bionsu biuvua mumulaye. Eyowa, lelu wakumbaji bionsu biuvua mumuambile.

²⁵Nanku, mpindiewu Maweja-Nangila Mvidi Mukulu wa bena Izrayele, ukumbaje kabidi malaya makuabu, auvua mulaye tatu wanyi Davide, muntu webe. Uvua mumuambile ne: “Pikala ndelanganyi yebe mingitabe ne muoyi umue bu muuvua wewe muenze, ndi nkujadikila ne: muntu wa ku ndelanganyi yebe neakupingane misangu yonsu mu bukalenga, bua kushala mukalenga wa bena Izrayele![69]”

²⁶Nanku, Mvidi Mukulu wabena Izrayele, ndi nkusengelela ne: ukumbaje lelu ewu, biuvua mulaye tatu wanyi Davide, muntu webe!

²⁷“Kadi Maweja-Nangila udi mua kusomba pa buloba anyi? Diulu, nansha diodi dialabale, kadiena mua kumukumbana to![70] Mudiye mua kusomba mu kazubu kandi muibake aka mbishi?

²⁸Kadi, Maweja-Nangila Mvidi Mukulu wanyi, tangila kundi. Nteleja mundi nkusengelela. Eyowa, teleja mundi nkubikila lelu muanyi muomsu.

²⁹Tabala! Tangila nzubu ewu butuku ne munya ne muoyi wa kalolu. Bualu udi mumane kuamba ne: ‘Ke muaba unudi mua kumonangana nanyi.[71] Teleja mundi nkutendelela muaba ewu.

³⁰Teleja mundi nkubikila, ne mudi bantu bebe bena Izrayele bakubikila, batangila ku nzubu eku. Nanku, Maweja-Nangila, mu diulu muudi musombe, ututeleje, utujimijile mibi yetu.

³¹“Padibu bafunde muntu ne mmuenzeje mukuende bibi, basue bua aditshipe, bafike nende mu nzubu webe ewu, bua kuditshipaye kumpala kua tshilambuilu tshiebe.

³²Nanku Maweja-Nangila, mu diulu wikale muteleje. Ukose tshilumbu tshia bantu bebe, bua muena tshibawu apete dinyoka, kabidi bua udi mubinge amueneke ne kena ne bualu to.

³³“Padi bena Izrayele bakutombokela, badi mua kubatshimuna kudi baluishi babu. Padi bena Izrayele bakulomba bua wewe kubafuila luse, bakutumbisha, bakutendelela, bakutendakena mu nzubu emu,

³⁴wewe Maweja-Nangila, mu diulu, wikale muteleje. Ubajimijile mibi yabu. Ubapingaje mu maloba auvua mumane kupesha bankambua babu, bualu bena Izrayele mbantu bebe.

³⁵“Padi bena Izrayele bakutombokela, udi mua kukandika bua mvula kaloki to. Nanku, padi bena Izrayele batangila ku nzubu eku, bua kukutendelela ne kukutumbisha, padibu badipuekesha, balekela kukutombokela,

³⁶wewe Maweja-Nangila, mu diulu, wikale muteleje. Ubajimijile mibi yabu, bualu bena Izrayele mbantu bebe, kabidi mbena mudimu bebe. Ubalongeshe mua kukutumikila bimpe. Pashishe, ulokeshe mvula pa buloba buebe ebu, bualu uvua mumane kubupesha bena Izrayele.

³⁷“Padi tshiyole tshia nzala tshibuela mu ditunga, nansha tshipupu tshia disama dia tshiambu, nansha padi munanga mumishe ntete ya kuenza bukula, nansha mvula muboleshe bia pa madimi, nansha mpasu ya mukumbi, nansha ya mushindu mukuabu, mibuele mu ditunga mipite bungi, nansha baluishi bakengesha bena Izrayele, nansha mu bimenga biabu bidibu bakolesha ne bimana, padi tshipupu nansha disama dia tshiambu bibuele mu ditunga, nansha biobi bia mushindu kaayi,

³⁸padi bantu bebe, bena Izrayele, badiunwue ne: tudi benza bibi, banyingalala, padibu bakutendakena, batangila ku nzubu eku, bela bianza mulu bua kukutendelela,

³⁹wewe Maweja-Nangila, mu diulu muudi usomba, wikale muteleje. Ubafuile luse. Wenzele muntu yonsu bilondeshile malu adiye wenza. Bualu udi mumanye muoyi wende. Bushuwa, wewe nkayebe udi mumanye muoyi wa muntu yonsu.

⁴⁰Wewe muenzele bena Izrayele nanku, nebakunemeke kashidi, matuku onsu adibu ne muoyi pa buloba ebu buuvua mumane kupesha bankambua babu.

⁴¹“Padi bantu batumbisha dina diebe dia butumbi, bamanyishangana bukole buudi wenza nabu bishima, bantu benyi nebumvue lumu alu. Nanku, muntu muenyi yonsu udi kayi wa mu tshisamba tshia bantu bebe bena Izrayele, padiye ufuma kule, ufika mu nzubu emu bua kukutendelela,

⁴²

⁴³wewe Maweja-Nangila, mu diulu muudi usomba, wikale muteleje. Umupeshe tshintu tshidiye ukulomba. Nanku, bantu ba bisamba bionsu bia pa buloba nebakumanye, nebalonge mua kukunemeka, bu mudi bantu bebe bena Izrayele bakunemeka. Kabidi nebajadike ne: nzubu ewu undi muibake, nguebe wewe bulelela.

⁴⁴“Paudi utuma bena Izrayele mu mvita bua kuluisha baluishi babu, padibu bakudimuke batangila tshimenga etshi tshia Yerushalayime, tshiuvua mumane kusungula, batangila ku nzubu ewu undi mukuibakile, padibu bakutendelela wewe Maweja-Nangila,

⁴⁵mu diulu muudi usomba, wikale mubateleje. Umvue mudibu bakulomba, bakusengelela. Nanku, ubambuluishe.

⁴⁶“Kakuena muntu nansha umue udi kayi mua kuenza bibi. Padi bena Izrayele bakutombokela, misangu mikuabu udi mua kubafikila munda, kubafila mu bianza bia baluishi babu, bua baye nabu mu bupika mu ditunga dia pabuipi, nansha dia kule.

⁴⁷Nanku, mu ditunga dikale bena Izrayele baye mu bupika amu, padibu badiela meji, badikonka, batuadija kukutendelela, bamba ne: ‘Tuvua bakutombokela Maweja-Nangila, benza bibi. Tudi bena tshibawu!’

⁴⁸Padi bena Izrayele bakulomba ne muoyi mujima bua wewe kubafuila luse mu ditunga dia baluishi babu mudibu babakuata ku bupika, padibu bakudimuka batangila ku ditunga diuvua mumane kupesha bankambua babu, kabidi batangila ku tshimenga etshi tshia Yerushalayime tshiuvua musungule, ne ku nzubu ewu undi mukuibakile, padibu bakutendelela,

⁴⁹nanku, wewe Maweja-Nangila, mu diulu muudi usomba, wikale muteleje. Umvua mudibu bakulomba, bakusengelela. Nanku, ubambuluishe.

⁵⁰Ubafuile luse bua malu mabi onsu adibu bakuenzela, ne mudibu bakutombokela. Witabe bua baluishi babu babenzele bimpe.

⁵¹Bualu bena Izrayele mbantu bebe, biangatshile tshikondu tshiuvua mubapatule mu Ejipitu, muaba wa dikenga dikole.

⁵²“Maweja-Nangila Mvidi Mukulu, wikale mutabale, bua umvue mudi bantu bebebena Izrayele ne meme, tukutendelela, misangu yonsu itudi tukubikila.

⁵³Bualu wewe ke uvua mutusungule munkatshi mua bisamba bionsu, bua tuikale bantu bebe, bu muuvua mumane kuambila Moshe, muntu webe, tshikondu tshiuvua mupatule bankambua betu mu bupika mu Ejipitu.”

⁵⁴Pavua Shelomu ulomba, utendakena Maweja-Nangila, uvua anu mutue binu kumpala kua tshilambuilu, muele bianza mulu. Mamane kujikija kutendelela, kujukaye,

⁵⁵kuimana kulu, kuela bena Izrayele bonsu bavua muaba awu lupemba, wamba ne diyi dikole ne:

⁵⁶— Ndi ngela Maweja-Nangila tuasakidila. Yeye ke udi mufile ditalala kudi bantu bende bena Izrayele, bu muvuaye mubalaye. Maweja-Nangila ke udi muenze bionsu ebi bua kujikija bivuaye mulaye mukana mua muntu wende Moshe.[72]

⁵⁷Mpindiewu, ndi ndomba Maweja-Nangila Mvidi Mukulu wetu, bua ikale netu bu nuwuaye ne bankambua betu. Maweja-Nangila, kutulekedi to. Ikale anu utuambuluisha.

⁵⁸Maweja-Nangila atupeshe muoyi muimpe bua tudifile anu kudiye, tuenze malu adiye musue, tukumbaje meyi ende, mikenji yende, ne miaku yende ivuaye muambile bankambua betu.

⁵⁹Maweja-Nangila Mvidi Mukulu wetu, avuluke butuku ne munya bionsu bindi mumulombe ebi. Nanku, atuambuluishe matuku onsu. Bualu nuenu ne meme tudi bantu bende.

⁶⁰Nanku, bantu ba bisamba bionsu bia pa buloba, nebamanye ne: Maweja-Nangila ke Mvidi Mukulu, kakuena mukuabu to.

⁶¹Nanku, nuenu bena Izrayele, nenunange Maweja-Nangila Mvidi Mukulu wetu ne muoyi wenu mujima. Nenutumikile meyi ne mikenji biende bu munudi benza lelu.

⁶²Mukalenga Shelomu ne bena Izrayele bonsu bavua muaba awu, kulambulabu Maweja-Nangila milambu.

⁶³Bua kubanjija nzubu wa Mvidi Mukulu, Shelomu kulambula milambu ya bobumue: ngombe binunu makumi abidi ne bibidi, mikoku ne mbuji binunu lukama ne makumi abidi.

⁶⁴Dituku adi, mukalenga Shelomu kujidila tshitupa tshijima tshia pankatshi tshia lubanza luvua kumpala kua nzubu wa Mvidi Mukulu. Tshilambuilu tshia tshiamu tshikunze tshivua pabuipi ne mushiku wa mbelu wa nzubu wa Mvidi Mukulu, tshivua tshikese tshitambe. Katshivua tshikumbane mua kulambuilapu milambu yonsu to. Nanku, Shelomu kulambuila milambu ya kuosha, ya bintu bia mu madimi, ne manyi a nyama ya milambu ya bobumue anu mu lubanza amu.

⁶⁵Anu tshikondu atshi, Shelomu ne bena Izrayele bonsu, bavua muaba awu bapite bungi, kuenzabu tshibilu tshia tuzubu tua Bisasa. Bena Izrayele abu, bavua bafumine mu ditunga dijima dia bena Izrayele, biangatshile ku Lebo-Amate ku mutu mu ditunga, too ne ku musulu wa Ejipitu udi kuinshi mu ditunga. Nanku, munkatshi mua matuku muanda mutekete, bena Izrayele kuenza tshibilu atshi muaba uvua Maweja-Nangila Mvidi Mukulu.[73]

⁶⁶Dituku dia muanda mukulu, mukalenga Shelomu kutangalaja bena Izrayele. Kupinganabu ku nzubu yabu. Bena Izrayele bonsu kuya kulayangana[74] ne mukalenga Shelomu bamuela tuasakidila. Pashishe, kupinganabu kuabu ne disanka, bualu Maweja-Nangila uvua muenzele muntu wende Davide bimpe, kabidi ne bantu bende bena Izrayele.