Read Tshiluba 1 Bakalenga 9 Bible Online

1 Bakalenga 9 - Tshiluba bible

1 Bakalenga 9

¹Mukalenga Shelomu mumane kujikija nzubu wa Maweja-Nangila ne nzubu wende wa bukalenga, kabidi ne nzubu yonsu ivuaye musue kuibaka,

²Maweja-Nangila kumumuenekela tshiakabidi, anu muvuaye mumumuenekele ku musoku wa Ngibone.[75]

³Maweja-Nangila kuambila Shelomu ne: — Ndi mumvue kulomba kuebe, ne mushindu uudi untendakena. Nanku, ndi njidila nzubu ewu uudi muibake. Ndi muitabe bua kusombamu kashidi, bua meme kuikala munkatshi muenu. Nengikale mulame nzubu ewu. Netumuenzele bimpe misangu yonsu.

⁴Kadi wewe Shelomu, wewe mungitabe, muvua tatuebe Davide mungitabe ne muoyi umue mululame, wewe mukumbaje bionsu bindi nkuambila, mutumikile meyi ne mikenji yanyi bimvua mukupeshe,

⁵umanye ne: nenjadike bukalenga buebe kashidi munkatshi mua bena Izrayele. Ke mumvua mulaye tatuebe Davide, mumuambile misangu yonsu ne: muntu wa ku ndelanganyi yebe neakupingane mu bukalenga, bua kushalaye mfumu wa bena Izrayele.[76]

⁶Kadi wewe Shelomu ne bantu bebe bena Izrayele, ne ndelanganyi yenu, panuikala nuenu bantombokela, kanuyi bakumbaje meyi anyi ne mikenji yanyi bimvua munuambile, nuenu nutendelela mvidie mikuabu, nuenu bayituile binu bua kuyikukuila,

⁷nennuipate mu buloba bumvua munupe. Nengumuke mu nzubu ewu, undi mujidile bua nuenu kuntendelelamu. Nanku, bantu ba bisamba bikuabu nebanuseke miaba yonsu, banuele bibingu.

⁸Padi bantu bapitshila pabuipi ne nzubu munene ewu mumane kunyanguka, nebakeme, bapampakana ne bowa. Nebakonke ne: “Maweja-Nangila mmunyangakaje ditunga edi ne nzubu ewu nunku bua tshinyi?[77]”

⁹Nebabandamune ne: “Bualu bena Izrayele mbatombokele Maweja-Nangila Mvidi Mukulu wabu, uvua mupatule bankambua babu mu Ejipitu. Maweja-Nangila udi ubakengesha nunku, bualu bavua batendelela mvidie mikuabu.”

¹⁰Irame, mukalenga wa tshimenga tshia Tire, uvua mupeshe Shelomu mitshi ya sedre yonsu, mitshi ya pin, ne tshiamu tshia mpawungi tshivuaye ukengela bua nzubu uvuaye wibaka. Bidimu makumi abidi bimane kukumbana, Shelomu kujikija nzubu wa Maweja-Nangila ne nzubu wende wa bukalenga. Pashishe kupeshaye Irame bimenga makumi abidi bivua mu buloba bua Ngalileya.

¹²Nanku, Irame kumuka ku Tire, bua kuya kumona bimenga abi. Kadi kabivua bimusankisha to.

¹³Kukemaye, wamba ne: “Muanetu Shelomu, bimenga biudi mumpeshe bidi bibi bitambe, kabiena ne mushinga to!” Ke padibu babikila bimenga abi too ne lelu ne: “Ditunga dia Kabule.[78]”

¹⁴Eku Irame uvua mutumine mukalenga Shelomu kilo binunu bisatu ne nkama itanu ya tshiamu tshia mpawungi.

¹⁵Mukalenga Shelomu kuenzeja midimu ya kuibaka nzubu wa Maweja-Nangila, nzubu wende wa bukalenga, mushiki wa buloba uvuabu bela muaba awu, uvuabu babikila ne: Milo,[79] bimana bivua binyungulule Yerushalayime, ne bimenga bia: Ashore, Megido ne Ngezere.

¹⁶(Mukalenga wa bena Ejipitu kuluisha bena Ngezere, kukuata tshimenga atshi, kutshiosha, kushipa bena Kenaane bavua basemu. Pashishe kutshipeshaye muanende wa bakaji bua kumusankisha, dituku divuabu bangata dibaka ne Shelomu.

¹⁷Ke pavua Shelomu muibakulule tshimenga tshia Ngezere). Shelomu uvua muibakulule kabidi bimenga ebi: Beterone wa kuinshi,

¹⁸Baalate ne Tamare wa mu tshipela tshia mu ditunga.

¹⁹Uvua muibakulule ne bimenga bionsu bivuaye muteke biakudia biende, matempu ende a mvita, ne nyama yende ya tubalu. Shelomu kuibaka bintu bionsu bivuaye musue kuibaka nansha mu Yerushalayime, nansha pa mukuna wa Lebanone, nansha mu ditunga dijima divua ku bumfumu buende. Mukalenga Shelomu uvua muenzeje midimu ayi mushindu[80] ewu:

²⁰bantu ba bisamba bia bende batshivua bashale mu ditunga amu, ke bena Amore, bena Iti, bena Perizi, bena Ivi ne bena Yebusa, mmumue ne: bantu bavua kabayi bena Izrayele to.

²¹Bisamba ebi bivua bishala mu ditunga, bualu bena Izrayele bavua benza muabu muonsu bua kubabutula bapange. Nanku, bobu ke bavua Shelomu wenzeja midimu. Batshidi bapika ba bena Izrayele too ne mpindiewu.

²²Kadi Shelomu kavua wenzeja bena Izrayele midimu ayi to. Uvua mubangate amu ku mudimu wa bena mvita, wa balombodi ba bena mvita, bikale ne mianzu mishilangane, wa bendeshi ba matempu a mvita, nansha wa babandi ba pa nyama ya tubalu.

²³Bamfumu ba maloba, kusungula bantu nkama itanu ne makumi atanu bua bikale batangila bantu bonsu bapite bungi bavua benzela Shelomu midimu.

²⁴Muana wa bakaji wa mukalenga wa bena Ejipitu mumane kumuka mu Tshimenga tshia Davide, bua kuya kusomba mu nzubu wa bukalenga uvuabu bamuibakila, Shelomu kuelesha mushiki wa buloba muabu babikila ne Milo.

²⁵Mukalenga Shelomu, mua ulambula milambu ya kuosha ne ya bobumue misangu isatu ku tshidimu tshionsu. Uvua osha milambu ayi mu dina dia Maweja-Nangila patshilambuilu tshivuaye muashile Maweja-Nangila. Nanku, mu nzubu wa Mvidi Mukulu bavua benzelamu mudimu uvuabu bamuibakila.[81]

²⁶Mukalenga Shelomu kusongesha matu manene ku Eshiyone-Ngebere, pabuipi ne Elate, muaba uvua bantu basabukila Mayi manene makunze mu ditunga dia Edome.

²⁷Mukalenga Irame uvua mutumine Shelomu bantu ba bena Fenisiya bavua bamanye mua kuita matu bikole, bua kuambuluishabu biitshi ba matu ba Shelomu.

²⁸Biitshi ba matu abu bonsu, kuya bonsu pamue mu ditunga dia Ofire.[82] Bavua batuadile mukalenga Shelomu tshiamu tshia mpawungi kilo binunu dikumi ne bibidi ne pa mutu.