Read Tshiluba 2 Bakalenga 16 Bible Online

2 Bakalenga 16 - Tshiluba bible

2 Bakalenga 16

¹Peka, muana wa Remalya, mumane kulala mu bukalenga bua Izrayele bidimu dikumi ne muanda mutekete, Akaze, muana wa Yotame kudia bukalenga bua Yuda.

²Uvua anu ne bidimu makumi abidi, kushalaye mu bukalenga bidimu dikumi ne bisambombu mu Yerushalayime. Kadi Akaze kavua muenze malu avua Maweja-Nangila Mvidi Mukulu wende musue, bu muvuabu benza kudi nkambua wende Davide to.

³Uvua mulonde amu buenzayi bua bakalenga ba Izrayele. Akaze kufika ne ku dilambula muanende wa balume bu mulambu wa kuosha,[105] bilondeshile bilele bibi bia bisamba bivua Maweja-Nangila muipate bua kushilabi bena Izrayele ditunga.

⁴Akaze uvua ulambula milambu ya nyama ne ya manananshi mu miaba ya kutendelela mvidie, pa mikuna, muinshi mua mitshi ivua ne dileji dia bungi.

⁵Reshine, mukalenga wa bena Arame, ne Peka, mukalenga wa Izrayele, muana wa Remalya, kuyabu kuluisha Akaze.[106] Kunyungululabu Yerushalayime. Kadi, kabena bamutshimune to.

⁶Tshikondu atshi, Reshine, mukalenga wa bena Arame, mumane kuipata bena Yuda bavua mu tshimenga tshia Elate, kutshipingajilaye bena Edome.[107] Bena Edome kuasa tshiakabidi mu tshimenga atshi. Batshidimu too ne mpindiewu.

⁷Akaze kutuma bantu bua kuambila mukalenga wa bena Ashure, Tiglate-Pilesere ne: “Meme ndi bu mupika webe, nansha bu muanebe wa balume. Luaku, unsungidile mu bianza bia bakalenga ba bena Arame ne ba bena Izrayele badi banduisha aba.”

⁸Nanku, Akaze kusangisha tshiamu tshia mpawungi ne tshiamu tshitoke tshia mushinga mukole, bivua mu nzubu wa Maweja-Nangila ne mu tshibambalu tshia kuteka bintu tshivua ku nzubu wa bukalenga. Kutuminaye mukalenga wa bena Ashure bintu abi bua kumusankisha nabi.

⁹Mukalenga wa bena Ashure kukumbaja bionsu bivua Akaze mulombe. Kuyaye kuluisha tshimenga tshia Damase, kutshikuata, kuya ne benatshi mu bupika ku Kire. Kadi, kushipeshaye Reshine, mukalenga wa bena Arame.

¹⁰Mukalenga Akaze kuya mu tshimenga tshia Damase, bua kumonangana ne mukalenga Tiglate-Pilesere. Akaze umona tshilambuilu tshivua ku nzubu wa Mvidi Mukulu mu Damase, kutuminaye mutuangaji Uriya mu Yerushalayime luidi lua tshilambuilu atshi ne mushindu uvuabu batshibake.

¹¹Mutuangaji Uriya kuenza tshilambuilu tshipiatshipia, bilondeshile luidi luvuabu bamutumine kudi Akaze. Uriya kujikija dibaka dia tshilambuilu, Akaze kayi muanji kupingana mu Yerushalayime, ufuma ku Damase to.

¹²Mukalenga Akaze upingana, kumona tshilambuilu, kusemena pabuipi natshi.

¹³Yeye nkayende kulambulapu mulambu wa kuosha, pamue ne mulambu wa bukula ne wa maluvu a mvinyo. Kulambulayepu kabidi ne mulambu wa bobumue, kuela mashi a nyama wa mulambu awu ku tshilambuilu atshi.

¹⁴Pashishe kumushaye tshilambuilu tshia tshiamu tshikunze tshivuabu bajidile mu dina dia Maweja-Nangila.[108] Tshilambuilu atshi, tshivua pabuipi ne mushiku wa nzubu wa Mvidi Mukulu, pankatshi pa tshilambuilu tshipiatshipia ne nzubu wa Mvidi Mukulu. Kutshitekaye panyima pa tshilambuilu tshipiatshipia ku mutu.

¹⁵Pashishe, mukalenga Akaze, kutumina mutuangaji Uriya diyi, umuambila ne: — Bituadija ku mpindiewu, wikale wenzela mudimu ku tshilambuilu tshinene. Dinda dionsu, wikale ulambulapu mulambu wa kuosha, dilolu dionsu mulambu wa bukula. Wikale ulambuilapu kabidi milambu ya kuosha idi bantu bafila, pamue ne milambu ya bukula ne ya maluvu a mvinyo. Wele kabidi mashi a nyama ya milambu ayi ku tshilambuilu. Kadi, bua tshilambuilu tshia tshiamu tshikunze, meme nkayanyi nengambe tshitudi mua kuenza natshi.[109]

¹⁶Mutuangaji Uriya kukumbaja bionsu bivua mukalenga Akaze muambe.

¹⁷Mukalenga Akaze kukosa bitata bia tshiamu tshikunze bivua ku matempu a ku nzubu wa Mvidi Mukulu. Kumushaye malongu manene avua ku matempu aku. Kumushayi kabidi dilongu dinene dia tshijengu divua pa ngombe milume dikumi ne ibidi ya tshiamu tshikunze.[110] Kuditekaye pa buloba bulamika mabue.

¹⁸Nanku, bua kusankisha mukalenga wa bena Ashure, mukalenga Akaze kujika “Muaba uvuabu bapitshila dituku dia Dikisha,” uvuabu base mu nzubu wa Mvidi Mukulu, kujika kabidi “Mushiku wa mukalenga” uvua pambelu pa nzubu ewu.[111]

¹⁹Malu makuabu a Akaze, mbaafunde mu mukanda udibu babikila ne: Malu adi bakalenga ba bena Yuda benza.

²⁰Akaze mumane kufua, kumujiikabu mu lukita lua bena diku diabu luvua mu Tshimenga tshia Davide. Pashishe, muanende wa balume Izkiya kumupingana mu bukalenga.