Read Tshiluba 2 Bakalenga 19 Bible Online

2 Bakalenga 19 - Tshiluba bible

2 Bakalenga 19

¹Mukalenga Izkiya umvua bionsu bivuabu bambe, kupanda bilamba biende, kuvuala bilamba bia madilu. Kuyaye mu nzubu wa Maweja-Nangila.

²Diakamue, kubikilaye Elyakime, mulombodi wa nzubu wa bukalenga, Shebna mufundi, ne bakulu ba batuangaji. Kubatumaye kudi muambi Yeshaya, muana wa Amosa. Bantu abu, bavua bavuala kabidi bilamba bia madilu.

³Kuyabu kuambila muambi Yeshaya ne: “Mukalenga Izkiya udi wamba ne: Lelu ndituku dia kutukengeshabu, kutunyoka, ne kubifuisha bundu. Bu mudibu bamba ne: muana ukadi pabuipi, kadi mamuende kena ne bukole bua kulela to.

⁴Mukalenga wa bena Ashure mmutume mulombodi wa beledi ba mukalenga maluvu, bua kupenda Mvidi Mukulu wa muoyi. Eyowa, ndi njinga bua Maweja-Nangila Mvidi Mukulu webe umvue bipendu bionsu ebi, anyoke muntu uvua umupenda! Wewe, lombaku Maweja-Nangila, wakuile bantu bende badi bashala aba.”

⁵Bantu bavua mukalenga Izkiya mutume, bamane kuyukila ne muambi Yeshaya,

⁶awu kubambila ne: — Nuye kuambila mukalenga wenu ne: Maweja-Nangila udi wamba ne: “Uvua muteleje muvua balombodi ba bena mvita ba mukalenga wa bena Ashure bampenda. Kadi, kutshinyi bua bionsu bivuabu bakula abi to.

⁷Mukalenga neapete mukenji. Diba adi meme nemmuenzeje bua apingane mu ditunga diende. Meme nemmushipeshe mu ditunga diende amu.[135]”

⁸Mulombodi wa beledi ba mukalenga wa bena Ashure maluvu, kumvua lumu ne: mfumuende mmumuke mu Lakishe bua kuya kuluisha Libna.[136] Nanku, kuyayemu bua kumonangana ne mfumuende.

⁹Kuambilabu mukalenga wa bena Ashure ne: Tiraka, muena Kushe, mukalenga wa bena Ejipitu, mmufike bua kukuluisha. Nanku, Senakeribe kutumina Izkiya mukanda,

¹⁰mukalenga wa bena Yuda, umuambila ne: “Wewe udi mutambe kutekemena amu Mvidi Mukulu webe. Udi wela meji ne: neankandike bua meme kukuata Yerushalayime anyi? Mvidi Mukulu kakushimi to.

¹¹Udi mumane kumanya muvua bakalenga ba bena Ashure benza matunga makuabu, baanyangakaja. Wewe udi wela meji ne: neupanduke anyi?

¹²Bakalenga bavua mu bukalenga kumpala kuanyi, bavua babutula bimenga ebi: Ngozane, Arane, Reshefe, ne Telashare tshimenga tshinene tshia bena Edene. Mvidie ya mu bisamba ebi, kayena unsungidile bimenga ebi to.

¹³Ela meji bimpe. Bakalenga ba mu tshimenga tshia Amate, Arpade, Layire, Sefarvayime, Ena ne Ava,[137] badi penyi?”

¹⁴Izkiya kuangata mukanda uvuabu bamutuadila kudi bena Ashure, kuubala. Pashishe, kubuelaye mu nzubu wa Mvidi Mukulu, kuuleja Maweja-Nangila.

¹⁵Nanku, kutendelelaye, wamba ne: “Maweja-Nangila Mvidi Mukulu wa Izrayele, wewe udi usomba pa mutu pa bakerubine.[138] Wewe nkayebe ke Mvidi Mukulu mu makalenga onsu a pa buloba, wewe ke uvua mufuke diulu ne buloba.

¹⁶Maweja-Nangila, uteleje bimpe, utangile bimpe, wewe Mvidi Mukulu wa muoyi, vuluka bipendu bivuabu bakupenda kudi bantu badi Senakeribe mutume.

¹⁷Maweja-Nangila, bulelela, bakalenga ba bena Ashure mbabutule bisamba, banyangakaja buloba bua bisamba abi.

¹⁸Mbanyangakaje mvidie ya bena bisamba abi, bayoshe. Bualu kayivua mvidie ya bushiwa to. Ivua anu mpingu misonga kudi bantu, ya mitshi, nansha ya mabue.

¹⁹Kadi wewe, Maweja-Nangila Mvidi Mukulu wetu, mpindiewu, utusungidile mu bianza bia Senakeribe. Nanku, mu makalenga onsu a pa buloba, nebamanye ne: anu wewe Maweja-Nangila ke Mvidi Mukulu.”

²⁰Ke muambi Yeshaya, muana wa Amosa, kutuma muntu bua kuambila Izkiya ne: “Maweja-Nangila Mvidi Mukulu wabena Izrayele udi wamba ne: Ndi mumvue dilomba diebe bua Senakeribe, mukalenga wa bena Ashure.

²¹Teleja malu andi mmubengela: Tshimenga tshia Siyone tshidi tshikudiwula, tshikuela bibingu. Tshimenga tshimpe tshia Yerushalayime tshidi tshikuseka, tshikupa mutu.

²²Uuvua upenda nnganyi? Uuvua ujana ne dikamakama nnganyi? Wewe mutshimbakane, uuvua utangila, kuyi ne kanemu, nnganyi? Uvua unsendeka mmeme Mvidi Mukulu, wa tshijila wa Izrayele!

²³Uvua mutume bantu bebe, bua bampende meme Maweja-Nangila! Uvua wamba ne: ‘Meme Senakeribe, ndi ne matempu a mvita mapite bungi. Ndi mubande ku nsongu ya mikuna. Ndi mubande ne pa mikuna ya Lebanone, bua kukosa mithi mimpe ya sedre, mipite mikuabu yonsu, ne mitshi ya siprese, mipite mikuabu ku bule. Nemfike ku nsongu ya mikuna idi mipite mikuabu, ne mu ditu dia Lebanone.

²⁴Meme ndi mumbule biina bia mayi! Ndi munue mayi mu matunga a bende. Nengumishe misapa ya Nile, anu pandi ndiata makasa, mu ditunga dia Ejipitu.’

²⁵“Wewe, Senakeribe, udi uditambisha. Kadi teleja, nkuvuluija malu. Ku kale, meme ke udi mulongolole malu aa. Ku kalekale, mvua muele meji a tshia kuenza. Mpindiewu ndi nkumbaja bionsu abi. Meme ndi mukupeshe bukole, bua kubutula, ne kushimbula, bimenga bidi ne bimana bikole.

²⁶Bena bimenga abi, kabavua ne bukole, mikolu yabu kuteketa bua bowa. Kumvuabu bundu. Badi bafuana bisosa bia mu mpata, midioku ya mu madimi, ne bikunyibua bidi bitoloka ku musaka wa nzubu, biuma, kabiyi bianji kukola.

²⁷“Ndi mumanye malu ebe. Ndi mumanye paudi usomba, paudi upatuka nansha ubuela, paudi umfunyina meme.

²⁸Wewe udi mumfunyine bushuwa. Mvua mumvue muuvua mumpende ne dikamakama. Nanku nenkutekeshe, nkuela kakanu ku diulu,[139] ne lukanu lua tshiamu mukana. Nenkupingaje kuebe, amu mu njila uuvua mufumine.

²⁹“Kadi wewe Izkiya, ndi nkuleja bidi ne bua kuenzeka tshidimu etshi, neudie ntete ya kuenza bukula ya bidimenena nkayabi. Tshidimu tshialonda, neudie kabidi ntete ya bidimenena. Kadi tshidimu tshisatu, nenuyikune, nenuyinowe. Nenukune mionji yenu ya mvinyo, nenunue maluvu ayi.

³⁰Bena mu bukalenga bua Yuda badi bashale ne muoyi nebikale tshiakabidi bu mutshi udi muele miji mu buloba, matamba awu mikale ne bimuma bia bungi.

³¹Eyowa, mu Yerushalayime nemupatuke bantu badi bashale ne muoyi. Bantu nebimane pa mukuna wa Siyone.” Yeshaya uvua wamba kabidi ne: — Maweja-Nangila neakumbaje bualu ebu, bualu udi ununanga bikole.

³²Kadi mpindiewu, bua mukalenga wa bena Ashure, Maweja-Nangila udi wamba ne: “Kakubuela mu tshimenga etshi to. Kena mua kuasa tshimenga etshi miketa to. Ngabu kayena mua kumuambuluisha bua kuluisha tshimenga etshi to.

³³Kena mua kuelesha tshibumba, kutshibanda bua kubuela mu tshimenga etshi nansha. Neapingane amu mu njila uvuaye mufumine. Kakubuela mu tshimenga etshi to. Meme Maweja-Nangila ke udi wamba nanku.

³⁴Nendame Yerushalayime. Nemmusungidile, bualu ndi Mvidi Mukulu. Kabidi ndi nnanga kashidi, muntu wanyi, Davide!”

³⁵Butuku, mutumibue wa Maweja-Nangila kuya mu mitanda ya bena Ashure. Kushipayemu bantu balume binunu lukama ne makumi muanda mukulu ne bitanu. Butshia dinda, bantu bavua bashala ne muoyi babika ku tulu kumonabu bitalu bionsu abi.

³⁶Nanku, Senakeribe, mukalenga wa bena Ashure kutula mitanda, kuya kusomba mu tshimenga tshiende tshia Ninive.

³⁷Dituku dikuabu, pavua Senakeribe utendelela mu nzubu wa mvidie wende Nisroke, bana bende ba balume babidi: Adrameleke ne Sareshere kumushipa. Pashishe, kunyemabu kuya mu ditunga dia Ararate.[140] Muanende mukuabu, Asharadone, kumupingana mu bukalenga.