Read Tshiluba 2 Bakalenga 20 Bible Online

2 Bakalenga 20 - Tshiluba bible

2 Bakalenga 20

¹Tshikondu atshi, mukalenga Izkiya kupeta disama dia lufu. Muambi Yeshaya, muana wa Amosa, kufika bua kumusamba, umuambila miaku ivua Maweja-Nangila muambe ne: — Diba diakumbanyi bua wewe kudilongolola, bualu mu disama edi, kuena upanda to, neufue.

²Nanku, Izkiya kutangila ku tshimana tshia nzubu. Utendelela Maweja-Nangila, wamba ne:

³— Eyi! Maweja-Nangila, uvuluke bionsu bimvua ngenza. Mvua mukuitabe ne muoyi mujima. Mvua anu ngenza malu mimpe bua kukusankisha! Pashishe, Izkiya kudila bikole.

⁴Yeshaya kayi muanji kufika mu lubanza[141] lua ku nzubu wa bukalenga, Maweja-Nangila kumutumina diyi,

⁵bua apingane kudi Izkiya, mukalenga wa bantu ba Maweja-Nangila, amuambile ne: “Maweja-Nangila Mvidi Mukulu wa nkambua webe Davide udi wamba ne: Ndi mumvue ditendelela diebe, kabidi ndi mumone binsonji biebe. Nanku ndi musue kujikija disama diebe. Papita matuku asatu, mutuadije kuya kabidi mu nzubu wa Mvidi Mukulu.

⁶Nenkushiye kabidi ne muoyi bidimu dikumi ne bitanu! Wewe ne Yerushalayime, nennusungidile mu bianza bia mukalenga wa bena Ashure. Nendame tshimenga etshi, bualu meme ndi Mvidi Mukulu, kabidi ndi nnanga Da-vide, muntu wanyi kashidi.”

⁷Yeshaya kuzaza tumuma tua mfiku, kuenza ditapi. Kudilamikabu muaba uvua tshiuja, bua kuondapa mukalenga Izkiya.[142]

⁸Pashishe, Izkiya kukonka muambi ne: — Tshidi mua kunjadikila ne: Maweja-Nangila neangondape, nembuele tshiakabidi mu nzubu wa Mvidi Mukulu, papita matuku asatu ntshinyi?

⁹Yeshaya kumuambila ne: — Maweja-Nangila neakuleje tshidi mua kukujadikila, neakumbaje bionsu bidiye mulaye. Udi musue mundidimbi uya kumpala anyi upingana panyima pa bidiatshilu dikumi bia tshibandilu, tshivua Akaze[143] muase?

¹⁰Izkiya kuandamuna ne: — Bua mundidimbi kuya kumpala pa bidiatshilu dikumi, mbualu bukese. Nanku, ndi musue bua upingane panyima.

¹¹Muambi Yeshaya kutendelela Maweja-Nangila. Maweja-Nangila kupingaja mundidimbi panyima pa bidiatshilu dikumi, bia tshibandilu[144] tshivua mukalenga Akaze muase.

¹²Tshikondu atshi, mukalenga wa Babilone, Merodake-Baladane, muana wa Baladane, kumvua lumu lua disama dia Izkiya. Kumutuminaye bantu ne mukanda, ne bintu bia kumusankisha.[145]

¹³Izkiya kuakidila bantu abu, kubaleja miaba yonsu ivuabu bateka bintu bia mushinga mukole: tshiamu tshitoke tshia mushinga mukole, tshiamu tshia mpawungi, manananshi, ne mafuta a mupuya muimpe. Kubalejaye kabidi muaba uvuaye uteka bia mvita, ne bintu bionsu bikuabu. Kavua mubasokoke tshintu nansha tshimue, mu nzubu wa bukalenga, nansha mu ditunga diende dijima.

¹⁴Pashishe, muambi Yeshaya kuya kudi mukalenga Izkiya, umukonka ne: — Bantu aba bavua bakuambila tshinyi? Kabidi mbafume penyi? Izkiya kuandamuna ne: — Mbafume kule kutambe, ku Babilone.

¹⁵Yeshaya kumukonka kabidi ne: — Mu nzubu webe wa bukalenga bavua bamone tshinyi? Izkiya kuandamuna ne: — Bavua bamone bintu bionsu bidimu. Tshiena mubasokoke tshintu nansha tshimue, tshia ku bintu bionsu bindi muteke.

¹⁶Ke Yeshaya kuambila Izkiya ne: — Teleja tshidi Maweja-Nangila wamba:

¹⁷“Dituku dikuabu, bintu bionsu bidi mu nzubu webe wa bukalenga mpindiewu, bintu bionsu bivuabu batekamu kudi bantu bavua bakudianjidila mu bukalenga, bintu bionsu abi nebaye nabi mu Babilone. Muaba ewu, kawakushala tshintu to. Ke mudi Maweja-Nangila wamba.[146]

¹⁸Nebakuate kabidi bantu ba ku ndelanganyi yebe, baye nabu mu Babilone, bua kubapakula bua bikale benza mudimu mu nzubu wa bukalenga, wa mukalenga wa bena Babilone.[147]”

¹⁹Izkiya kuandamuna Yeshaya ne: — Tshidi Maweja-Nangila muambe tshidi bualu buimpe. Izkiya uvua udiambila munda munda ne: “Nanku pantshidi ne muoyi, netuikale basombe bimpe mu bupole!”

²⁰Malu makuabu a Izkiya, mbaafunde mu mukanda udibu babikila ne: Malu adi bakalenga ba bena Yuda benza. Mu mukanda amu, mbalejemu bukitu buvua nabu Izkiya, ne mushindu uvuaye mumbule tshiina tshimue tshia mayi, muenza ne mukidi bua kufikisha mayi mu Yerushalayime.[148]

²¹Izkiya mumane kufua, muanende wa balume Menashe kumupingana mu bukalenga.