Read Tshiluba 2 Bakalenga 6 Bible Online

2 Bakalenga 6 - Tshiluba bible

2 Bakalenga 6

¹Dituku dikuabu, bantu ba mu tshisumbu tshia bambi, kuambila mfumuabu Elisha ne: — Tangila nzubu utudi badisangisha nebe ewu, kena mutukumbane to. Udi mupite bukese.

²Anyisha, tuye ku muelelu wa Yardene, bua muntu yonsu wa kutudi atape mutshi munene, bua tuetu kuasa nzubu mupiamupia wa tshisangilu muaba ewu. Muambi Elisha kubandamuna ne: — Ndayi.

³Kadi muambi mukuabu wa ku bambi abu, kuandamuna ne: — Mfumu, mbimpe tuye nebe! Muambi Elisha kuandamuna ne: — Eyowa, ndi nya nenu.

⁴Nanku, kuyaye nabu ku muelelu wa Yardene. Kutapabu mitshi muaba awu.

⁵Kadi, pavua muntu mukuabu wa kudibu utapa mutshi, tshisuyi tshiende kukukatshi mu mulabi, kumata mu mayi. Muntu awu kuela diyi ne: — Mfumuanyi, ndiakabi kaayi edi! Tshisuyi tshivua tshia bende tshisomba!

⁶Muambi Elisha kumukonka ne: — Tshisuyi ntshimate muaba kaayi? Muntu awu kumuleja muaba uvua tshisuyi tshimatshile. Ke muambi Elisha kukosa tshitupa tshia mutshi, kutshiela muaba uvua tshisuyi tshimatshile awu. Diakamue tshisuyi kulelematshi.

⁷Muambi Elisha kuambila muntu awu ne: — Angata tshisuyi tshiebe. Muntu awu kuolola amu tshianza, kuambula tshisuyi tshiende.

⁸Tshikondu tshivua mukalenga wa bena Siriya uluisha bena Izrayele, kuyukilaye ne balombodi ba bena mvita bende. Kubambilaye muaba uvuaye musue bua bena mvita bende kuasa mitanda yabu.

⁹Kadi muambi Elisha kutuma bantu kudi mukalenga wa bena Izrayele bua kumuambila ne: — Nudimuke! Kanuena mua kupitshila muaba kampande awu to, bualu bena mvita ba bena Siriya badiku.

¹⁰Nanku mukalenga wa bena Izrayele uvua mua kutuma bena mvita bua batentekele muaba awu. Misangu yonsu ivua bena mvita ba bena Siriya badilongolola bua kuluisha bena Izrayele, muambi Elisha uvua anu umanyisha mukalenga wa bena Izrayele. Nanku mukalenga wa bena Izrayele uvua anu mudimuke.

¹¹Bu muvua mukalenga wa bena Izrayele mudianjile kumanya tshifufu tshionsu tshia mukalenga wa bena Siriya, bualu ebu kutonda mukalenga wa bena Siriya bikole bitambe. Nanku mukalenga wa bena Siriya kubikidisha balombodi ba bena mvita bende, ubakonka ne: — Munkatshi muetu mudi muntu udi uya kuambila bena Izrayele malu. Kanuena basue kungambila dina dia muntu awu bua tshinyi?

¹²Mulombodi mukuabu wa bena mvita kumuandamuna ne: — Mukalenga, munkatshi muetu kamuena muntu udi uya kuamba malu to! Kadi muambi Elisha udi mu Izrayele, udi umanyisha mukalenga wende wa bena Izrayele malu onsu, too ne audi wakula mu tshibambalu tshiebe tshia bulalu.

¹³Ke mukalenga wa bena Siriya kutuma diyi ne: — Ndayi, numone muaba udi muambi Elisha musombe, bua ntume bantu baye kumukuata. Bobu bamane kumuambila ne: — Muambi Elisha udi ku Dotane.[22]

¹⁴Mukalenga wa bena Siriya kutuma bena mvita ba bukitu ku Dotane. Bena mvita abu, bavua baye ne matempu a mvita ne nyama ya tubalu. Kufikabu mu tshimenga atshi butuku, kutshinyungulula.

¹⁵Butshia dinda, muena mudimu wa muambi Elisha ubika bua kupatuka mu tshimenga, kumonaye bena mvita, nyama ya tubalu ne matempu a mvita, binyungulula tshimenga. Muena mudimu kuela diyi ne: — Eyi, mfumuanyi! Netuenze tshinyi?

¹⁶Muambi Elisha kumuandamuna ne: — Kutshinyi to! Batudi nabu tuetu mbapite badibu nabu ku bungi.

¹⁷Muambi Elisha kutendelela Maweja-Nangila, wamba ne: — Maweja-Nangila, tabaja mesu a muena mudimu ewu bua kumonaye. Maweja-Nangila kutabaja mesu a muena mudimu wa muambi Elisha. Muena mudimu kumona muambi Elisha, bamuela munkatshi kudi mikuna, pa mikuna apu pikala nyama ya tubalu ya bungi, ne matempu a mvita atema kapia.[23]

¹⁸Kadi, bena mvita ba bena Siriya kusemena pabuipi ne muambi Elisha. Muambi Elisha kutendelela kabidi Maweja-Nangila, wamba ne: — Maweja-Nangila, ufofamije mesu a bena mvita aba. Ke Maweja-Nangila kufofamija mesu abu, bu muvua muambi Elisha mulombe.

¹⁹Pashishe, muambi Elisha kuambila bena mvita abu ne: — Nudi bapambuke njila. Kabena banutuma mu tshimenga etshi to. Nundonde, bua mufikishe kudi muntu unudi nukeba. Kadi muambi Elisha kuya nabu mu tshimenga tshia Samariya.

²⁰Bafike mu tshimenga atshi, muambi Elisha kutendelela kabidi Maweja-Nangila, wamba ne: — Maweja-Nangila, mpindiewu tabaja kabidi mesu a bena mvita aba bua bamone. Maweja-Nangila mumane kutabaja mesu abu, kumonabu bakadi mu tshimenga tshia Samariya.

²¹Anu mukalenga wa bena Izrayele umona bena mvita abu bonsu, kukonkaye muambi Elisha ne: — Tatu wanyi, mbimpe kubashipa anyi?

²²Muambi Elisha kuandamuna ne: — Nansha, kuena mua kubashipa to. Bantu badi bantu bebe bakuata mu mvita, utu ubashipesha anyi? Nanku bantu aba, ubapeshe biakudia ne bia kunua. Pashishe, ubalekele, bapingane kudi mukalenga wabu.

²³Nanku, mukalenga wa bena Izrayele kubalambishila biakudia bia bungi. Bobu bamane kujikija kudia ne kunua, mukalenga wa bena Izrayele kubalekela. Kupinganabu kudi mukalenga wabu wa bena Siriya. Biangatshile tshikondu atshi, bena mvita ba bena Siriya, kabavua bafika kabidi mu buloba bua bena Izrayele to.

²⁴Mu tshikondu tshikuabu, Benadade, mukalenga wa bena Siriya, kusangisha bena mvita bende bonsu bua kuya kuluisha tshimenga tshia Samariya.

²⁵Mu tshimenga atshi, muvua tshiyole tshia nzala tshikole tshitambe. Bualu bena mvita abu, bavua balama tshimenga atshi bikole. Nanku bena tshimenga kusumbishangana mutu wa nyama wa mpunde, ku nkanu mitoke ya mushinga mukole muanda mukulu, ne kilo umue wa nkunde[24] ku nkanu mitoke ya mushinga mukole itanu.

²⁶Dituku dikuabu, mukalenga wa bena Izrayele uvua wenda pa tshimana tshia tshimenga. Mukaji mukuabu kumuela diyi ne: — Mfumuanyi, ungambuluishe!

²⁷Kadi mukalenga kumuandamuna ne: — Pikala Maweja-Nangila kayi ubambuluisha, meme nenkuambuluishe ne tshinyi? Bualu kakuena kushala ntete ya kuenza bukula nansha maluvu.

²⁸Kadi mukalenga kumukonka kabidi ne: — Tshiudi ujinga ntshinyi? Mukaji kuandamuna ne: — Udi mumone mukaji ewu anyi? Dituku dikuabu uvua mungambile ne: tudie muanebe wa balume lelu, patshiabu netudie wanyi.

²⁹Nanku tuetu bamane kulamba muananyi[25] wa balume, badie, butshia dinda, meme kumuambila bua afike ne muanende wa balume bua tuetu kudia. Kadi kumusokokaye.

³⁰Mukalenga wa bena Izrayele umvua anu mukaji umulondela bualu abu, kudipanda bilamba. Mukalenga utshivua pa tshimana tshia tshimenga. Nanku bantu bonsu ba mu tshimenga atshi kumonabu ne: mukalenga udi muvuale anu tshilamba tshia munda tshikayabale nkayatshi,[26] tshimulamate pambidi.

³¹Mukalenga kuela diyi ne: — Dilolu edi, pangikala tshiyi mukose mutu wa Elisha, muana wa Shafate, Mvidi Mukulu annyoke ne dinyoka dikole.

³²Diba adi, muambi Elisha uvua wenza tshisangilu ku nzubu kuende ne bakulu ba mu tshimenga. Nanku mukalenga Yorame wa bena Izrayele kutuma muntu kudi Elisha. Kadi muntu awu kayi muanji kufika, Elisha kuambila bakulu abu ne: — Monayi bualu bua dikema! Mukalenga Yorame, mushipianganyi ewu, udi utuma muntu bua kunkosa mutu. Nudimuke, muntu awu yeye mufike, nuinjile tshiibi bua kabuedi to. Tukadi tunwua mene mukalenga Yorame pende ulonda muntu awu panyima.

³³Patshivua Muambi Elisha wakula, ke mukalenga[27] kufika, wamba ne: — Maweja-Nangila ke udi unkengesha nunku! Kadi tshia nsongu tshindi mua kutekemena kabidi kudiye ntshinyi?