Read Tshiluba 1 Kulondolola 10 Bible Online

1 Kulondolola 10 - Tshiluba bible

1 Kulondolola 10

¹Dinga dituku, bena Peleshete kubunda bena Izrayele pa mukuna wa Ngilbowa,[74] Bena Izrayele kunyema, bakuabu kufua ba bungi.

²Bena Peleshete kulondakaja nangananga Shawule ne bana bende. Kushipabu bana ba mukalenga Shawule basatu: Yonatane, Abinadabe ne Malkishuwa.

³Diba adi bena mvita kutshintshimika Shawule. Pavua bedi ba mikete bamumona, kubangaye kuzakala bikole.

⁴Shawule kuambila muntu uvua mumuambuile bia mvita ne: — Angata muele webe, unshipe. Bualu tshiena musue bua banshipe kudi bena Peleshete aba to. Bantu ba tshisamba tshikuabu aba bobu banshipe, badi mua kunseka. Kadi muntu awu kubenga, bualu uvua ne bowa bua kushipa mukalenga. Ke Shawule kuasa muele wende panshi, kudielapu, kufua.

⁵Muntu uvua umuambuila bia mvita awu, umona ne mfumuende wafu, kuasaye wende muele panshi, kudielapu, kufua pende.

⁶Ke diku dia bukalenga kubutuka nanku. Shawule kufua dituku dimue ne bana bende basatu.

⁷Bena Izrayele bavua base mu tshibandabanda,[75] bumvue lumu ne: tshiluilu tshia bena Izrayele ntshinyeme, kabidi Shawule ne bana bende mbafue mu mvita, kunyemabu pabu, kumuka mu bimenga biabu. Bena Peleshete kuvua kuasamu.

⁸Butshia dinda, bena Peleshete kuya bua kuangula bintu bia bantu bafue. Kusanganabu tshitalu tshia Shawule ne bia bana bende ba balume pa mukuna wa Ngilbowa.

⁹Kukosabu tshitalu tshia Shawule mutu, kuangata mutu wa Shawule ne bia mvita biende. Kuendakanabu nabi mu ditunga diabu dijima, bua kutangalaja lumu lua disanka elu munkatshi mua mvidie yabu ne munkatshi mua bantu babu.

¹⁰Pashishe kutekabu bia mvita bia Shawule abi mu nzubu mukuabu wa ku nzubu ya mvidie yabu. Kuasabu kabalubalu ka mutu wende ku tshimana tshia nzubu wa mvidie Dagone.

¹¹Bena mu tshimenga tshia Yabeshe mu Ngilaade,[76] kupetabu lumu lua bionsu bivua bena Peleshete benzela Shawule.

¹²Bantu ba mu Yabeshe bavua ne dikima, kuya kuambula tshitalu tshia Shawule ne bia bana bende bua kupingana nabi mu Yabeshe. Kujikabu mifuba yabu muinshi mua mutshi wa kampanga-nzevu, wa mu Yabeshe. Kushalabu bajila biakudia matuku muanda mutekete.

¹³Shawule uvua mufue bualu uvua mutombokele Maweja-Nangila. Uvua mubenge diyi diende. Uvua muye kutempa, bua mikishi imuambile malu avuaye uyikonka,[77]

¹⁴pa mutu pa kukonka Maweja-Nangila. Mvidi Mukulu kumushipa, kupingaja Davide, muana wa Ishayi mu bukalenga.