Read Tshiluba 1 Kulondolola 11 Bible Online

1 Kulondolola 11 - Tshiluba bible

1 Kulondolola 11

¹Bisamba bionsu bia bena Izrayele, kuya kudi Davide mu Ebrone.[78] Kumuambilabi ne: — Tudi bena muntu. Tudi bena diku diebe.

²Kadi kale patshivua Shawule mukalenga, ukavua ulombola bena Izrayele mu mvita yabu. Kabidi Maweja-Nangila Mvidi Mukulu webe ukavua mumane kukuambila ne: “Wewe Davide newikale mukalenga wa bantu banyi bena Izrayele. Newikale mfumuabu.”

³Bakulu bonsu ba bena Izrayele kuya kudi mukalenga Davide mu tshimenga tshia Ebrone. Davide kutua nabu ndondu kumpala kua Maweja-Nangila. Bobu kumujidila bua ashale mukalenga wa bena Izrayele, bua kukumbaja diyi dia Maweja-Nangila divua Samuwele muambe.

⁴Davide ne bena Izrayele bonsu kuya kuluisha bena mu tshimenga tshia Yerushalayime. Bavua batshinyika kabidi dina dia ne: Yebusa,[79] bualu bena Yebusa bavua basa mu buloba abu, ke bavua basomba mu tshimenga atshi.

⁵Bena Yebusa kuambila Davide ne: — Kuakubuela mu tshimenga tshietu to! Kadi Davide kukuata nzubu mukolesha ne bimana uvua pa mukuna wa Siyone. Bantu kushisha kuinyika mukuna awu ne: “Tshimenga tshia Davide.”

⁶Davide kuamba ne: “Muntu wadianza kushipa muena Yebusa, neashale mfumu mulombodi wa bena mvita bonsu.” Nanku Yowabe, muana wa Seruya, kudianza kushipa muena Yebusa. Ke yeye kushala mfumu wa tshiluilu.

⁷Davide kuya kusomba mu tshimenga tshibaka ne bimana bikolesha. Ke padibu batshinyika ne: “Tshimenga tshia Davide.”

⁸Pashishe Davide kuibaka nzubu mikuabu ivua nunyungulule muaba uvuabu binyika ne Milo. Kadi, Yowabe uvua ulongolola miaba mikuabu ya mu tshimenga.[80]

⁹Nanku bukole bua Davide buvua buende buvulangana, bualu Maweja-Nangila wa bena Izrayele uvua nende.

¹⁰Davide uvua ne bena mvita ba bukitu. Bobu pamue ne bena Izrayele, kukokela Davide mukalenga wabu, muvua Maweja-Nangila muambe. Kushalabu bamulamate matuku onsu avuaye mu bukalenga.

¹¹Mena a bena mvita ba Davide bavua ne bukitu avua nenku[81]: Ishebaale, muena Akmoni, uvua mfumu wa “Tshisumbu tshia bena mvita Makumi asatu.” Dituku dikuabu, Ishebaale uvua mushipe bantu nkama isatu mu mvita ne musongolu.

¹²Elazare, muana wa Dodo, muena Akowa, uvua wa mu “Tshisumbu tshia bena mvita basatu.”

¹³Elazare uvua pabuipi ne mukalenga Davide mu musoku wa Pase-Damime, tshikondu tshivua bena Peleshete badisanga bua kubaluisha. Bena mvita ba bena Izrayele kunyemabu. Muaba awu muvua budimi bua ntete ya orje.

¹⁴Elazare ne bantu bavuaye nabu bavua bela mualu wa mvita munkatshi mua budimi abu. Kutangalajabu bena Peleshete, kubatshimuna. Maweja-Nangila uvua muambuluishe bena Izrayele bua batshimune, badie lumu.

¹⁵Dituku dikuabu, pavua bena Peleshete basa mu tshibandabanda tshia bena Refayime, bantu basatu ba mu “Tshisumbu tshia bena mvita Makumi asatu” kuya kudi Davide mu lubuebue luvua pabuipi ne nyongolu wa Adulame.[82]

¹⁶Davide uvua musokome mu muaba wende mukole. Kadi mulombodi wa buloba wa bena Peleshete, uvua mu musoku wa Davide wa Betleyeme.

¹⁷Davide kumvua nyota, kukonka bantu bende ne: — Udi mua kumpesha mayi a kunua, a mu tshiina tshia mayi tshidi ku tshiibi tshia mu Betleyeme nnganyi?

¹⁸Nanku bena mvita bende basatu, kupitshila munkatshi mua mitanda ya bena Peleshete. Kusunabu mayi mu tshiina atshi. Kuyabu kupa Davide. Kadi, Davide kavua musue kunua mayi awu to. Kuitshikijaye panshi bua kualambula Maweja-Nangila,

¹⁹wamba ne: — Mvidi Mukulu wanyi, meme tshiena mua kunua mayi aa to! Bualu meme munue mayi aa, ndi bu muntu munue mashi a bantu bavua baye kusuna mayi aa, bualu bavua bamba kufua pa kuasuna. Nanku Davide kubenga bua kunua mayi awu. Ke muvua bena mvita basatu abu baleja bukitu buabu nanku.

²⁰Abishayi, muanabu ne Yowabe, ke uvua mfumu wa “Tshisumbu tshia bena mvita Makumi asatu.” Abishayi uvua mushipe dituku dimue bantu nkama isatu ne musongolu. Nanku Abishayi kupeta lumu lunene mu “Tshisumbu tshia bena mvita Makumi asatu” atshi.

²¹Uvua mumanyike bikole munkatshi muabu, mubapite bonsu ku bukitu. Nanku, kushalaye kabidi mfumuabu. Kadi kavua mupite “Tshisumbu tshia bena mvita basatu” to.

²²Benaya wa mu tshimenga tshia Kabseyele, muana wa Yoyada, ne muikulu wa muena mvita wa bukitu, uvua muleje bukitu buende misangu ya bungi. Benaya ke uvua mushipe ba Ariyele[83] babidi ba bena Mowabe. Dituku dikuabu, tshikondu tshivua mvula wa neje uloka, Benaya kubuela mu tshiina tshia mayi, bua kushipa nyama wa ntambue uvua mu tshiina amu.

²³Benaya kabidi uvua mushipe muena Ejipitu, muntu mule wa kafiondu, muntu wa metre abidi ne tshitupa, uvua ne musongolu munene mufuanangane ne mubambu wa kukuma nawu madiba. Benaya uvua ne mutshi wa patupu. Kubundaye muntu awu mvita, kumunyengaye musongolu wende, kumushipa nawu.

²⁴Ke malu avua Benaya muenze, mamupeteshishe lumu munkatshi mua tshisumbu tshia bena mvita ba bukitu makumi asatu.

²⁵Benaya uvua mumanyike bikole munkatshi mua tshisumbu tshia bena mvita Makumi asatu. Kadi kavua mupite “Tshisumbu tshia bena mvita basatu” to. Davide kumuteka mulombodi wa bena mvita bavua ne bua kulama mukalenga.

²⁶Mena a bakuabu bena mvita avua nenku: Ashayele muanabu ne Yowabe, Elanane muana wa Dodo wa mu musoku wa Betleyeme,

²⁷Shamote wa mu tshimenga tshia Arore, Elese muena mu tshimenga tshia Palone,

²⁸Ira muana wa Ikeshe muena mu Tekowa, Abiyezere wa mu tshimenga tshia Anatote.

²⁹Sibkayi wa mu tshimenga tshia Usha, Ilayi wa mu tshimenga tshia Akowa,

³⁰Marayi wa mu tshimenga tshia Netofa, Elede muana wa Baana wa mu Netofa,

³¹Itayi muana wa Ribayi wa mu tshimenga tshia Ngibeya mu buloba bua Binyamine, Benaya wa mu tshimenga tshia Piratone,

³²Urayi wa ku misulu ya mu Ngaashe, Abiyele wa mu tshimenga tshia Bete-Araba,

³³Azmavete wa mu tshimenga tshia Bakurime, Eliyaba wa mu tshimenga tshia Shaalbone,

³⁴bana ba balume ba Asheme muena mu Ngizone, Yonatane muana wa Shage muena mu Arare,

³⁵Akiyame, muana wa Sakare, muena mu Arare, Elifale muana wa Ure,

³⁶Efere muena mu Mekere, Akiya muena mu Palone,

³⁷Esro muena mu Karmele, Naarayi muana wa Ezbayi,

³⁸Yowele muanabu ne Natane, Mibare muana wa muena Agri,

³⁹Seleke muena Amone, Narayi muena mu Beyerote, muambudi wa bia mvita bia Yowabe, muana wa Seruya,

⁴⁰Ira wa mu diku dia Yetere, Ngarebe wa mu diku diabu,

⁴¹Uriya muena Iti, Zabade muana wa Alayi,

⁴²Adina muana wa Shiza, wa mu bamfumu ba tshisamba tshia Rubene, uvua ne bena mvita makumi asatu,

⁴³Anane muana wa Maaka, Yosafate wa mu Metene,

⁴⁴Uziya wa mu Ashetarote, Shama ne Yeyele bana ba balume ba Otame wa mu Aroyere.

⁴⁵Yediyayele, muana wa Shimri, ne Yoka wabu wa mu Tise.

⁴⁶Eliyele wa mu Makaya, Yeribayi ne Yoshavya bana ba balume ba Elname, Itma wa mu ditunga dia Mowabe,

⁴⁷kabidi ne Eliyele, Obede ne Yashiyele ba mu Soba.[84]