Read Tshiluba 1 Kulondolola 13 Bible Online

1 Kulondolola 13 - Tshiluba bible

1 Kulondolola 13

¹Davide kubuela mu tshipangu ne bamfumu ba bisumbu bishilangane bia bena mvita, pamue ne bakulu bakuabu.

²Pashishe kuambilaye bena Izrayele bonsu basangile ne: — Panuikala banyishe, kabidi pikala Maweja-Nangila Mvidi Mukulu wetu muanyishe, tutumayi mukenji lukasa kudi bena kuetu badi bashala mu buloba bujima bua bena Izrayele, nangananga kudi batuangaji ne kudi bena Levi badi basomba mu bimenga ne mu misoku idibu nayi mutumba. Tubabikile, bafike kutudi.

³Diba adi netupingaje mushete wa tshijila wa Mvidi Mukulu wetu muetu. Bualu tuvua baulengulule mu tshikondu tshia Shawule.

⁴Bantu bonsu kumona ne: lungenyi alu nduimpe. Kujadikabu bua kulukumbaja.

⁵Davide kubikidisha bena Izrayele bonsu, biangatshile ku bavua basomba kuinshi mu ditunga ku mikalu ne bena Ejipitu, too ne ba ku mutu mu ditunga, ku tshimenga tshia Lebo-Amate. Uvua mubabikile bonsu bua kuya kuangata mushete wa tshijila mu tshimenga tshia Kiriyate-Yeyarime.[90]

⁶Davide ne bena Izrayele bonsu kuya mu tshimenga tshia Baala, mmumue ne Kiriyate-Yeyarime, mu tshisamba tshia bena Yuda, bua kuangata mushete. Mushete awu uvua mujidila Mvidi Mukulu, udi usomba pa mutu pa bakerubine.[91]

⁷Uvua mu nzubu mua Abinadabe. Kuutekabu mu ditempu dipiadipia divuabu baludika kudi Uza ne Akiyo.

⁸Davide ne bena Izrayele bonsu bavua benda basanka muabu muonsu, kumpala kua Mvidi Mukulu. Bavua bimba misambu ne biombelu bia mishindu yonsu: nzenze, ngoma, ndibu ne mpungi.

⁹Kadi bafike amu pabuipi ne tshituilu tshia Kidone,[92] ngombe kusua kukulula mushete wa tshijila. Uza kukuata mushete bua kaukuluki nansha.

¹⁰Ke Maweja-Nangila kumufikila munda, kumunyoka bualu uvua mulenge mushete. Uza kufua, Maweja-Nangila mumone.

¹¹Davide kunyingalala bua pavua Maweja-Nangila mushipe Uza mushindu awu. Kuinyikaye muaba awu dina dia Peresa-Uza.[93] Dina adi didiku too ne lelu.

¹²Dituku adi Davide kutshina Maweja-Nangila, wamba ne: — Mushete wa tshijila wa Mvidi Mukulu kawena mua kufika kuanyi to.

¹³Davide kubenga bua kufikabu ne mushete awu kuende mu Tshimenga tshia Davide. Kadi kuutekeshaye mu nzubu mua Obede-Edome muena Ngate.

¹⁴Mushete kushala mu nzubu amu ngondu isatu. Maweja-Nangila kuela Obede-Edome lupemba ne bena nzubu wende. Kumuvudijilaye ne bintu biende.[94]