Read Tshiluba 1 Kulondolola 15 Bible Online

1 Kulondolola 15 - Tshiluba bible

1 Kulondolola 15

¹Davide kuibakisha nzubu mu Tshimenga tshia Davide. Kulongololaye muaba mukuabu, kuasayemu ntenta bua kuteka mushete wa tshijila wa Mvidi Mukulu.

²Nenku kuambaye ne: — Amu bena Levi nkayabu ke badi mua kuambula mushete wa tshijila. Mvidi Mukulu uvua mubasungule amu bobu bua bikale bambudi ne bakubi ba mushete awu[99] kashidi.

³Davide kusangisha bena Izrayele bonsu mu Yerushalayime, bua kuangata mushete, kuuteka muaba uvuabu bakongoluele.

⁴Kusangishaye batuangaji, ndelanganyi ya Arone, kabidi ne bena Levi.

⁵Munkatshi mua bena Levi muvua mfumu Uriyele pamue ne bantu bakuabu lukama ne malumi abidi, bena mu diku dia Kekate;

⁶kuvua mfumu Ashaya ne bantu nkama ibidi ne makumi abidi, bena mu diku dia Merari;

⁷kuvua mfumu Yowele ne bantu bakuabu lukama ne makumi asatu, bena mu diku dia Ngershone;

⁸kuvua mfumu Shemaya ne bantu bakuabu nkama ibidi, bena mu diku dia Elishafane;

⁹kuvua mfumu Eliyele ne bantu bakuabu makumi muanda mukulu, bena mu diku dia Ebrone;

¹⁰kuvua mfumu Aminadabe ne bantu bakuabu lukama ne dikumi ne babidi, bena mu diku dia Uziyele.

¹¹Davide kubikidisha batuangaji Sadoke ne Abiyatare, ne bena Levi aba: Uriyele, Ashaya, Yowele, Shemaya, Eliyele ne Aminadabe.

¹²Kubambilaye ne: — Nuenu nudi ku mutu kua meku a bena Levi. Nudikobolole nuenu ne bena meku enu. Pashishe nuye kuangata mushete wa Maweja-Nangila, Mvidi Mukulu wa bena Izrayele, bua kuya kuuteka muaba undi muulongoluele.

¹³Musangu wa kumpala kanuvuapu. Ke pavua Maweja-Nangila Mvidi Mukulu wetu mutunyoke ne dinyoka dia lufu. Bualu katuvua balonde bulongolodi budiye musue.[100]

¹⁴Nenku batuangaji ne bena Levi kudikobolola bua kuambula mushete wa tshijila.

¹⁵Bena Levi kuambula mushete wa ndondu, mubueja ku mitshi. Kuutekabu pa makaya, bilondeshile diyi divua Maweja-Nangila muambile Moshe.[101]

¹⁶Davide kuambila balombodi ba bena Levi bua basungule mu meku abu, bena misambu, bikale ne bisanji, nzenze ne ndibu, badi mua kuimba misambu ne diyi dikole dia disanka.

¹⁷Nenku bena Levi kusungula Emane, muana wa Yowele, ne muanabu Ashafe, muana wa Berekiya, kabidi ne Etane, muana wa Kushaya wa mu diku dia Merari.

¹⁸Bobu bavua balombola, kadi bakuabu bavua babambuluisha. Ke mena a balami ba biibi: Zekarya, Bene,[102] Yaziyele, Shemiramote, Yekiyele, Uni, Eliyabe, Benaya, Maasheya, Matitiya, Elifleku, Mikneya, Obede-Edome ne Yeyele.

¹⁹Bimbi ba misambu Emane, Ashafe ne Etane bavua bimba bikole ndibu ya tshiamu tshikunze.

²⁰Zekarya, Aziyele, Shemiramote, Yekiyele, Uni, Eliyabe, Maasheya ne Benaya bavua bobu ne nzenze ya meyi matue.[103]

²¹Matitiya, Elifleku, Mikneya, Obede-Edome, Yeyele ne Azaziya bavua bimba nzenze ya meyi manene[104] bua kuneemuna diyi.

²²Kenaniya,[105] mulombodi wa bena Levi bambudi ba mushete wa ndondu, uvua wenda utangila bambudi ba mushete, bualu uvua mumanye mudimu awu bikole.

²³Balami ba biibi, bavua pabuipi ne mushete, ke Berekiya ne Elkana.

²⁴Obede-Edome ne Yekiya kabidi bavua benda pabuipi ne mushete. Kadi batuangaji aba: Shebanya, Yosafate, Netaneyele, Amashayi, Zekarya, Benaya ne Eliyezere ke bavua benda bela mpungi kumpala kua mushete wa Mvidi Mukulu.

²⁵Davide, bakulu ba bena Izrayele, ne balombodi ba bisumbu bia bena mvita, bavua baya ne disanka kuangata mushete wa ndondu wa Maweja-Nangila, kua Obede-Edome.

²⁶Mvidi Mukulu uvua mulame bimpe bena Levi bavua bambula mushete. Nenku kulambulabu Mvidi Mukulu mulambu, wa ngombe milume muanda mutekete ne bimpanga muanda mutekete.

²⁷Davide, bena Levi bavua bambula mushete, bena misambu, ne Kenaniya mutangidi wa bambudi ba mushete,[106] bavua bavuala binkutu bia tshilamba tshienza ne buanda bua mitshi. Davide uvua muvuale kabidi tshilamba tshia muinshi tshia batuangaji, tshienza ne buanda bua mitshi.

²⁸Bena Izrayele bonsu kufika ne mushete wa tshijila mu Yerushalayime, batua tshianga, badidisha miadi ya mpungi mishilangane, ya ndibu, ya nkombe ne ya nzenze.

²⁹Diba divuabu bafika ne mushete mu Tshimenga tshia Davide, Mikale, muana wa bakaji wa Shawule, uvua mutangile pa dididishi. Kumonaye Davide uja maja a disanka. Kupepejaye Davide bikole.