Read Tshiluba 1 Kulondolola 17 Bible Online

1 Kulondolola 17 - Tshiluba bible

1 Kulondolola 17

¹Mukalenga Davide kuya kusomba mu nzubu wende wa bukalenga. Dituku dikuabu, Davide kuambila muambi Natane ne: — Ndi musombe mu nzubu muase ne mitshi ya sedre, kadi mushete wa ndondu wa Maweja-Nangila udi amu mu ntenta wa bilamba.[115] Udi wela meji munyi?

²Muambi Natane kumuandamuna ne: — Udi mumane kuela meji a kuenza bualu. Mbimpe, ukumbaje, bualu Mvidi Mukulu udi nebe.

³Kadi bufuku abu, Maweja-Nangila kuambila muambi Natane ne:

⁴— Ndaku kudi Davide, muntu wanyi, umuambile ne: Teleja tshidi Mvidi Mukulu wamba ne: ‘Wewe Davide, kuakungashila nzubu undi mua kusomba to.

⁵Bualu biangatshile dituku dimvua mupatule bena Izrayele mu Ejipitu too ne ku lelu, katshia tshiena muanji kusomba mu nzubu to. Kadi mvua amu musombe mu ntenta, ngendakana mu njila.

⁶Kabidi matuku onsu amvua ngendakana ne bena Izrayele, mvua musungule balombodi ba bungi bua kuludika bantu banyi. Kadi tshivua mudiwule nansha umue wa kudibu ne: kuena mungashile nzubu wa mitshi ya sedre bua tshinyi.’

⁷“Nanku, wambile kabidi Davide ne: Mvidi Mukulu wa bena Izrayele udi wamba ne: ‘Pautshivua wenza mudimu wa kulama mikoku mu mpata, meme kukumusha muaba awu, bua wewe kuikala mukalenga wa bantu banyi bena Izrayele.[116]

⁸Meme kukuambuluisha mu midimu yebe yonsu. Meme kubutula bena lukuna bebe bavua bakuluisha. Nenkupeteshe lumu lunene. Newikale mumanyike bu mudi bakalenga banene bonsu badi bamanyike bikole pa buloba.

⁹Nensungule bantu banyi bena Izrayele buloba bundi mbasombesha mu bupole, kabayi batshina muntu to. Tshisamba nansha tshimue tshia bantu ba muoyi mubi katshiena mua kubakengesha kabidi, mmuabu babakengesha bangabanga,

¹⁰tshikondu tshi-mvua muteke balombodi bua kulama bantu banyi bena Izrayele. Nemfuishe baluishi bebe bonsu bundu. Nanku, ndi nkumanyisha ne: meme Maweja-Nangila, nenkuashile nzubu.[117]

¹¹Pakumbana diba dia lufu luebe, nensungule muana umue wa ku bana bebe menemene, bua akupingane mu bukalenga. Nenshindike bikole bumfumu buende.[118]

¹²Muana awu ke wangibakila nzubu,[119] kabidi nenjadike ndelanganyi yende mu bukalenga kashidi.

¹³Nengikale tatuende, yeye neikale muananyi. Tshiakubenga kumuambuluisha, bu mumvua mubenge kuambuluisha mukalenga uvua mukudianjidile.[120]

¹⁴Nemmuteke mukalenga kabidi mulombodi wa tshisamba tshianyi kashidi, bualu bukalenga nebushale mu nzubu muende kashidi.’ ”

¹⁵Muambi Natane, kuambila Davide bionsu bivua Mvidi Mukulu mumuleje bua kumumanyisha.

¹⁶Pashishe mukalenga Davide kuya mu ntenta wa tshijila, kumpala kua Maweja-Nangila, bua kumutendelela. Uvua wamba ne: — Maweja-Nangila Mvidi Mukulu wanyi, ndi mumanye ne: nansha meme nansha bena diku dianyi, katuvua bakanyine mua kupeta bionsu biukadi mutuenzele ebi to.

¹⁷Kadi wewe, udi mumone ne: bionsu biudi mutuenzele kabiena bianji kukumbana. Nanku, utshidi ulaya malu adi atangila diku dianyi, ndelanganyi yanyi itshivuavua. Udi untangila bu muntu wa mushinga, pabi kabiyi nanku.[121] Maweja-Nangila Mvidi Mukulu wanyi,

¹⁸tshiena ne tshindi mua kuamba bua lumu luudi mumpeshe, bualu udi mummanye meme muntu webe.

¹⁹Bu muudi munnange, wewe kukumbaja malu onsu aa a kukema, bua kuleja bunene buebe.

²⁰Maweja-Nangila, kakuena udi mukufuane, kakuena Mvidi Mukulu mukuabu, amu wewe. Ke mutudi bumvue bantu bamba.

²¹Kakuena tshisamba tshikuabu pa buloba tshidi tshifuanangane ne tshia bena Izrayele. Wewe uvua mufike bua kupikula amu bena Izrayele ku bupika bua bena Ejipitu, bua kubenza tshisamba tshiebe wewe. Bena Izrayele badi bakutumbisha bua malu a dikema avua akuatshisha buowa, auvua muenze pauvua muipate bukua matunga kumpala kua tshisamba tshiebe.

²²Wewe kuangata bena Izrayele bua bashale tshisamba tshiebe kashidi. Ke wewe kushala Mvidi Mukulu watshi.

²³Kadi mpindiewu, Maweja-Nangila, ukumbaje bionsu biuvua muambe. Bionsu biuvua mundaye, meme ne ndelanganyi yanyi, bikumbane diba dionsu.

²⁴Eyowa, bionsu bikumbane. Nanku wewe newikale ne lumu kashidi. Bantu nebambe ne: “Mvidi Mukulu wa bena Izrayele, Mvidi Mukulu udi wambuluisha bena Izrayele, ke Maweja-Nangila, mfumu wa buloba bujima.” Wewe ujadike ndelanganyi yanyi mu bukalenga.

²⁵Bualu wewe Mvidi Mukulu ke uvua mumanyishe meji ebe a kumpesha ndelanganyi idi mua kumpingana mu bukalenga. Ke pandi muimane apa kumpala kuebe, nkutendelela.

²⁶Maweja-Nangila, wewe ke Mvidi Mukulu. Akya! Mpindiewu udi mundaye diakalenga edi!

²⁷Udi mushindike bua kuela diku dianyi lupemba, bua ndelanganyi yanyi ishale mu bukalenga kashidi kumpala kuebe. Maweja-Nangila, bu muudi wewe uyela lupemba, nenku neipete dikasa dimpe kashidi.[122]