Read Tshiluba 1 Kulondolola 18 Bible Online

1 Kulondolola 18 - Tshiluba bible

1 Kulondolola 18

¹Pashishe Davide kutshimuna bena Peleshete. Kushalabu ne bundu, bualu Davide uvua mubanyenge tshimenga tshia Ngate ne misoku ivua natshi mutumba.

²Davide kutshimuna kabidi bena Mowabe. Kushalabu bantu bende, bamulambula bitadi.

³Adadezere uvua mukalenga wa bena Soba mu ditunga dia bena Arame. Uvua utangalaja bumfumu buende too ne ku tshimenga tshia Amate.[123] Tshikondu tshivua Adadezere ukeba mua kukuata buloba buvua ku musulu wa Perate, Davide kumutshimuna.

⁴Davide kunyenga matempu tshinunu, babandi ba pa tubalu binunu muanda mutekete, ne bena mvita bavua benda ku makasa binunu makumi abidi. Davide kulama matempu ne nyama ya tubalu lukama. Kadi nyama ya tubalu yonsu ivua mishale kuyikosaye mijilu ya ku bikonu.

⁵Pashishe bena Arame ba mu Damase, kuvua kuambuluisha Adadezere mu mvita. Kadi Davide kubatshimuna kabidi, kushipa bantu ba kudibu binunu makumi abidi ne bibidi.

⁶Davide kuteka balombodi bende ba bukalenga mu Arame. Nanku bena Arame kushala ku bumfumu bua Davide, bamulambula bitadi. Ke muvua Maweja-Nangila mupeshe Davide bukole bua kutshimuna mvita yonsu nanku.

⁷Davide kunyenga ngabu ya tshiamu tshia mpawungi ivuabu nayi kudi bena mvita bavua balama Adadezere. Kuyaye nayi mu Yerushalayime.

⁸Kunyengaye kabidi biamu bikunze bia bungi, bivua mu tshimenga tshia Tibate ne tshia Kune. Bimenga ebi bivua ku bumfumu bua Adadezere. Kunyima kua bidimu, Shelomu uvua muenze ne tshiamu tshikunze atshi, dilongu dinene dia tshijengu, makunji ne bintu bionsu bia kuenza nabi mudimu mu nzubu wa Mvidi Mukulu.[124]

⁹Towu, mukalenga wa bena Amate, kumvaye muvua Davide mutshimune bena mvita bonsu ba Adadezere, mukalenga wa tshimenga tshia Soba.

¹⁰Kutumaye muanende Adorame kudi Davide, bua kumuela muoyi ne kalumbandi, bualu uvua mutshimune Adadezere. Bualu Adadezere uvua muluishi wa Towu. Adorame kutuadila Davide bintu bia mishindu miwle, bienza ne mpawungi, ne tshiamu tshitoke tshia mushinga mukole, kabidi ne tshiamu tshikunze.

¹¹Mukalenga Davide kujidila bintu abi mu dina dia Maweja-Nangila, bu muvuaye mujidile tshiamu tshitoke tshia mushinga mukole ne tshia mpawungi, bivuaye muangate mu matunga makuabu: a bena Edome, a bena Mowabe, a bena Amone, a bena Peleshete ne a bena Amaleke.

¹²Abishayi, muana wa Seruya, kutshimuna bena Edome mu tshibandabanda tshia Luepu,[125] kushipa bena mvita binunu dikumi ne muanda mukulu.

¹³Abishayi kubatekela balombodi. Bena Edome kushala ku bumfumu buende. Ke muvua Maweja-Nangila muambuluishe Davide bua atshimune mvita yende yonsu nanku.

¹⁴Davide kushala mukalenga wa bena Izrayele bonsu. Uvua ulongolola malu amu bimpe, kayi ne kansungansunga.

¹⁵Yowabe, muana wa Seruya, uvua mfumu mulombodi wa bena mvita ba Davide. Yosafate, muana wa Akilude, uvua mufikishi wa malu a mukalenga kudi bantu.

¹⁶Sadoke, muana wa Akitube, ne Abimeleke, muana wa Abiyatare, bavua batuangaji. Shavesha uvua mufundi.

¹⁷Benaya, muana wa Yoyada, uvua mulombodi wa bena Kereti ne bena Peleti, bena mvita bavua balama mukalenga Davide. Bana ba Davide bavua ne muanzu munene mu bukalenga buende.