Read Tshiluba 1 Kulondolola 19 Bible Online

1 Kulondolola 19 - Tshiluba bible

1 Kulondolola 19

¹Kupita matuku makese, mukalenga Nakashe wa bena Amone kufua. Muanende wa balume kumupingana mu bukalenga.

²Davide kuamba ne: “Ndi musue kuenzela Anune, muana wa Nakashe, bimpe. Bualu tatuende uvua mungenzele panyi nanku.’’ Ke Davide kutuma balombodi bakuabu ba mu bukalenga kudi Anune bua kumusamba mu madilu a tatuende. Balombodi ba mukalenga Davide bamane kufika mu ditunga dia bena Amone,

³balombodi ba mu bukalenga bua bena Amone, kuambila mukalenga wabu Anune ne: — Udi wela meji ne: Davide mmutume balombodi ba mu bukalenga buende amu bua kunemeka tatuebe ne kukusamba mu madilu a tatuebe anyi? Mmubatume bua bendakane mu ditunga, baditentekela bua badikuate dituku dikuabu.

⁴Nanku, Anune kukuatshisha balombodi ba mu bukalenga bua Davide abu. Kubabeyabu miedi. Kukosabu bilamba bivuabu bavuale, kushalabi bishikidila pa mataku. Kubalekelabu bua bapingane kuabu.

⁵Kumanyishabu Davide bionsu abi. Ke Davide kutuma bantu bua baye kuakidila balombodi ba mu bukalenga buende abu, bualu bavua ne bundu bua bungi. Mukalenga Davide kubatumina diyi ne: “Nusombele mu tshimenga tshia Yeriko too ne pikala miedi yenu mimene kabidi. Nanku nushishe kupingana apa.”

⁶Mukalenga Anune ne bena Amone kumona ne: Davide ukadi muluishi wetu. Nanku kuangatabu ku mudimu bena mvita ba bena Arame ba mu buloba bua Mezopotamiya wa kulu, ba bena Maaka ne bena Soba,[126] bikale ne matempu ne babandi ba pa nyama ya tubalu. Kufutabu bantu aba tshiamu tshitoke tshia mushinga mukole, tshia bujitu bua kilo binunu makumi asatu.

⁷Ke muvuabu bapete matempu a mvita binunu makumi asatu ne bibidi. Kuangatabu ne bena mvita ba mukalenga wa bena Maaka ku mudimu. Bena mvita aba kuya kuasa mitanda pabuipi ne tshimenga tshia Medeba.[127] Ke bena Amone kabidi kupatuka mu bimenga biabu, kuela mualu wa mvita.

⁸Davide upeta lumu lua didisangisha dia bena mvita abu, kutumaye Yowabe, mfumu wa tshiluilu tshiende lukasa lukasa, ne bonsu bavua bamanye mua kuluangana bikole.

⁹Bena Amone kuya kuela mualu wa mvita pabuipi ne tshiibi tshinene tshia tshimenga tshiabu. Bakalenga ba matunga bavua ne bua kubambuluisha abu, bavua pabu bela mualu wa mvita, bashilangane nabu mutantshi mu mpata.

¹⁰Yowabe umona ne: baluishi bende badi bitupa bibidi, aba kumpala, banga panyima, kusungulaye bena mvita ba bena Izrayele bavua bamanye mvita bikole. Kubatekaye batangilangane ne bena Arame.

¹¹Bena mvita bavua bashale, kubapeshaye muanabu Abishayi. Kubatekaye batangilangane ne bena Amone.

¹²Yowabe kuambila muanabu Abishayi ne: — Padi bena Arame bampite bukole, wewe neungambuluishe. Kadi padi bena Amone bakupite bukole, meme nenkuambuluishe.

¹³Nenku, kolesha muoyi, tuluangane mvita eyi ne bukitu, bua tupandishe bana betu ne bimenga bia Mvidi Mukulu wetu. Kadi Maweja-Nangila enze mudiye musue.

¹⁴Yowabe ne bena mvita kusemena bua kuluisha bena Arame. Bena Arame kunyema Yowabe.

¹⁵Bena Amone bamone bena Arame banyema, kunyemabu pabu Abishayi, muanabu ne Yowabe, kupinganabu ku tshimenga tshiabu. Ke Yowabe kupingana ku Yerushalayime.

¹⁶Bena Arame bamona ne: bena Izrayele mbatupite bukole, kubikidishabu bana babu bonsu bavua dia muamua dia musulu wa Perate. Bavua babalombola kudi Shofake, mfumu wa tshiluilu tshia Adadezere.[128]

¹⁷Davide kupeta lumu lua bualu ebu. Kusangishaye bena mvita bonsu ba bena Izrayele, kusabukabu Yardene. Kuyabu batangile kudi baluishi. Kuelabu mualu wa mvita pabuipi ne mualu wa mvita wa baluishi. Kutekaye bena mvita bende bua bele mualu, batangilangane ne bena Arame. Bena Arame kutuadija mvita.

¹⁸Kadi kunyemabu bena Izrayele. Davide ne bena mvita bende kushipa bantu binunu muanda mutekete, bendeshi ba matempu a mvita, ne bena mvita bavua benda ku makasa binunu makumi anayi. Kushipabu kabidi ne mulombodi wabu Shofake.

¹⁹Nanku, bakalenga bonsu bavua ku bumfumu bua Adadezere bamona ne: bena Izrayele mbatupite ku bukole, kumwanganabu ne Davide. Kushalabu ku bumfumu buende. Bituadije diba adi, bena Arame kabavua kabidi basue kuambuluisha bena Amone to.