Read Tshiluba 1 Kulondolola 21 Bible Online

1 Kulondolola 21 - Tshiluba bible

1 Kulondolola 21

¹Dituku dikuabu, Satane kukeba mua kuenzela bena Izrayele bibi. Kufikishaye Davide ku dibadika dia bena Izrayele.

²Mukalenga Davide kuambila Yowabe ne balombodi bakuabu ba bena mvita bende ne: — Ndayi mu ditunga dijima dia bena Izrayele, kuinshi kua ditunga too ne ku mutu, nubadike bantu. Pashishe nupingane bua kummanyisha, bualu ndi musue kumanya bungi bua bantu bonsu.

³Yowabe kuandamuna ne: — Mukalenga, meme ndi musue Maweja-Nangila avudije bena Izrayele misangu nansha lukama! Lelu bonsu bakadi amu bakuenzela mudimu. Kadi tshiudi ujingila kumanya bungi buabu ntshinyi? Muudi musue kufikishisha bena Izrayele ku dibenga diyi dia Mvidi Mukulu mbishi?[133]

⁴Kadi bu muvua mukalenga mushidishe bualu, Yowabe kuenza amu tshivua mukalenga muambe. Yowabe kuendakana ditunga dijima dia Izrayele. Pashishe kupinganaye mu Yerushalayime.

⁵Kumanyishaye Davide bungi bua bantu ne: bena Izrayele badi ne bantu 1.100.000 badi mua kuluangana mvita, bena Yuda ne bantu 470.000.

⁶Yowabe kawa mubadike tshisamba tshia bena Levi ne tshia bena Binyamine, pamue ne bisamba bikuabu to. Bualu diyi dia mukalenga kadivua dimusankisha nansha.

⁷Bivua Davide muenze bivua bibipile Mvidi Mukulu. Ke Mvidi Mukulu kunyoka bena Izrayele.

⁸Davide kuambila Mvidi Mukulu ne: — Pandi mubadike bena Izrayele, ndi muenze bibi bitambe. Ndi muenze bualu ebu, amu bu muntu udi kayi ne lungenyi! Maweja-Nangila, umfuile luse.

⁹Nenku Maweja-Nangila kuambila muambi Ngade, mufidi wa ngenyi wa mukalenga Davide, ne:

¹⁰— Ndaku kudi Davide, umuambile ne: “Maweja-Nangila udi wamba ne: Ndi nkufundila manyoka asatu, wewe usungule dindi mua kukunyoka.”

¹¹Muambi Ngade kuya kudi Davide, umuambila ne: — Maweja-Nangila udi wamba ne: “Tshiudi usungula ntshinyi?

¹²Udi musue ditunga diebe dishale mu tshiyole tshia nzala bidimu bisatu anyi? Udi musue kunyema baluishi bebe badi bakulondakaja ne muele ku bianza ngondu isatu anyi? Udi musue muele wa Mvidi Mukulu, disama dia tshiambu tshikole, dikengesha bena ditunga diebe matuku asatu anyi? Mutumibue wende neatangalaje disama edi mu ditunga diebe dijima dia Izrayele!” Ela meji bimpe, ungandamune tshindi mua kuya kuambila udi muntume.

¹³Davide kuandamuna ne: — Ndi munkatshi mua dikenga dikole… Kadi ndi musue kushala mu bianza bia Maweja-Nangila pa mutu pa kushala mu bianza bia bantu. Bualu Maweja-Nangila mmuena luse.

¹⁴Maweja-Nangila kutumina bena Izrayele tshipupu tshia disama dia tshiambu tshikole. Bena Izrayele kufua binunu makumi muanda mutekete.

¹⁵Pashishe Maweja-Nangila kutuma mutumibue wende mu Yerushalayime bua kubutula kabidi tshimenga. Kadi Maweja-Nangila umona muvua mutumibue ubutula bantu, kubengaye bua mutumibue katungunuki. Kuambilaye mutumibue ne: — Mbimane kukumbana, puekesha tshianza! Diba adi, mutumibue wa Maweja-Nangila uvua pabuipi ne muaba uvua Omane, muena Yebusa, ushipula ntete ya kuenza bukula.

¹⁶Davide uvua umona mutumibue, uvua ubutula bantu, muimane pankatshi pa diulu ne buloba, mutume muele wende luseke lua Yerushalayime. Davide ne bakulu ba ditunga bavua bavuale bilamba bia madilu, batue mpala panshi.

¹⁷Davide kuambila Mvidi Mukulu ne: — Meme ke uvua mutume diyi bua babadike bantu. Nenku meme ndi muenze bibi, ndi muenze tshilema! Bantu aba kabena benza bualu bubi to. Maweja-Nangila, Mvidi Mukulu wanyi, unnyoke meme ne bena diku dianyi, pa mutu pa kunyoka bantu bebe.

¹⁸Mutumibue wa Maweja-Nangila kuambila Ngade ne: — Ambila Davide aye mu tshituilu mudi Omane ushipuila ntete ya kuenza bukula. Ashilemu Maweja-Nangila tshilambuilu.

¹⁹Davide kuya muaba awu, bu muvua Maweja-Nangila mumutumine diyi kudi muambi wende Ngade.

²⁰Omane uvua ushipula ntete ya bukula. Omane ukudimuka, kumona mutumibue wa Mvidi Mukulu. Bana bende banayi bavua nende, bakavua baye kusokoma.

²¹Davide kuya kuvua Omane. Kadi Omane umona amu Davide, kumukaye mu tshituilu, kufika kuvua mukalenga Davide, kutua mpala panshi.

²²Davide kumuamba ne: — Nsumbisha muaba udi tshituilu tshiebe. Ndi musue kuibakamu tshilambuilu tshia Maweja-Nangila, bua kujikija tshipupu tshidi tshibuela mu bantu. Tshinsumbisha, nenkupeshe mushinga watshi mujima.

²³Omane kuandamuna ne: — Mukalenga, enza muudi musue, wangate tshionsu tshiudi natshi dijinga. Ke ngombe yanyi eyi, ndi nkupeshayi bua wewe kulambula. Ke matempu aa bua wewe kupeta bia kuosha nabi, kabidi ne ntete ya bukula bua mulambu wa bia pa madimi. Ndi nkupeshabi bionsu.

²⁴Kadi mukalenga Davide kubenga, wamba ne: — Kumpeshi tshintu nansha tshimue tshianana. Ndi musue kubisumba. Ndi nkufuta amu mushinga wabi mujima. Tshiena ndambula Maweja-Nangila bintu biebe, bualu tshiena mua kumulambula milambu indi tshiyi mutudile mushinga!

²⁵Davide kumufuta nkanu ya tshiamu tshia mpawungi nkama isambombu bua kusumba muaba awu.

²⁶Davide kuashila Maweja-Nangila tshilambuilu muaba awu. Kuambulaye Maweja-Nangila milambu ya kuosha ne ya bobumue. Pashishe kutuadijaye kutendelela Maweja-Nangila. Maweja-Nangila kuteleja Davide, kumutumina kapia. Kuoshaku milambu ivua pa tshilambuilu.

²⁷Nanku Maweja-Nangila kuambila mutumibue wende bua apingaje muele mu tshibubu.

²⁸Davide uvua mumone ne: Maweja-Nangila uvua muteleje dilomba diende mu tshituilu tshia Omane, muena Yebusa. Nenku ukavua utungunuka amu ne dilambula milambu misangu mivule mu tshituilu amu.

²⁹Mu tshikondu atshi, nzubu wa Maweja-Nangila, uvua Moshe muibake mu tshipela, ne tshilambuilu tshia milambu, bivua pa muaba wa tshijila pa mukuna wa Ngibone.[134]

³⁰Kadi Davide kawa mua kuya mu mukuna emu bua kukonka Maweja-Nangila malu to, bualu muele wa mutumibue wa Maweja-Nangila uvua umukuatshisha bowa.