Read Tshiluba 1 Kulondolola 22 Bible Online

1 Kulondolola 22 - Tshiluba bible

1 Kulondolola 22

¹Ke pavua Davide wamba ne: “Nzubu wa Maweja-Nangila Mvidi Mukulu udi apa. Monayi tshilambuilu tshidi bena Izrayele ne bua kulambuila milambu yabu.”

²Davide kukungija benyi[135] bonsu bavua base mu ditunga dia bena Izrayele. Kubapeshaye mudimu wa kusonga mabue a kuibaka nawu nzubu wa Mvidi Mukulu.

³Davide kulongolola kabidi biamu bifike bia bungi bua kuenza nabi misumadi, biibi ne nkanu. Kusangishaye kabidi biamu bikunze bia bungi kabiyi kubala.

⁴Bena Sidone ne bena Tire[136] kumutuadila mitshi ya sedre ya bungi.

⁵Davide uvua wamba ne: “Shelomu wanyi utshidi muana mukese, kena muanji kujingulula bimpe mudi panu. Kadi nzubu wa kuashila Maweja-Nangila udi ne bua kuikala ne lumu mu matunga onsu, bualu kabena mua kumupita nansha ne nku bunene nansha ne nku lumu. Ke mundi musue kulongolola bintu bua kuibaka nabi nzubu ewu.[137]” Ke muvua Davide mulongolole nanku bintu bia bungi bia kuibaka nabi, bangabanga ne lufu luende.

⁶Davide kubikidisha muanende Shelomu, kumuambila bua kuibakaye nzubu wa Maweja-Nangila Mvidi Mukulu wa bena Izrayele.

⁷Kumuambilaye ne: — Muananyi, mvua ne dijinga dia kuibakila Maweja-Nangila, Mvidi Mukulu wanyi, nzubu wa tshijila.

⁸Kadi Maweja-Nangila kubenga, kungambila ne: “Wewe uvua mupite kuela mashi a bantu panshi mu mvita minene iudi muluangane. Bua mashi adi mapueke panshi kumpala kuanyi, ki nguewe wangashila nzubu udibu bavua kuntendelela.

⁹Kadi neulele muana wa balume. Neikale muntu udi ukeba bupole. Tshiakuanyisha bua baluishi bende badi bamunyungulukila bamutatshishe. Nebamuinyike dina dia Shelomu, — mmumue ne: ‘Bupole’. — Bualu matuku ashalaye mu bukalenga, nempeshe bena Izrayele bupole, kabayi mua kutshina tshintu.

¹⁰Yeye ke wangashila nzubu. Yeye neikale muananyi wa balume, meme nengikale Tatuende. Meme ne-nshindike bukalenga buende mu ditunga dia bena Izrayele.[138]”

¹¹Nanku, muananyi, Maweja-Nangila Mvidi Mukulu webe, ikale nebe, bua umone mua kumuashila nzubu, bu muvuaye mulaye bualu buebe.

¹²Mvidi Mukulu akupeshe disunguluja dia malu ne lungenyi, padiye ukupesha bukalenga bua bena Izrayele, bua umone mua kuitaba ku mikenji yende.

¹³Paudi unemeka, witaba kabidi meyi ende ne mikandu, bivuaye mupeshe Moshe bua kuambila bena Izrayele, newikale ne diakalenga mu bionsu biwenza. Wewe, kolesha muoyi, ikala ne dikima, kutshinyi, kuzakadi.[139]

¹⁴Ndi muenze muonsu mua kuenza bua kusangisha mpawungi mupite bungi, kilo binunu bitoto bisatu, tshiamu tshitoke tshia mushinga mukole tshipite pa binunu bitoto makumi asatu, kabidi ne tshiamu tshikunze ne tshifike, bungi kabuyi kubala, amu bua nzubu wa Mvidi Mukulu. Ndi mumane kulongolola mitshi ne mabue. Udi mua kusakidila bintu bikuabu.

¹⁵Newikale ne bena mudimu ba mishindu yonsu: badi bamanye mua kusonga mabue, badi bamanye kupanda mabaya, nansha bamanyi bapiluke ba midimu yonsu.

¹⁶Udi ne mpawungi mipite bungi, biamu bitoke bia mushinga mukole, biamu bikunze ne bifike. Nenku mbimpe utuadije mudimu. Maweja-Nangila neikale nebe.

¹⁷Pashishe Davide kuambila bamfumu bonsu ba bena Izrayele bua kuambuluishabu muanende Shelomu. Uvua ubambila ne:

¹⁸— Maweja-Nangila Mvidi Mukulu wenu, kena nenu anyi? Katshia Mvidi Mukulu wafila bena ditunga edi mu bianza bianyi, nuakapeta bupole nseke yenu yonsu. Mpindiewu badi ku bumfumu bua Maweja-Nangila ne bua bantu bende.

¹⁹Nenku, mpindiewu enzayi muenu muonsu bua kumanya tshidi Mvidi Mukulu wenu musue. Tuadijayi kuashila Maweja-Nangila Mvidi Mukulu wenu muaba wa tshijila. Nutekemu mushete wa ndondu wa Maweja-Nangila ne bintu bia tshijila bia Mvidi Mukulu.