Read Tshiluba 1 Kulondolola 23 Bible Online

1 Kulondolola 23 - Tshiluba bible

1 Kulondolola 23

¹Mukalenga Davide mumane kukulakaja, kusungulaye muanende wa balume Shelomu bua ikale mukalenga wa bena Izrayele.[140]

²Pashishe kubikidishaye bamfumu bonsu ba bena Izrayele, kubikidisha kabidi batuangaji ne bena Levi bonsu.

³Kubalabu bantu bakulumpe ba bena Levi ku umue ku umue, bavua ne bidimu makumi asatu ne pa mutu. Bungi buabu buvua binunu makumi asatu ne muanda mukulu.

⁴Davide kusungula munkatshi muabu, bantu binunu makumi abidi ne binayi, bua bikale baludika midimu idibu benza ku nzubu wa Maweja-Nangila. Kusungulaye kabidi bantu binunu bisambombu bua bikale balongolola malu muaba awu, bakosa nsambu.

⁵Kusungulaye kabidi bantu binunu binayi bua bikale balama biibi, binunu binayi bikuabu bua bikale batumbisha Maweja-Nangila ne biombelu bivua Davide muenzeje bua kumutumbisha nabi.

⁶Kutapululaye bena Levi mu bisumbu bishilangane, bilondeshile mu meku abu: dia Ngershone, dia Kekate ne dia Merari. Bonsu basatu bavua bana ba balume ba Levi.

⁷Bana ba balume ba Ngershone bavua: Ladane ne Shimeyi.

⁸Ladane uvua ne bana ba balume basatu: Yekiyele, muanabute, Zetame ne Yowele.

⁹Shimeyi uvua ne bana ba balume basatu: Shelomite, Aziyele ne Arane. Bobu ke bavua bamfumu ba meku avua mafumine kudi Ladane.

¹⁰Shimeyi uvua ne bana bakuabu banayi[141]: Yakate, Ziza, Yewushe ne Beriya.

¹¹Yakate uvua muanabute, Ziza muana muibidi. Yewushe ne Beriya kabavua balela bana ba bungi to. Ke padibu bababala bu diku dimue.

¹²Kekate uvua ne bana ba balume banayi: Amrame, Ishare, Ebrone ne Uziyele.

¹³Bana ba Amrame badi: Arone ne Moshe. Arone ne ndelanganyi yende, bavua babajidila bua bikale benza mudimu kashidi[142] muaba wa tshijila menemene. Bavua ne bua kulambula milambu ya manananshi, kuenzela Mvidi Mukulu midimu, kuela bantu lupemba mu dina dia Maweja-Nangila.

¹⁴Moshe uvua muntu wa Mvidi Mukulu. Kadi bana bende bavua amu bu mudi bena tshisamba tshia Levi bonsu.

¹⁵Bana ba balume ba Moshe badi: Ngershone ne Eliyezere.

¹⁶Muana wa balume wa Ngershone ke Shebuwele muanabute.

¹⁷Eliyezere uvua ne muana wa balume umue: Rekabiya. Kavua ne bana bakuabu to. Kadi Rekabiya uvua ne ndelanganyi ya bungi.

¹⁸Ishare uvua ne muanabute, dina diende Shelomite.

¹⁹Bana ba balume ba Ebrone badi: Yeriya muanabute, muibidi Amariya, muisatu Yaziyele, ne muinayi Yekamame.

²⁰Bana ba balume ba Uziyele bavua babidi: Mika ne Ishiya.

²¹Bana ba balume ba Merari badi: Mali ne Mushi. Mali uvua ne bana ba balume babidi: Elazare ne Kishe.

²²Elazare kufua, kayi mulele bana ba balume. Uvua amu ne bana ba bakaji. Kuselabu bana abu kudi bana ba muanabu Kishe.

²³Mushi uvua ne bana ba balume basatu: ke Mali, Edere ne Yeremote.

²⁴Eyi ke ndelanganyi ya Levi. Bavua bamfumu ba meku abu. Bavua bafunde mena abu mu mikanda yabu, ku muntu ku muntu. Bobu bamane kukumbaja bidimu makumi abidi, bavua ne bua kuenza mudimu mu nzubu wa Maweja-Nangila.

²⁵Bualu Davide uvua muambe ne: “Maweja-Nangila Mvidi Mukulu wa Izrayele uvua mupeshe bantu bende bupole. Yeye muine udi ushala kashidi mu Yerushalayime.

²⁶Nenku bena Levi kabena ne bua kuambula kabidi ntenta wa kusambakena ne bintu bionsu bia mudimu wa kutendelela to.”

²⁷Ke kufundabu mena a bena Levi bavua bakumbaja bidimu makumi abidi mu mikanda, bu muvua Davide muambe.

²⁸Bavua babalombola kudi ndelanganyi ya Arone mu midimu yabu ya mu nzubu wa Mvidi Mukulu, ya mu lubanza, ya mu bibambalu bidi ku nseke kua nzubu. Bavua basukula ngesu ne malongu bia tshijila, bakumbaja midimu misunguluke ya mu muaba wa tshijila.

²⁹Bavua bosha mampa a tshijila a kulambula Mvidi Mukulu,[143] balongolola bukula bua mulambu wa bia pa madimi, — benza tukata tupepele katuyi tuela buanga, ne mikata mikanga pa tshitata, nansha bintu bisheme bikuabu. — Bavua bakenketa bipimu bia buwudi, nansha bia bule.

³⁰Bavua amu muaba awu dinda ne dilolu bua kutumbisha ne kusamuna Maweja-Nangila,

³¹nangananga misangu yonsu idibu bamulambula milambu ya kuosha, dituku dia Dikisha, dituku dia kumpala dia ngondu, nansha matuku makuabu a bibilu.[144] Diba dionsu badi ne bua kukumbaja midimu yabu kumpala kua Maweja-Nangila, bantu bikale bungi bukumbane buvuabu babafundile.

³²Nebalame bimpe ntenta wa kusambakena ne muaba wa tshijila. Bana babu bakuabu ba ku ndelanganyi ya Arone nebashale ne mudimu wa mu nzubu wa Maweja-Nangila.[145]