Read Tshiluba 1 Kulondolola 26 Bible Online

1 Kulondolola 26 - Tshiluba bible

1 Kulondolola 26

¹Bisumbu bia balami ba biibi bivua nenku: Meshelemiya, muana wa Kora, muikulu wa Abiyashafe,[156] wa mu diku dia Kora,

²uvua ne bana ba balume muanda mutekete. Bavua balondangane nenku: Zekarya, Yediyayele, Zebadya, Yatniyele,

³Elame, Yowanane ne Eliyokenayi.

⁴Bana ba balume ba Obede-Edome bavua muanda mukulu, balondangane nenku: Shemaya, Yozabade, Yowa, Sakare, Netaneyele,

⁵Amiyele, Isakare ne Pewultayi. Nenku Mvidi Mukulu uvua muele Obede-Edome lupemba bikole.[157]

⁶Shemaya, muanabute wa Obede-Edome, uvua ne bana ba balume bavua ne mianzu misunguluke mu diku diabu, bualu bavua bantu ba mushinga.

⁷Bana ba balume ba Shemaya bavua nenku: Otni, Refayele, Obede ne Elzabade, kabidi ne bana babu bakuabu: Eliku ne Semakya. Babidi aba bavua bantu ba lumu.

⁸Ndelanganyi ya Obede-Edome, ne bana babu balela, ne bana babu bakuabu, bavua bantu makumi asambombu ne babidi. Bonsu bantu ba mushinga, kabidi benji ba mudimu.

⁹Bana ba Meshelemiya,[158] ne bana babu, bavua dikumi ne muanda mukulu, bantu ba mushinga mukole.

¹⁰Osha wa mu diku dia Merari, uvua ne bana ba balume banayi: Shimri, mukulu wa diku (kawa muanabute to, kadi tatuende uvua mumupeshe muanzu awu), —

¹¹muana muibidi Ilkiya, muisatu Tebaliya, ne muinayi Zekarya. Bana ba Osha, pamue ne bana babu, bavua bantu dikumi ne basatu.

¹²Bena bisumbu bia balami ba biibi abi ne bamfumu babu, bavua benza mudimu wabu pamue mu nzubu wa Maweja-Nangila.

¹³Bavua batshinka bua kutapululangana biibi bia kulama, bilondeshile meku abu, kabayi basungula ne aba mbakulumpe, nansha ne aba mbana.

¹⁴Pavuabu batshinka, kupeshabu Shelemiya tshiibi tshia luseke ludi diba dipatukila.[159] Muanende Zekarya, muntu wa meji, mufidi wa ngenyi milenga, kumupeshabu tshiibi tshia luseke lua ku mutu.

¹⁵Obede-Edome ke uvua mupete bulami bua tshiibi tshia luseke lua kuinshi. Bana bende bavua balama bilaminu bia bintu.

¹⁶Shupime ne Osha bavua balama tshiibi tshia luseke ludi diba dibuelela, ne tshiibi tshia Shaleketa,[160] tshidi tshitangilangane ne tshibandabanda. Balami bavua babanyangana midimu mu bisumbu mushindu ewu:

¹⁷ku dituku dionsu, bena Levi basambombu bavua balama ku tshiibi tshia luseke ludi diba dipatukila; bantu banayi ku dituku, ku tshiibi tshia ku mutu; bantu banayi ku dituku, ku tshiibi tshia ku luseke lua kuinshi. Bisumbu bibidi bia bantu, babidi babidi ku tshisumbu, bavua balama bilaminu bia bintu.

¹⁸Kadi bua kulama tshibambalu tshivua tshilamakaja ku nzubu wa Mvidi Mukulu, luseke ludi diba dibuelela, bavua bateka bantu banayi ku njila, bantu babidi mu tshibambalu.[161]

¹⁹Ke muvua bisumbu bia balami ba biibi ba mu diku dia Kora, ne dia Merari, bavuabu bangate ku mudimu nanku.

²⁰Bena Levi bakuabu[162] bavua ne mudimu wa kulama bibutshilu bia mu nzubu wa Mvidi Mukulu, ne bintu bia tshijila bivuabu balambula Mvidi Mukulu.

²¹Ndelanganyi ya Ladane, ya mu diku dia Ngershone, bamfumu ba meku abu, bavua: Yekiyeli,

²²kabidi ne Zetame ne muanabu Yowele, bana ba balume ba Yekiyeli. Bavua ne mudimu wa kulama bibutshilu bia mu nzubu wa Maweja-Nangila.

²³Bua bena diku dia Amrame, dia Ishare, dia Ebrone ne dia Uziyele,

²⁴Shebuwele wa ku ndelanganyi ya Ngershone, muana wa balume wa Moshe, uvua mulombodi, muikale ku mutu kua balami ba bibutshilu bia mu nzubu wa Mvidi Mukulu.

²⁵Ku bena diku diabu kuvua ndelanganyi ya Eliyezere, muanabu ne Ngershone: ke Rekabiya, muana wa Eliyezere, pashishe Yeshaya, Yorame, Zibri ne Shelomite.

²⁶Shelomite ne bana babu, bavua batangile bintu bivuabu bajidile mu dina dia Mvidi Mukulu kudi mukalenga Davide, kudi bamfumu ba meku, kudi balombodi ba bisumbu binene ne bikese bia bena mvita, ne kudi balombodi bakuabu ba bena mvita.

²⁷Bantu aba bavua bajidile tshitupa tshia bintu bipawula mu mvita, bua midimu ya nzubu wa Maweja-Nangila.

²⁸Bintu bionsu bivua muambi Samuwele, Shawule, muana wa Kishe, Abnere, muana wa Nere, ne Yowabe, muana wa Seruya, bajidile mu dina dia Mvidi Mukulu, bavua babitangile kabidi kudi Shelomite ne bana babu.

²⁹Kenaniya ne bana bende, ba mu diku dia Ishare, bavua balombodi ba malu a mu ditunga dia bena Izrayele, bikale kabidi bandumbulula.

³⁰Ashabiya ne bantu ba bukitu tshinunu ne nkama muanda mutekete, ba mu diku dia Ebrone, bavua batangila buloba bua Izrayele, buvua luseke ludi diba dibuelela, lua Yardene. Bavua bakenketa malu onsu, ne avua atangila Mvidi Mukulu, ne avua atangila ditunga.

³¹Yeriya uvua mfumu wa diku dia Ebrone. Davide mumane kulala bidimu makumi anayi mu bukalenga, bavua batuadija kukeba mua kumanya dilondangana dia bankambua ba diku dia Ebrone. Bavua basangana bantu ba bukitu mu Yazere wa mu Ngilaade,[163] bavua bena diku edi.

³²Ke mukalenga Davide kusungula bantu binunu bibidi ne nkama muanda mutekete, ba mu diku dia Ebrone, bonsu bikale bamfumu ba meku, bua balongolole malu a Mvidi Mukulu ne a ditunga pamue ne Yeriya, mu buloba bua tshisamba tshia Rubene, bua tshia Ngade, ne bua tshitupa tshia tshisamba tshia Menashe, tshivua luseke ludi diba dipatukila lua musulu wa Yardene.