Read Tshiluba 1 Kulondolola 29 Bible Online

1 Kulondolola 29 - Tshiluba bible

1 Kulondolola 29

¹Mukalenga Davide kuambila bena Izrayele bonsu bavua muaba awu ne: — Muananyi Shelomu udi Maweja-Nangila musungule, utshidi muana mutekete, kena muanji kujingulula bimpe mudi panu. Kadi mudimu wa kuenza mmupite bunene, bualu ki nnzubu wa bukalenga bua muntu udiye ne bua kuasa to. Kadi nnzubu wa Maweja-Nangila Mvidi Mukulu.[172]

²Ndi muenze muanyi muonsu bua kulongolola diasa dia nzubu wa Mvidi Mukulu ewu: ndi mukunguje bionsu bitudi tukengela bua kuenza bintu bia mu nzubu ewu: mpawungi, tshiamu tshitoke tshia mushinga mukole, tshiamu tshikunze, tshiamu tshifike, mabaya. Ndi ne mabue a komaline a bungi, ne mabue makuabu a kulengeja nawu, ne mabue mafike ne a mekala mashilangane, kabidi ne mabue mashilangane a mushinga mukole, ne mabue manene matoke a bungi.

³Kadi bua biuma bimvua meme nabi, mpawungi ne tshiamu tshitoke tshia mushinga mukole, ndi mbifila bua nzubu wa Mvidi Mukulu wanyi. Ndi mbisakidila ku bionsu bimvua mumane kulongolola bua muaba wa tshijila ewu, undi mupite kunanga.

⁴Ndi mfila kilo binunu lukama ya mpawungi wa mu ditunga dia Ofire,[173] ne tshiamu tshitoke tshia mushinga mukole tshia bujitu bua kilo binunu nkama ibidi ne makumi anayi, bua kulamika ku bimana bia nzubu wa Mvidi Mukulu.

⁵Kadi bua mpindiewu, wa kunudi udi mua kulambula Maweja-Nangila ku budisuile buende, mpawungi ne tshiamu tshitoke tshia mushinga mukole, bua bena mudimu wa bianza benze bintu bionsu bitudi tukengela, nnganyi?

⁶Nenku, bamfumu ba meku, bamfumu ba bisamba bia bena Izrayele, balombodi ba bisumbu binene nansha bikese bia bena mvita, ne balombodi ba bisumbu bia bena mudimu ba mukalenga, kulayabu ne:

⁷tudi basue kufila bintu bia kuenza nabi mudimu wa nzubu wa Mvidi Mukulu. Netufile kilo binunu lukama ne makumi muanda mutekete ya mpawungi, nkanu ya mpawungi binunu dikumi, tshiamu tshitoke tshia mushinga mukole kilo binunu nkama isatu, tshiamu tshikunze tshia bujitu bua kilo binunu nkama isambombu, tshiamu tshifike tshia bujitu bua kilo bitotu bisatu.

⁸Bantu bavua ne mabue a mushinga mukole bavua baafila kudi Yekiyele wa mu diku dia Ngershone,[174] bua baateke mu tshibutshilu tshia nzubu wa Maweja-Nangila.

⁹Bantu bonsu bavua ne disanka, bavua baye kufila bintu ebi ne muoyi wabu mujima. Mukalenga Davide uvua ne disanka dinene.

¹⁰Davide udi utendakena Maweja-Nangila, bena Izrayele bonsu basangile, wamba ne[175]: — Maweja-Nangila, Mvidi Mukulu wa nkambua wetu Yakobe, atumbe lelu ne kashidi!

¹¹Bualu, wewe udi muena bumfumu, muena bukole, muena lumu, muena butumbi ne muena bukalenga![176] Eyowa, bionsu bidi mulu, bidi pa buloba mbiebe wewe Maweja-Nangila, bualu udi mukalenga, kabidi udi mfumu wa bonsu ne wa bionsu.

¹²Bubanji ne butumbi bidi bifuma kuudi. Wewe ke udi ne bumfumu buabi bionsu. Udi ne bukole ne bumfumu, udi ne bumfumu bua kujuula ne kukolesha muntu yonsu uudi musue.

¹³Maweja-Nangila wetu, ke patudi tukutumbisha, tusamuna dina diebe dia butumbi.

¹⁴Meme ndi muntu wa tshianana. Bantu banyi badi bantu ba tshianana. Tuetu katuena mua kukulambula milambu eyi ku bukole buetu. Tudi bapete bionsu amu kuudi. Nenku tudi mua kukulambula amu bitudi bapete kuudi.

¹⁵Katuena ne diyi dia kuamba kumpala kuebe nansha. Tudi anu bu benyi ne bena luendu, bu muvua bankambua betu. Matuku atudi tusomba pa buloba adi apita bu mundidimbi, katuyi ne ditalala.

¹⁶Maweja-Nangila Mvidi Mukulu wetu, tudi bakungule bintu bivule bua kukuibakila nzubu utudi mua kuvua kukutendelela, wewe Mvidi Mukulu wa tshijila. Kadi bionsu ebi, ndi mumanye ne: mbifume kuudi. Bionsu ebi mbintu biebe wewe.

¹⁷Mvidi Mukulu wanyi, ndi mumanye ne: udi ukonkonona meji adi munda mua bantu, udi wanyisha badi ne muoyi mutoke. Mvua mukulambule biuma bianyi, lelu meme kumona bantu badi basangile apa, benza bia mumue ne disanka.

¹⁸Maweja-Nangila, Mvidi Mukulu wa bankambua betu, Abrahame, Izake ne Yakobe, anyisha bua bantu bebe balame muoyi wa mushindu ewu munda muabu matuku onsu, batume meji abu kuudi kashidi.

¹⁹Upeshe Shelomu muoyi mukole bua kulama meyi, mikenji ne mikandu biebe, wa kubikumbaja, ne wa kuibaka muaba webe wa tshijila unkadi mumane kulongoluela bintu ebi.

²⁰Davide kuambila kabidi bantu bonsu ne: — Elayi Maweja-Nangila, Mvidi Mukulu wetu tuasakidila. Bantu bonsu kuela Maweja-Nangila tuasakidila, Mvidi Mukulu wa bankambua babu. Kutuabu binu, kutua ne mpala panshi, batumbisha Maweja-Nangila, kabidi ne mukalenga Davide.

²¹Butshia dinda, kulambulabu Maweja-Nangila milambu ya bobumue ne ya kuosha. Kulambulabu Mvidi Mukulu ngombe milume tshinunu, bimpanga tshinunu, ne mikoku tshinunu, pamue ne maluvu a mvinyo, bu mudi meyi a pa milambu. Milambu ya bobumue ivua bungi bukumbane bua bena Izrayele bonsu bavuapu bamone mua kudia.

²²Dituku adi, bena Izrayele kudia, kunua kumpala kua Maweja-Nangila, bikale ne disanka dinene. Ewu ke musangu muibidi, udibu baleja bantu mudi Shelomu muana wa Davide, mukalenga wabu.[177] Kumulababu manyi a bukalenga, bua akuatshile Maweja-Nangila mudimu. Amu diba adi kujidilabu Sadoke bua ikale mutuangaji munene.

²³Shelomu kusomba mu nkuasa wa bukalenga wa Maweja-Nangila, kupingana tatuende Davide mu bukalenga. Bena Izrayele bamone ngikadilu yende milenga, bonsu kumuitaba.

²⁴Balombodi bonsu ba bena mvita ne bana bakuabu ba Davide, kuitaba bukalenga bua Shelomu.[178]

²⁵Bena Izrayele kudimuena mudi bukalenga bua Shelomu budiunda. Maweja-Nangila wakamupesha butumbi buvua bupite bua bonsu bavua bamudianjidile mu nkuasa wa bukalenga mu bena Izrayele.

²⁶Davide, muana wa Ishayi, uvua mukalenga wa bena Izrayele bonsu.

²⁷Bukalenga buende buvua bunenga bidimu makumi anayi, bidimu muanda mutekete mu Ebrone, ne bidimu makumi asatu ne bisatu mu Yerushalayime.[179]

²⁸Davide kufua mumane kukulakaja bikole. Uvua ne biuma kabidi ne lumu lupite. Muanende Shelomu kumupingana mu bukalenga.

²⁹Malu onsu a mukalenga Davide mbaafunde mu mikanda idibu babikila ne: Malu menza kudi muambi Samuwele, Malu menza kudi muambi Natane, ne Malu menza kudi muambi Ngade[180].

³⁰Mu mikanda eyi, badi balondamu malu a bukalenga buende, a bukitu buende, ne malu onsu a mu nsombelu wende wa panu, malu a ditunga dia bena Izrayele ne a mu makalenga makuabu.