Read Tshiluba 1 Kulondolola 9 Bible Online

1 Kulondolola 9 - Tshiluba bible

1 Kulondolola 9

¹Kufundabu mena a bena Izrayele bonsu mu mukanda wa Bakalenga ba Izrayele, balondangane ku diku ku diku. Bena Yuda kutombokela Mvidi Mukulu. Nanku kubakuatabu, kuya nabu ku Babilone.

²Kadi bena Izrayele bakuabu bavua bapingana mu bimenga biabu, bua kuya kusomba tshiakabidi mu lupangu luabu. Pashishe batuangaji, bena Levi ne bantu bavua benza mudimu mu nzubu wa Mvidi Mukulu, bavua bapingana pabu.

³Bantu bavua base mu Yerushalayime bavua ba mu tshisamba tshia Yuda, tshia Binyamine, tshia Efrayime ne tshia Menashe.[72]

⁴Mu tshisamba tshia Yuda, uvua mupingane ke Utayi, wa mu diku dia Perese, muana wa Amikude. Amikude mmuana wa Omri, muikulu wa Imri, kankanunuina ka Bani.

⁵Ba mu diku dia Shela[73] bavua bapingane, ke muanabute Ashaya ne bana bende ba balume.

⁶Mu diku dia Zera, uvua mupingane, ke Yeyuwele. Bena Yuda bavua base mu Yerushalayime bavua 690.

⁷Mu tshisamba tshia Binyamine, uvua mupingane uvua Salu, muana wa Meshulame, muikulu wa Odavya ne kankanunuina ka Ashenuwa.

⁸Muvua kabidi Ibneya, muana wa Yerowame; Ela muana wa Uzi ne muikulu wa Mikri; Meshulame, muana wa Shefatya, muikulu wa Rewuyele ne kankanunuina ka Ibniya.

⁹Bantu bonsu aba bavua bamfumu ba meku abu. Bena Binyamine bavua base mu Yerushalayime bavua 956.

¹⁰Ba mu tshisumbu tshia batuangaji bavua bapingane ke: Yedaya, Yoyaribe, Yakine,

¹¹ne Azariya. Bankambua babu ba munda, bavua balondangane nenku: Ilkiya, Meshulame, Sadoke, Merayote ne Akitube, ewu ke uvua mulami wa nzubu wa Mvidi Mukulu.

¹²Muvua kabidi Adaya. Bankambua bende bavua nenku: Yerowame, Pashekure ne Malkiya. Muvua kabidi Masayi; bankambua bende bavua nenku: Adiyele, Yazera, Meshulame, Meshilemite ne Imere.

¹³Pamue ne batuangaji bakuabu, bamfumu ba meku aa bavua 1.760; bavua bonsu bilobu bivua bienza mudimu mu nzubu wa Mvidi Mukulu.

¹⁴Mu tshisumbu tshia bena Levi, muvua Shemaya. Bankambua bende ba munda bavua nenku: Ashube, Azrikame ne Ashabiya wa mu diku dia Merari.

¹⁵Muvua kabidi Bakbakare, Ereshe, Ngalale ne Mataniya. Bankambua babu ke Mika, Zikri ne Ashafe.

¹⁶Muvua kabidi Obadya. Bankambua bende bavua nenku: Shemaya, Ngalale ne Yedutune. Muvua kabidi Berekiya, muana wa Asha, ne muikulu wa Elkana. Berekiya ewu ke uvua muase mu buloba bu wabu batangila kudi bamfumu ba tshimenga tshia Netofa.

¹⁷Munkatshi mua balami ba tshiibi, muvua mfumu wa mudimu awu, ke Shalume, ne bana babu: ke Akube, Talmone ne Akimane.

¹⁸Ndelanganyi yabu itshidi yenza mudimu wa kulama tshiibi, tshidi luseke ludi diba dipatukila lua nzubu, tshidibu binyike ne: ntshia mukalenga. Bankambua babu bavua bena mudimu wa kulama biibi mu mitanda ya bena Levi.

¹⁹Shalume, muana wa balume wa Kora, ne muikulu wa Abiyashafe, ne kankanunuina ka Kora, kabidi ne bantu bakuabu ba mu diku dia Kora, bavua ne mudimu wa kulama mushiku wa ntenta wa kusambakena. Ke muvua bankambua babu benza kale mu mitanda ya bantu ba Maweja-Nangila.

²⁰Pinase, muana wa Elazare, ke uvua ubatangila kale mu mudimu awu, bualu Maweja-Nangila uvua nende.

²¹Zekarya, muana wa Meshelemiya, uvua kabidi mulami wa tshiibi ku ntenta wa kusambakena.

²²Bantu bonsu ba wabu basungula bua kulama biibi bavua 212. Bavua bababadikila mu misoku yabu. Davide ne muambi Samuwele ke bavua bapesha bankambua babu midimu eyi ya mushinga.

²³Ndelanganyi yabu ivua amu ne mudimu awu wa kulama ku biibi ne kulama nzubu wa Maweja-Nangila.

²⁴Tshiibi tshionsu tshivua ne bantu basunguluke bavua batshilama. Biibi mene bivua binayi: tshia luseke ludi diba dipatukila lua nzubu, tshia luseke ludi diba dibuelela lua nzubu, tshia ku mutu wa nzubu ne tshia kuinshi kua nzubu.

²⁵Balami bakuabu ba biibi bavua basomba ku misoku yabu. Kadi bavua bafika misangu ne misangu bua kuenza mudimu wabu wa kulama ku biibi lumingu bijima.

²⁶Balami ba biibi bavua ne bamfumu babu banayi. Bavua bena Levi, bavua ne mudimu wa kulama bibambalu ne biuma bia mu nzubu wa Mvidi Mukulu.

²⁷Bavua balala butuku pabuipi ne nzubu wa Mvidi Mukulu, bualu bavua ne bua kumulama ne kunzulula biibi biende dinda dionsu.

²⁸Balami bakuabu ba biibi bavua ne mudimu wa kubala bintu bia kutendelela nabi, bivua bantu bangata, nansha bapingaja.

²⁹Bakuabu bavua balama ngesu ne bintu bikuabu bia tshijila, balama kabidi bukula, maluvu, mafuta, musenga wa kamonya, ne manananshi.

³⁰Kadi, mudimu wa kusambakaja manananshi uvua wa batuangaji.

³¹Matitya, muanabute wa Shalume, muena Levi wa mu tshiota tshia Kora, uvua ne mudimu wa kuenza mikata ya kulambula.

³²Bena Levi bakuabu ba mu diku dia Kekate, bavua benza bobu mampa a tshijila a kulambula Mvidi Mukulu dituku dionsu dia Dikisha.

³³Bamfumu ba meku a bena Levi, bavua bimbi ba misambu, bavua basomba ku nzubu yabu. Kabavua benza munga mudimu to. Bualu bavua bimba munya ne butuku.

³⁴Bonsu aba mbamfumu ba meku a bena Levi, bilondeshile ndelanganyi yabu. Bavua basomba amu mu Yerushalayime.

³⁵Yeyele ke uvua muase tshimenga tshia Ngibone. Uvua musombe mu tshimenga atshi ne mukajende Maaka,

³⁶muanabute wende Abdone, ne bana bende bakuabu ba balume: Sure, Kishe, Baale, Nere, Nadabe,

³⁷Ngedore, Akiyo, Zekarya ne Miklote.

³⁸Miklote uvua tatuende wa Shimame. Bavua bumuka mu Ngibone, baya kusomba mu Yerushalayime, ne banga bantu ba mu tshiota tshiabu.

³⁹Nere uvua tatuende wa Kishe. Kishe uvua tatuende wa Shawule. Shawule uvua ne bana ba balume banayi: Yonatane, Malkishuwa, Abinadabe, ne Ishebaale.

⁴⁰Yonatane uvua tatuende wa Meribaale. Meribaale uvua tatuende wa Mika.

⁴¹Bana ba balume ba Mika badi nenku: Pitone, Meleke ne Tareya.

⁴²Akaze uvua tatuende wa Yara. Yara uvua ne bana basatu: Alemete, Azmavete ne Zimri. Zimri uvua tatuende wa Mosha.

⁴³Mosha uvua tatuende wa Bineya. Bineya uvua tatuende wa Refaya. Refaya uvua tatuende wa Elasha. Elasha uvua tatuende wa Ashele.

⁴⁴Ashele uvua ne bana ba balume basambombu, mena abu adi: Azrikame, Bokru, Ismayele, Sheyariya, Obadya ne Anane.