Read Tshiluba 2 Kulondolola 1 Bible Online

2 Kulondolola 1 - Tshiluba bible

2 Kulondolola 1

¹Shelomu, muana wa Davide, uvua mukoleshe bukalenga buende bimpe. Maweja-Nangila Mvidi Mukulu uvua umuambuluisha, bua ikale mukalenga wa lumu lunene.

²Shelomu kubikidisha bena Izrayele bonsu, nangananga balombodi ba bisumbu binene ne bikese bia bena mvita, bandumbulula, bamfumu bonsu ba meku a bena Izrayele, ne bakulu bonsu.

³Kuyaye ne bantu abu bonsu mu Ngibone, muaba wa tshijila. Bualu ke muaba wa mu tshipela[1] uvua Moshe, muntu wa Maweja-Nangila, muase ntenta wa kusambakena ne Mvidi Mukulu.

⁴Davide uvua mumuke ne mushete wa tshijila wa Mvidi Mukulu uvua mu Kiriyate-Yeyarime,[2] muye nawu mu Yerushalayime, muuteke mu ntenta muaba uvuabu bamane kulongolola.

⁵Kadi tshilambuilu tshia tshiamu tshikunze tshivuabu benza kudi Beshalele,[3] muana wa Uri, muikale kabidi muikulu wa Ure, Davide uvua mutshiteke mu tshimenga tshia Ngibone kumpala kua ntenta wa Maweja-Nangila. Shelomu kufika muaba awu ne bonsu bavuaye nabu bua kukonka malu kudi Maweja-Nangila.

⁶Shelomu kusemena kumpala kua Maweja-Nangila, kulambula milambu ya kuosha tshinunu pa tshilambuilu tshia tshiamu tshikunze, tshivua pabuipi ne ntenta wa kusambakena.

⁷Butuku abu, Mvidi Mukulu kumuenekela Shelomu, kumuambila ne: — Undombe tshiudi musue bua meme kukupesha.

⁸Shelomu kuandamuna ne: — Maweja-Nangila, uvua muenzele tatu wanyi Davide bimpe. Mpindiewu udi munsungule bua meme kumupingana mu bukalenga.

⁹Nenku Maweja-Nangila Mvidi Mukulu, ukumbaje biuvua mulaye tatu wanyi. Udi munsungule mukalenga bua kulombola bantu bungi bu lusenga lua pa buloba.[4]

¹⁰Umpeshe meji ne lungenyi, bua nkumbaje bimpe mudimu wanyi wa kulombola bantu aba. Wewe kuyi muenze nanku, kakuena udi mua kulombola bantu bebe bungi nenku.

¹¹Mvidi Mukulu kuandamuna Shelomu ne: — Kuena mulombe bua wewe kuikala mubanji, nansha kuikala ne lumu. Kuena mulombe bua baluishi bebe kufuabu bonsu. Kuena mulombe bua wewe kuikala ne muoyi matuku a bungi pa buloba. Kadi udi ulomba bua kuikala ne meji ne lungenyi bua wewe kulombola bantu banyi, bandi mukupeshe bua wewe kuikala mukalenga wabu.

¹²Nanku, neupete meji ne lungenyi, kabidi nenkupe bubanji bua bungi ne butumbi. Newikale mupite bamfumu bakuabu bavua kumpala kuebe, nansha bakulonda panyima.

¹³Nanku Shelomu kumuka mu Ngibone muaba wa tshijila uvua ntenta wa kusambakena. Kupinganaye mu Yerushalayime bua kulombola bena Izrayele.

¹⁴Shelomu kusangisha matempu a mvita ne nyama ya tubalu. Uvua ne matempu a mvita tshinunu ne nkama inayi, ne nyama ya tubalu[5] binunu dikumi ne bibidi. Uvua mulamine nyama mikuabu ya tubalu ku Yerushalayime kuvuaye. Kadi nyama mikuabu, uvua muyabanye mu bimenga bivua ne bikumbi bilongolola bua kuyiteka.

¹⁵Nanku, ku bulongolodi bua mukalenga Shelomu, mu Yerushalayime[6] muvua tshiamu tshitoke tshia mushinga mukole ne tshiamu tshia mpawungi bungi bu nsoka. Muvua kabidi mitshi ya sedre ya bungi bu mitshi ya sikomore idi itoloka mu mpata ku muelelu wa mayi manene.

¹⁶Nyama ya tubalu ya mukalenga Shelomu ivua ifumina ku Ejipitu ne ku Silisiya, muaba uvuabu baye kumusumbilayi kudi bangenda mushinga.[7]

¹⁷Bangenda mushinga abu, mu Ejipitu bavua basumba ditempu dimue dia mvita, ku mushinga wa nkanu ya tshiamu tshitoke tshia mushinga mukole nkama isambombu, nyama wa kabalu umue ku mushinga wa nkanu ya tshiamu tshitoke tshia mushinga mukole lukama ne makumi atanu. Bangenda mushinga abu, bavua basumbisha kabidi bakalenga ba bena Iti ne ba bena Arame bintu abi.

¹⁸Shelomu[8] uvua mujadike bua kuasa nzubu wa tshjila wa Mvidi Mukulu muaba udibu mua kutendelela Maweja-Nangila. Uvua musue kuasa kabidi nzubu wende wa Bukalenga.