Read Tshiluba 2 Kulondolola 11 Bible Online

2 Kulondolola 11 - Tshiluba bible

2 Kulondolola 11

¹Robowame mumane kufika mu Yerushalayime, kusangishaye bena mvita binunu lukama ne makumi muanda mukulu, bavua bamanye mvita bikole, ba mu tshisamba tshia bena Yuda ne tshia bena Binyamine, bua kuya kuluisha bena Izrayele bavua ku mutu mu ditunga, bua yeye kushala mukalenga wabu.

²Kadi Maweja-Nangila kuyukila ne muambi Shemaya, umuambila ne:

³— Uye kudi Robowame, muana wa Shelomu, mukalenga wa bena Yuda, ne kudi bena Izrayele bonsu ba bena Yuda, ne ba bena Binyamine, ubambile ne:

⁴Maweja-Nangila udi wamba ne: “Kanuyi kuluisha bana benu to. Muntu yonsu wa kunudi apingane kuende. Bualu meme Maweja-Nangila ndi muenze bionsu bidi bienzeka ebi.” Robowame ne bantu bende bumvua diyi dia Maweja-Nangila, kuitaba. Kabena baye kuluisha Yerobowame to.

⁵Robowame mumane kusomba mu Yerushalayime, kukoleshaye bimenga bia bungi bia bukalenga bua bena Yuda ne bimana:

⁶ke Betleyeme, Etame, Tekowa,

⁷Bete-Sure, Soko, Adulame,

⁸Ngate, Maresha, Zife,

⁹Adorayime, Lakishe, Azeka,

¹⁰Sora, Ayalone ne Ebrone. Bimenga bikolesha ne bimana ebi, bivua mu buloba bua bena Yuda ne bua bena Binyamine.

¹¹Robowame uvua mubinyungulule ne bimana bikole. Kutumaye balombodi mu bimenga ebi, kutekeshayemu biakudia, mafuta ne maluvu.

¹²Mu tshimenga tshionsu muvua ngabu ne mafuma. Bu muvua Robowame mukoleshe misoku ayi ne bimana, kushindikaye bumfumu buende mu tshisamba tshia Yuda ne tshia bena Binyamine.

¹³Batuangaji ne bena Levi, kumuka mu buloba bujima bua bena Izrayele, bua kuya kuitaba bumfumu bua Robowame.

¹⁴Bena Levi bavua bumuka muaba wabu pabuipi ne bimenga, bua kuya kusomba mu Yerushalayime, ne mu bukalenga bua bena Yuda, bualu Yerobowame ne bana bende ba balume bavua babapangishe mua kuenzela Maweja-Nangila mudimu wa butuangaji.

¹⁵Yerobowame nkayende kusungula bantu bua kuikalabu batuangaji miaba ivuabu batendelela mvidie, bakukuila mpingu ya mbuji ya mpumbu ne ya tuana tua ngombe.[74]

¹⁶Bantu ba bisamba bionsu bia ku mutu mu ditunga, bavua batendelela Maweja-Nangila Mvidi Mukulu wa bena Izrayele, kuyabu mu Yerushalayime, balonda bena Levi bua kulambuilamu Maweja-Nangila Mvidi Mukulu wa bankambua babu milambu.

¹⁷Kuitababu bumfumu bua bena Yuda, kushindikabu bukalenga bua Robowame, muana wa Shelomu. Amu bidimu bisatu, bavua batumikile bukalenga abu, muvuabu batumikile bukalenga bua Davide ne bua Shelomu.

¹⁸Robowame uvua musele Makalate. Tatuende wa Makalate uvua Yerimote, muana wa Davide. Mamuende wa Makalate uvua Abikayile, muana wa Eliyabe ne muikulu wa Ishayi.[75]

¹⁹Makalate uvua mumulelele bana ba balume basatu: Yewushe, Shemariya ne Zakame.

²⁰Pashishe, Robowame kusela Maaka, muana wa Abishalome.[76] Kulelaye nende bana ba balume banayi: Abiya, Atayi, Ziza ne Shelomite.

²¹Ku bakaji bende bonsu dikumi ne muanda mukulu, bana ba bakalenga, Robowame uvua mupite kunanga Maaka, muana wa Abishalome. Uvua musele kabidi bakaji bakuabu makumi asambombu, bavuaye mubanjije. Uvua ne bana ba balume makumi abidi ne muanda mukulu, ne bana ba bakaji makumi asambombu.

²²Robowame uvua muteke Abiya, muana wa Maaka, ku mutu kua bena nzubu wende bonsu, bua kuikalaye mfumu wa bana babu. Bualu Robowame uvua musue ne muana ewu ashale mukalenga.

²³Robowame uvua mupete kabidi meji, a kutangalaja bana bende ba balume bakuabu bonsu, bua baye kulombola bimenga bia bena Yuda, bia bena Binyamine, bivuabu bakolesha ne bimana. Uvua upesha bana abu biakudia bia bungi, ubakebela kabidi bakaji bavule.