Read Tshiluba 2 Kulondolola 13 Bible Online

2 Kulondolola 13 - Tshiluba bible

2 Kulondolola 13

¹Yerobowame mumane kulala mu bukalenga bidimu dikumi ne muanda mukulu, Abiya kubuela mu bukalenga bua bena Yuda.

²Kushalaye mu bukalenga mu Yerushalayime bidimu bisatu. Mamuende wa Abiya uvua Mikaya, muana wa Oriyele,[82] wa mu tshimenga tshia Ngibeya. Abiya ne Yerobowame kuluangana mvita.

³Abiya uvua ne bantu binunu nkama inayi, bavua bamanye mvita bikole. Yerobowame uvua umuluisha ne bantu ba bukitu binunu nkama muanda mukulu bavua bamanye mvita bikole.

⁴Abiya kubanda ku lusongu lua mukuna wa Semarayime[83] uvua mu buloba bua mikuna ya Efrayime. Kuelaye mbila wamba ne: — Wewe Yerobowame, ne nuenu bena Izrayele, ntelejayi!

⁵Kanuena bamanye ne: Maweja-Nangila Mvidi Mukulu wa Izrayele, uvua mupeshe Davide ne ndelanganyi yende bukalenga bua bena Izrayele kashidi anyi? Maweja-Nangila uvua mutue nabu ndondu wa kashidi.[84]

⁶Kadi Yerobowame, muana wa Nabate, uvua wenzela Shelomu, muana wa Davide mudimu, kutombokelaye mfumuende.

⁷Bantu batshimbakane kutua ku luseke lua Yerobowame, kubenga Robowame. Kadi Robowame, muana wa Shelomu, utshivua nsongalume, kayi mupite kujingulula malu a mvi-ta. Kavua ne mushindu wa kukandamana. Ke muvuabu bamupite bukole.

⁸Mpindiewu nudi basue kubenga bukalenga budi Maweja-Nangila mupeshe ndelanganyi ya Davide. Nudi ne bena mvita ba bungi. Nudi ne tuana tua ngombe tua tshiamu tshia mpawungi tuvua Yerobowame munuenzeje bua tuikale mvidie yenu.[85]

⁹Nudi bipate batuangaji ba bushiwa ba Maweja-Nangila, ndelanganyi ya Arone, ne bena Levi. Nudi badisunguile batuangaji bu mudibu benza kudi bena matunga makuabu. Bua muntu kupeta mudimu wa butuangaji wa mvidie eyi, idi kayiyi nansha mvidie mene, uvua ufila amu ngombe mulume umue ne mikoku ya bimpanga muanda mutekete.

¹⁰Kadi, tuetu tudi ne wetu Mvidi Mukulu, ke Maweja-Nangila! Tuetu katuena bamubenge to. Kuetu, batuangaji badi benzela Maweja-Nangila mudimu, badi ba ku ndelanganyi ya Arone, ne bena Levi kabidi badi benza mudimu wabu mubafundile.

¹¹Dinda ne dilolu badi balambula Maweja-Nangila, milambu ya kuosha ne ya manananshi. Mampa adibu balambula Maweja-Nangila, badi baateka pa mesa a tshijila.[86] Dilolu dionsu badi batemesha miendu idi pa tshitekelu tshia miendu tshia tshiamu tshia mpawungi. Tudi tukumbaja mudimu wa Maweja-Nangila anu mudiwu. Kadi nuenu nudi babenge Mvidi Mukulu mulelela.

¹²Mpindiewu, Maweja-Nangila nkayende ke udi utulombola. Batuangaji bende apa badi bakeba kuela mpungi, bua kuleja tshimanyinu tshia mvita, bua kunuluisha.[87] Nanku, nuenu bena Izrayele, kanuluishi Maweja-Nangila Mvidi Mukulu wa bankambua benu, bualu kanuakutshimuna mvita to.

¹³Diba adi, Yerobowame kutuma tshisumbu tshikuabu tshia bena mvita kunyima kua bena Yuda bua kubaluisha. Nanku bena Yuda bavua ne baluishi ba bena Izrayele kumpala ne kunyima kuabu.

¹⁴Bena Yuda batangile panyima, kumonabu ne tudi ne bua kuluangana nseke ibidi. Kulombabu diambuluisha kudi Maweja-Nangila. Nanku, pavua batuangaji bela mpungi,

¹⁵bena mvita ba bena Yuda bavua bela bibingu bia mvita. Diakamue, Maweja-Nangila kunyemesha Yerobowame ne bena Izrayele, Abiya ne bena Yuda batangile.

¹⁶Bena Izrayele kunyema, Maweja-Nangila kubafila mu bianza bia bena Yuda.

¹⁷Abiya ne bena mvita bende kushipa bena Izrayele bikole, kushipa bantu binunu nkama itanu bavua bamanye mvita bikole.

¹⁸Tshikondu atshi, bena Izrayele kukuatshika bundu. Bena Yuda kutshimuna, bualu bavua bitabe Maweja-Nangila, Mvidi Mukulu wa bankambua babu.

¹⁹Abiya kulonda Yerobowame, kumunyenga bimenga ebi: Betele, Yeshana ne Efrone, kumunyenga kabidi ne misoku ivua nabi mutumba.

²⁰Matuku avua Abiya mu bukalenga, Yerobowame kavua kabidi ne bukole bu muvuaye nabu bangabanga to. Pashishe, Mvidi Mukulu kumumusha panu.

²¹Kadi Abiya kushindika bukalenga buende. Kuselaye bakaji dikumi ne banayi. Kulelaye bana ba balume makumi abidi ne babidi, ba bakaji dikumi ne basambombu.

²²Malu makuabu a Abiya mbaafunde mu mukanda udibu binyika ne: Malu a muambi Ido[88] Badi balondamu malu avuaye muenze ne avuaye muambe.

²³Abiya mumane kufua[89] kumujikabu mu Tshimenga tshia Davide. Muanende Asa kumupingana mu bukalenga. Pavua Asa mu bukalenga, ditunga kushala mu ditalala bidimu dikumi.