Read Tshiluba 2 Kulondolola 14 Bible Online

2 Kulondolola 14 - Tshiluba bible

2 Kulondolola 14

¹Asa kuenza malu mimpe avua asankisha Maweja-Nangila Mvidi Mukulu wende.

²Kunyangaye bilambuilu ne miaba ivua bena ditunga batendelela mvidie ya benyi. Kupulaye mabue avuabu bimanyike. Kutshibulaye makunji a kutendelela mvidie.

³Kuambilaye bena Yuda bua batendelele Maweja-Nangila Mvidi Mukulu wa bankambua babu, batumikile meyi ne mikenji biende.

⁴Mu bimenga bionsu bia bena Yuda, Asa uvua munyangakaje miaba ivua bena ditunga batendelela mvidie ya benyi. Uvua munyangakaje kabidi bilambuilu bia manananshi. Nanku bukalenga buende buvua ne ditalala matuku avuaye mu bukalenga.

⁵Muntu nansha umue kavua mumuluishe mvita mu bidimu abi to. Bualu Maweja-Nangila nkayende uvua mumulame ne ditalala. Matuku avua ditunga mu ditalala, Asa kukolesha bimenga bivule bia bena Yuda ne bimana.

⁶Kuambilaye bena Yuda ne: — Tukoleshayi bimenga ebi ne bimana, ne tuleya, kabidi ne biibi bitudi tukanga ne milonda ya tshiamu, matuku atshidi ditunga mu bianza bietu. Bushuwa, tuvua bitabe Maweja-Nangila Mvidi Mukulu wetu. Ke muvuaye mutupe ditalala ku nseke yonsu ya ditunga dietu.[90] Kuenzabu midimu bua kukolesha bimenga ebi ne bimana.

⁷Asa uvua ne bena mvita ba bena Yuda binunu nkama isatu, bavua ne ngabu minene ne mafuma. Uvua kabidi ne bena mvita ba bena Binyamine binunu nkama ibidi. Bobu bavua ne ngabu mikese, kadi bamanye mua kuela mikete. Bonsu bavua bantu ba bukitu, bamanye mua kuluangana mvita bikole.

⁸Zera wa bena Kushe kufika bua kuluisha Asa ne bantu bende. Uvua ne bena mvita binunu tshinunu, matempu a mvita nkama isatu. Kufikaye too ne ku Maresha.[91]

⁹Asa kuya kusambakena nende. Kuelabu mualu wa mvita mu tshibandabanda tshia Sefata pabuipi ne Maresha.

¹⁰Asa kulomba diambuluisha kudi Maweja-Nangila Mvidi Mukulu wende, wamba ne: — Maweja-Nangila kabiena mua kukukolela mua kuambuluisha bantu badi kabayi ne bukole, pa mutu pa kuambuluisha badi ne bukole. Maweja-Nangila Mvidi Mukulu wetu, utuambuluishe, bualu tudi tutekemena kuudi. Mu dina diebe ke mutudi basemene apa bua kuluisha bena mvita aba. Wewe udi Maweja-Nangila Mvidi Mukulu, kuanyishi bua muntu akutshimmune.

¹¹Nanku, Maweja-Nangila kunyemesha bena Kushe, Asa ne bantu bende batangile.

¹²Asa ne bantu bende kulondakaja bena Kushe too ne ku Ngerare,[92] kubashipa bonsu. Muntu nansha umue kavua munyeme to, bualu bena mvita babu bavua babatshimune kudi Maweja-Nangila, ne kudi bantu bende. Bena Yuda kupawula bintu bipite bungi.

¹³Pashishe, kukuatabu bimenga bionsu bivua mutumba ne buloba bua bena Ngerare, bualu bena bimenga ebi bavua bazakala kumpala kua Maweja-Nangila. Bena Yuda kupawula bintu bionsu bivua mu bimenga ebi. Bivua bia bungi.

¹⁴Kuluishabu kabidi mitanda ya balami ba bimuna. Kuangatabu mikoku ya bungi ne nyama ya tumelu. Pashishe kupinganabu mu Yerushalayime.