Read Tshiluba 2 Kulondolola 17 Bible Online

2 Kulondolola 17 - Tshiluba bible

2 Kulondolola 17

¹Yosafate ke uvua mupingane tatuende Asa mu bukalenga. Kushindikaye bukalenga buende bikole.[102]

²Kutekaye bisumbu bia bena mvita mu bimenga bionsu bivua bena Yuda bakoleshe ne bimana. Kutekaye balombodi mu bukalenga buende, too ne mu bimenga bionsu bivua tatuende Asa munyenge bena Efrayime.

³Maweja-Nangila uvua nende, bualu Yosafate uvua muitabe Maweja-Nangila bu muvua nkambua wende Davide muenze ku ntuadijilu wa bukalenga buende. Kavua uya kudi mvidie Baale bua kumukonka malu to.

⁴Kadi, uvua uditatshisha bua kumanya disua dia Maweja-Nangila Mvidi Mukulu wa bankambua bende, ne bua kuitaba mikenji yende. Kabavua benze nanku mu bukalenga bua ku mutu wa ditunga to.

⁵Nanku, Maweja-Nangila kushindika bukalenga bua Yosafate. Bena Yuda bonsu bavua balambule Yosafate bintu bia kumusankisha nabi. Nanku uvua ne bubanji, kabidi ne lumu lua bungi.

⁶Uvua ne disanka dia kulonda tshivua Maweja-Nangila musue. Mu bukalenga bua bena Yuda, Yosafate uvua mukandike miaba ivua bena ditunga batendelela mvidie ya bantu benyi. Uvua mupule kabidi makunji a kutendelela nawu mvidie.

⁷Yosafate mumane kulala mu bukalenga bidimu bisatu, kutumaye balombodi ba mu bukalenga buende bua kuya kulongesha mu bimenga bia bena Yuda. Bantu abu bavua: Benayile, Obadya, Zekarya, Netaneyele ne Mikaya.

⁸Bavua ne bena Levi tshitema: Shemaya, Netaniya, Zebadya, Ashayele, Shemiramote, Yonatane, Adoniya, Tobiya ne Tobe-Adoniya. Bavua kabidi ne batuangaji babidi: Elishama ne Yorame.

⁹Bavua bambule mukanda udi ne mikenji ya Maweja-Nangila. Kuendakanabu mu tshimenga tshionsu tshia bena Yuda bua kulongesha bantu.

¹⁰Makalenga onsu avua ku mutumba kua ditunga dia bena Yuda, kutshinawu Maweja-Nangila. Muntu nansha umue kavua mua kuluisha Yosafate to.

¹¹Bena Peleshete mene bavua batuadila Yosafate milambu ne bintu bia tshiamu tshitoke tshia mushinga mukole, bia kumuambuluisha nabi. Bena Arabe bavua bamutuadila mikoku ya bimpanga binunu muanda mutekete ne nkama muanda Mutekete, ne mbuji ya mpumbu amu bungi bua momumue.

¹²Bukole bua Yosafate buvua buenda budiunda amu kudiunda. Kuasaye nzubu mikolesha ne bimana pa mikuna, kabidi ne bimenga mu ditunga dia Yuda, bua kutekamu mayeba.

¹³Nanku mu bimenga bia mu bukalenga buende,[103] muvua biakudia bia bungi. Bena mvita bende ba bukitu bavua basombe mu Yerushalayime.

¹⁴Bena mvita aba bavua babateke mu tshimenga atshi bilondeshile meku abu. Mu tshisamba tshia Yuda, muvua balombodi ba bena mvita aba: Adna uvua ulombola bena mvita ba bukitu binunu nkama isatu;

¹⁵Yowanane, uvua ulombola bena mvita binunu nkama ibidi makumi muanda mukulu;

¹⁶Amashiya, muena Zikri, uvua mudibuelele nkayende ku mudimu wa Maweja-Nangila, ulombola bena mvita ba bukitu binunu nkama ibidi.

¹⁷Mu tshisamba tshia Binyamine muvua Eliyada, muena mvita wa bukitu. Uvua ulombola bena mvita binunu nkama ibidi, bavua ne ngabu ne mikete ya kuluangana nayi.

¹⁸Kuvua kabidi Yozabade, uvua ulombola bena mvita lukama ne makumi muanda mukulu, bavua bamanye mua kuluangana.

¹⁹Bena mvita bonsu aba ke bavua benzela mukalenga Yosafate mudimu mu Yerushalayime. Uvua kabidi ne bena mvita bakuabu bavuaye muteke mu bimenga bia bukalenga buende, bivuaye mukoleshe ne bimana.