Read Tshiluba 2 Kulondolola 19 Bible Online

2 Kulondolola 19 - Tshiluba bible

2 Kulondolola 19

¹Yosafate, mukalenga wa Yuda, kupingana katakata mu Yerushalayime.

²Muambi Yeku, muana wa Anani, kufika bua kumuakidila, umukonka ne: — Uvua muambuluishe muntu muenzayi bua tshinyi? Bantu badi babenga Maweja-Nangila, tuetu tudi mua kubananga anyi? Maweja-Nangila mmukufikile munda bua bualu buudi muenze ebu!

³Bushuwa malu makuabu auvua muenze adi mempe. Mu ditunga diebe uvua muoshe makunji a kutendelela nawu mvidie mukaji Ashera. Uvua muitabe, mutumikile kabidi Maweja-Nangila ne muoyi webe mujima.

⁴Yosafate uvua musombe mu Yerushalayime. Kadi kutuadijaye kuendakana tshiakabidi mu ditunga, biangatshile ku Bersheba too ne ku buloba bua mikuna ya Efrayime. Uvua wambila bena Izrayele, bua bapingane kudi Maweja-Nangila Mvidi Mukulu wa bankambua babu.

⁵Kutekaye bandumbulula mu bimenga bionsu bia bena Yuda, bivuaye mukoleshe ne bimana.

⁶Kuambilaye bandumbulula abu ne: — Nuenze mudimu wenu bimpe. Kanuena nulumbuluisha mu dina dia bantu to, kadi mu dina dia Maweja-Nangila. Yeye mene neikale nenu panudi nukosa nsambu.

⁷Nunemeke Maweja-Nangila. Nudimuke bua binudi nuenza. Bualu Maweja-Nangila Mvidi Mukulu wenu, kena musue buenzayi, kansungansunga, nansha bintu bia mabuejila.

⁸Yosafate uvua muteke kabidi mu Yerushalayime bena Levi, batuangaji ne bamfumu ba meku a bena Izrayele, bua balumbuluishe bantu mu dina dia Maweja-Nangila, bakose matandu adi munkatshi mua bena tshimenga.[110]

⁹Yosafate uvua muambile bandumbulula ne: — Nunemeke Maweja-Nangila, bua numone mua kulumbuluisha bantu pa bualu, kanuyi nuela meji ku tshintu tshikuabu.

¹⁰Padi bana benu bandumbulula bafuma mu bimenga bidibu basombe, banulomba meji bua bualu bua dishipangana, nansha bua malu makuabu adi atangila meyi, mikenji ne mikandu, nubumvuije mushindu udibi. Nanku bantu abu, kabakuenzela Maweja-Nangila bibi to. Nuenze mundi munuambile emu bua kanuikadi bena tshibawu.

¹¹Amariya, mutuangaji munene, neakenkete malu onsu adi atangila dinemeka dia Mvidi Mukulu. Zebadya, mulongeshi wa mu bukalenga, muana wa Ismayele, neatangile malu a bulongolodi bua ditunga. Bena Levi nebanuambuluishe mu midimu yonsu eyi. Nanku ndayi, nuenze mudimu wenu ne muoyi mukole. Maweja-Nangila neambuluishe bonsu badi benza bimpe.