Read Tshiluba 2 Kulondolola 2 Bible Online

2 Kulondolola 2 - Tshiluba bible

2 Kulondolola 2

¹Shelomu kuangata bena mudimu binunu makumi muanda mutekete bua kuambula bintu, ne bantu binunu makumi muanda mukulu bua kusonga mabue mu mikuna. Bavua babalombola kudi bantu binunu bisatu ne nkama isambombu.

²Shelomu kutuma bantu kudi Irame, mukalenga wa tshimenga tshia Tire, umuambila ne: “Uvua mupeshe tatu wanyi Davide mitshi ya sedre bua kuasaye nzubu wa bukalenga.[9]

³Ungenzele panyi nanku, nkadi pa kuashila Maweja-Nangila Mvidi Mukulu wanyi nzubu wende wa tshijila. Neboshilemu milambu ya manananshi. Nebatekemu mampa a tshijila[10] matuku onsu. Nebalambulemu milambu ya kuosha dinda ne dilolu, matuku a Dikisha, dituku dionsu didi ngondu ubala, ne matuku a bibilu bia Maweja-Nangila Mvidi Mukulu wetu. Ke mikenji idi bena Izrayele ne bua kukumbaja kashidi.

⁴Nanku, nzubu wa Mvidi Mukulu undi ngasa neikale munene, wa lumu, bualu Mvidi Mukulu wetu mmupite mvidie yonsu ku bunene.

⁵Muntu nansha umue kena mua kumuashila nzubu to, bualu diulu, nansha diodi dialabale, ndikese bualu buende.[11] Meme tshiena mua kuamba ne: ndi ngashila Maweja-Nangila nzubu to. Kadi ndi ngasa muaba wa ditendelela, udibu mua kumulambula milambu.

⁶Nanku, untumine muntu udi mumanye bimpe mua kuenza bintu ne tshiamu tshia mpawungi, ne tshiamu tshitoke tshia mushinga mukole, ne tshiamu tshikunze, kabidi ne biamu bikuabu. Muntu awu, ikale mumanye kabidi mua kutela bilamba bilaba kakula, bikunze kunzuu, bifikuluke, mumanye kabidi mua kuzola bintu mu biamu. Muntu awu, neenze mudimu pamue ne bantu banyi badi bamanye bimpe mua kuenza midimu ayi, bavua tatu wanyi Davide muangate ku mudimu. Bantu abu mbasombe mu Yerushalayime, nansha muaba mukuabu mu ditunga dia Yuda.

⁷Umpeshe kabidi mitshi ya sedre, ya pin ne ya santale,[12] idi ifumina ku mikuna ya Lebanone. Ndi mumanye ne: bena mudimu bebe mbamanye mua kukosa mitshi ya Lebanone. Bena mudimu banyi nebaye kuambuluisha bena mudimu bebe.

⁸Nebankosele mitshi ya bungi, bualu nzubu wa Mvidi Mukulu undi ngasa mmupite bunene, kabidi mmupite buimpe.

⁹Bena mudimu bebe badi bankosela mitshi, nembapeshe kilo binunu bitotu bisambombu ya bukula bua mampa, kilo bitotu bisambombu ya ntete ya kuenza bukula, maluvu a mvinyo litre binunu nkama muanda mukulu, ne mafuta litre binunu nkama muanda mukulu.”

¹⁰Irame, mukalenga wa tire, kufunda mukanda, wandamuna mukalenga Shelomu ne: “Maweja-Nangila mmunange bena tshisamba tshiende. Ke padiye mukuteke bua kuikala mukalenga wabu.

¹¹Ndi ngela Maweja-Nangila Mvidi Mukulu wa Izrayele, mufuki wa diulu ne buloba, tuasakidila, bualu mmupeshe Davide muana wa meji, wa tshiumvuilu ne lungenyi, muakanyine mua kuashila Maweja-Nangila nzubu, ne kudiashila wende yeye wa bukalenga.

¹²Nanku, mpindiewu ndi nkutumina Urame-Abi[13] udi mumanye midimu bikole.

¹³Tatuende wa Urame-Abi uvua muena tshimenga tshia Tire, kadi mamuende uvua muena tshisamba tshia Dane. Urame-Abi udi mumanye mua kuenza bintu ne tshiamu tshia mpawungi, ne tshiamu tshitoke tshia mushinga mukole, ne tshiamu tshikunze, kabidi ne biamu bikuabu. Mmumanye kabidi kusonga mabue ne mitshi, kutela bilamba bilaba kakula, bikunze kunzuu, ne bifikuluke, nansha bilamba bienza ne ndanda. Udi mumanye kabidi mua kuzola bintu mu biamu. Udi mua kuenza mudimu onsu udibu bamupeshe. Neenze mudimu pamue ne bena mudimu bebe badi bamanye mudimu bimpe, kabidi ne ba tatuebe Davide.

¹⁴Nanku, wewe mukalenga Shelomu, ututumine bukula bua mampa, ntete ya bukula, mafuta ne maluvu biuvua mulaye.

¹⁵Netuye pa mukuna wa Lebanone bua kukosa mitshi yonsu iudi i ujinga. Nempitshile nayi mu mayi manene, misuika mu bisumbu, too ne ku Yafa,[14] bua uyambuishe muaba awu, ifike ku Yerushalayime.”

¹⁶Shelomu kusangisha benyi bonsu bavua basomba mu ditunga dia Izrayele, bilondeshile muvua tatuende Davide[15] mubabadike. Bavua binunu lukama makumi atanu ne bisatu ne nkama isambombu.

¹⁷Kusungulaye bantu binunu makumi muanda mutekete bua kuambula bintu, bantu binunu makumi muanda mukulu bua kusonga mabue mu mikuna, bantu binunu bisatu ne nkama isambombu bua kulombola bonsu bavua benza midimu eyi.