Read Tshiluba 2 Kulondolola 21 Bible Online

2 Kulondolola 21 - Tshiluba bible

2 Kulondolola 21

¹Yosafate mumane kufua, kumujikabu mu lukita lua bena diku diabu mu Tshimenga tshia Davide. Muanende wa balume Yorame, kumupingana mu bukalenga.

²Yorame uvua ne bana babu ba balume ba bungi. Bonsu aba bavua anu bana ba mukalenga Yosafate. Mena abu adi nenku: Azariya, Yekiyele, Zekarya, Azariyaku, Mikayele ne Shefatya.

³Tatuabu Yosafate uvua mubapeshe bintu bia bungi bia tshiamu tshitoke tshia mushinga mukole, bia mpawungi, ne bintu bikuabu bia mushinga mukole. Uvua muteke bana bende abu bua bikale balombodi ba bimenga bivuabu bakoleshe ne bimana bia amu ditunga dia bena Yuda. Kadi kusungulaye Yorame bua amupingane mu bukalenga, bualu Yorame uvua muanabute.

⁴Yorame kupingana tatuende mu bukalenga, kushindika bukalenga buende. Kushipeshaye bana babu bonsu. Kushipeshaye kabidi ne balombodi bakuabu ba mu bukalenga.

⁵Yorame kubuela mu bukalenga muikale ne bidimu makumi asatu ne bibidi. Kushalaye mu bukalenga bidimu muanda mukulu mu Yerushalayime.

⁶Uvua wenza malu mabi anu bu muvuabu benza kudi bakalenga ba bena Izrayele, nangananga kudi bena diku dia Akabe. Bualu Yorame uvua musele muana wa Akabe.[122] Nanku, Yorame uvua muenze malu adi Maweja-Nangila mubenge.

⁷Kadi Maweja-Nangila kavua musue kubutula nzubu wa Davide to. Bualu uvua mutue ndondu ne Davide, mumulaye ne: ndelanganyi yebe neyishale kashidi mu Yerushalayime.[123]

⁸Mu matuku avua Yorame mu bukalenga, ke muvua bena Edome batombokela bena Yuda,[124] badisunguile mukalenga.

⁹Yorame kuya ne balombodi bende ba bena mvita ne matempu ende a mvita onsu. Bena Edome bavua babela munkathi. Kadi munda nkulu mua butuku, mukalenga Yorame ne balombodi ba matempu a mvita, kusambukabu milongu ya bena mvita ba bena Edome, kunyema.

¹⁰Biangatshile musangu awu, bena Edome kushala badikadile, kabayi ku bumfumu bua bena Yuda kabidi to. Tshikondu atshi, bena tshimenga tshia Libna[125] kutombokela kabidi bukalenga bua Yorame, kushalabu badikadile. Bualu Yorame uvua mubenge kuitaba Maweja-Nangila Mvidi Mukulu wa bankambua bende.

¹¹Yorame uvua muenze mene miaba ya kutendelela mvidie ya bisamba bikuabu pa mikuna ya Yuda. Nanku Yorame uvua mufikishe bena Yerushalayime ne bena Yuda ku dibenga Mvidi Mukulu mulelela.

¹²Dituku dikuabu, Yorame kupeta mukanda ufumina kudi muambi Eliya. Uvua mufunde ne: “Maweja-Nangila Mvidi Mukulu wa nkambua webe Davide, udi wamba ne: kuena mulonde tshilejilu tshia tatuebe Yosafate, nansha tshia kakuebe Asa, mukalenga wa bena Yuda.

¹³Kadi udi mulonde tshilejilu tshia bakalenga ba bena Izrayele. Udi mufikishe bena Yerushalayime ne bena Yuda, ku ditendelela mvidie ya tshianana, bu muvuabu benza kudi bena diku dia Akabe. Udi mushipe kabidi bana benu ba balume bavua bakupite ku malu mimpe.

¹⁴Nanku Maweja-Nangila neatumine bantu bebe, bana bebe ba balume, bakaji bebe, ne bionsu biudi nabi, tshipupu.

¹⁵Wewe neupete masama mashilangane. Disama dikuabu dia mashi nedikunemenene ku dituku dionsu too ne muikala mala ebe apatuka munda.”

¹⁶Maweja-Nangila kusaka bena Peleshete ne bena Arabe bavua mutumba ne bena Kushe bua kuluisha Yorame.

¹⁷Bantu abu, kuluisha ditunga dia bena Yuda, kubuelamu. Kukuatabu bintu bionsu bivua mu nzubu wa bukalenga. Kukuatabu bana ne bakaji ba mukalenga ku bupika. Yorame kushala anu ne Akaziya, muanende wa mukala.

¹⁸Malu onsu aa mamane kuenzeka, Maweja-Nangila kutumina Yorame disama dikole dia mu mala, didi kadiyi dijika.

¹⁹Disama divua dienda dinemenena. Bidimu bibidi bimane kupita, mala ende kupatuka panshi bua disama adi. Yorame kufua munkatshi mua dikenga dinene. Kadi bantu bende kabavua batemesha kapia bua kumunemeka, bu muvuabu benzele bankambua bende to.[126]

²⁰Yorame uvua mubuele mu bukalenga muikale ne bidimu makumi asatu ne bibidi. Uvua mushale mukalenga bidimu muanda mukulu mu Yerushalayime. Yeye mumane kufua, muntu nansha umue kavua munyingalale bua lufu luende to. Bavua bamujike mu Tshimenga tshia Davide. Kadi kabavua bamujike mu nkita idibu bajika bakalenga to.