Read Tshiluba 2 Kulondolola 24 Bible Online

2 Kulondolola 24 - Tshiluba bible

2 Kulondolola 24

¹Yowashe ne bidimu muanda mutekete, kubuela mu bukalenga mu Yerushalayime. Kushalaye mu bukalenga bidimu makumi anayi. Mamuende wa Yowashe uvua Sibiya wa mu tshimenga tshia Bersheba.[135]

²Yowashe uvua wenza malu adi Mvidi Mukulu musue, matuku onsu avua mutuangaji Yoyada ne muoyi.

³Yoyada kuselesha Yowashe bakaji babidi. Yowashe kulela nabu bana ba balume ne ba bakaji.

⁴Matuku mamane kupita, Yowashe kuela meji a kulongolola nzubu wa Mvidi Mukulu.

⁵Kusangishaye batuangaji ne bena Levi, ubambila ne: — Nuye mu bimenga bionsu bia bena Yuda, nusangishe makuta kudi bena Izrayele bonsu, bua numone mua kulongolola nzubu wa Mvidi Mukulu wenu ku tshidimu ku tshidimu. Nuye lukasa, kanujingakanyi to. Kadi bena Levi kabavua benze mudimu ewu lukasa to.

⁶Nanku mukalenga Yowashe kubikila Yoyada, mutuangaji munene, kumukonka ne: — Moshe, muntu wa Maweja-Nangila, pamue ne bena Izrayele bonsu, bavua bajadike mudibu mua kufila bitadi bua muaba wa tshijila, udibu bateke mushete wa ndondu. Kadi kuena mulombe kudi bena Levi, bua balambuishe bena mu Yerushalayime ne bena Yuda bitadi abi[136] bua tshinyi?

⁷Bualu, badi ku luseke lua Atalya, muena buenzayi, bavua balekela nzubu unyanguka. Bavua bangate kabidi bintu bia tshijila bia mu nzubu wa Mvidi Mukulu, baye kutendelela nabi mvidie Baale.

⁸Mukalenga Yowashe kutuma diyi, bua benze mushete, bauteka pa mbelu, ku tshibuelelu tshia nzubu wa Mvidi Mukulu.

⁹Pashishe, kumanyishabu mu Yerushalayime ne mu bukalenga bonsu, bua muntu yonsu alambule Maweja-Nangila mulambu uvua Moshe, muntu wa Maweja-Nangila, mufundile bena Izrayele, pavuabu bapitshile mu tshipela.

¹⁰Bamfumu ne bena Yuda bonsu kufika ne disanka. Kuelabu makuta avuabu ne bua kufila mu mushete tente.

¹¹Pavua bena Levi babala makuta mu mushete mu dina dia mukalenga, bavua basangana makuta mapite bungi. Nanku, mufundi wamalu a mukalenga, ne muena mpala wa mutuangaji munene, kuangatabu makuta awu. Pashishe kupingajabu mushete pa muaba wawu. Nanku, dituku dionsu, kuenzabu anu mushindu umue. Kupetabu makuta a bungi.

¹²Mukalenga Yowashe ne mutuangaji Yoyada kufila makuta awu kudi balombodi ba bena mudimu wa nzubu. Kuangatabu bena mudimu, basongi ba mabue, ne bena mabaya, kabidi ne bantu badi bamanye bikole mudimu wa kufula biamu bifike ne bikunze, bua kulongololabu ne kulengejabu nzubu wa Mvidi Mukulu.

¹³Bu muvuabu bamanye mua kuenza mudimu awu, kulongololabu nzubu wa Mvidi Mukulu lukasa. Kushalaye mukole muimpe mutambe, anu muende mua kale.

¹⁴Midimu yonsu mimane kujika, balombodi ba bibaki ba nzubu kupingajila mukalenga Yowashe ne mutuangaji Yoyada makuta avua mashale. Makuta awu, kuenzejabu nawu bintu bishilangane bia kuteka mu nzubu wa Mvidi Mukulu: bintu bia kutendelela nabi, biamu bia kulambula nabi milambu, makopu ne ngesu bia tshiamu tshia mpawungi, ne bia tshiamu tshitoke tshia mushinga mukole. Matuku onsu avua mutuangaji Yoyada ne muoyi, bavua balambula milambu ya kuosha misangu yonsu mu nzubu wa Mvidi Mukulu.

¹⁵Mutuangaji Yoyada mumane kukulakaja bikole, kufuaye muikale ne bidimu lukama ne makumi asatu.

¹⁶Kumujikabu mu nkita ya bena diku dia bukalenga, mu Tshimenga tshia Davide. Bualu uvua muenzele bena Izrayele malu mimpe. Uvua munemeke kabidi Mvidi Mukulu ne nzubu wende.

¹⁷Mutuangaji Yoyada mumane kufua, bamfumu ba bena Yuda kufika kudi mukalenga Yowashe bua kumonangana nende. Mukalenga kuteleja majinga abu.

¹⁸Ke muvua bena Izrayele balekela nzubu wa Maweja-Nangila Mvidi Mukulu wa bankambua babu, bua kuya kukukuila makunji ne mpingu bivuabu benza bua kutendelela mvidie. Bua buenzayi abu, Mvidi Mukulu kufikila bena mu Yerushalayime ne bena Yuda munda.

¹⁹Pashishe, Mvidi Mukulu kubatumina bambi bua bababele, bua bapingane kudiye. Kadi, muntu nansha umue kavua muteleje bambi abu to.

²⁰Nanku, Mueyelu wa Mvidi Mukulu kutulukila mutuangaji Zekarya, muana wa Yoyada. Zekarya kujuka kulu kumpala kua bena Yuda, kubambila ne: — Telejayi Mvidi Mukulu, udi unukonka ne: “Nudi nubenga meyi ne mikenji bianyi bua tshinyi? Kanuakuikala bena diakalenga to! Nudi bambenge. Eyowa, meme kabidi nennubenge!”

²¹Bena Yuda kuelela mutuangaji Zekarya tshifufu tshibi. Mukalenga Yowashe kubabikila bua base Zekarya mabue mu lubanza mene lua nzubu wa Mvidi Mukulu.[137]

²²Mukalenga Yowashe kupua muoyi malu mimpe onsu avuabu bamuenzele kudi Yoyada, tatuende wa Zekarya. Kushipeshaye Zekarya. Bangabanga ne Zekarya kukula muoyi, kuelaye mbila ne: — Maweja-Nangila atangile bidi bienzeka, akunyoke!

²³Ku ntuadijilu wa tshidimu,[138] bena mvita ba bena Arame kufika bua kuluisha Yowashe. Kubuelabu ne mvita mu bukalenga bua bena Yuda ne mu tshimenga tshia Yerushalayime. Kushipabu bamfumu bonsu. Bintu bionsu bivuabu banyenga mu mvita, kubitumabu kudi mukalenga wabu mu Damase.

²⁴Bena mvita aba kabavua ba bungi to. Kadi Maweja-Nangila kuanyisha bua batshimune bena mvita ba bena Yuda bavua bapite bungi. Bualu bena Yuda bavua babenge Mvidi Mukulu wa bankambua babu. Ke mu wabu banyoke Yowashe nanku.

²⁵Pashishe, bena Arame kumuka, kushiya Yowashe mu dikenga dinene. Nanku, balombodi ba bena mvita ba Yowashe kumuelela tshifufu tshibi, bua kumusombuela bua lufu lua muana[139] wa mutuangaji Yoyada. Kumushipelabu mu bulalu buende. Kumujikabu mu Tshimenga tshia Davide. Kadi kabena bamujika mu nkita ya bena diku dia bukalenga to.

²⁶Bantu bavua belele Yowashe tshifufu tshibi bavua: Zabade, muana wa Shimeyate, mukaji wa bena Amone, ne Yozabade, muana wa Shimrite, mukaji wa bena Mowabe.

²⁷Mena a bana ba balume ba Yowashe, miaku mivule Kua bambi bakule bua kubela Yowashe, miaku idi itulondela mu wabu balongolole nzubu wa Mvidi Mukulu, bionsu ebi mbabifunde mu mukanda udibu binyika ne: Diumvuija dia mukanda wa Bakalenga[140]. Amashiya ke uvua mupingane tatuende Yowashe mu bukalenga.