Read Tshiluba 2 Kulondolola 25 Bible Online

2 Kulondolola 25 - Tshiluba bible

2 Kulondolola 25

¹Amashiya mumane kukumbaja bidimu makumi abidi ne bitanu, kubuelaye mu bukalenga mu Yerushalayime. Kushalaye mu bukalenga bidimu makumi abidi ne tshitema. Mamuende wa Amashiya uvua Yowadane wa mu Yerushalayime.

²Amashiya uvua wenza malu adi Maweja-Nangila musue, kadi kavua wenza malu aa ne disanka to.

³Amashiya mumane kushindika bumfumu buende, kushipeshaye balombodi ba bena mvita bavua bashipe tatuende Yowashe.[141]

⁴Kadi kavua mushipe bana ba bantu bavua bashipe tatuende abu to. Bualu Amashiya uvua unemeka bivuabu bafunde mu mukanda wa mikenji ya Moshe. Maweja-Nangila udi wambamu ne: “Kabena mua kushipa baledi bua bubi bua bana babu, nansha bana bua bubi bua baledi babu. Badi mua kushipa muntu amu bua bubi buende yeye.[142]”

⁵Amashiya kusangisha bantu ba mu bukalenga buende, bena Yuda ne bena Binyamine, kuteka balombodi ba bisumbu binene ne bikese, bilondeshile meku abu. Kubadikaye bungi bua bantu biangatshile ku bena bidimu makumi abidi too ne pa mutu. Kupetaye bantu binunu nkama isatu bavua bamanye mua kuluangana ne ngabu ne mafuma.

⁶Amashiya kuangata kabidi bena mvita ba bukitu ba bena Izrayele ku mudimu. Bena mvita abu bavua binunu lukama. Kubafilaye tshiamu tshitoke tshia mushinga mukole bu kilo binunu bisatu.

⁷Kadi muambi kampande kufika, umuambila ne: — Mukalenga, bena mvita ba bena Izrayele kabena mua kuya nebe to, bualu Maweja-Nangila kena ne bena bukalenga bua ku mutu to.

⁸Wewe muye nabu, nansha wewe muluangane mvita muebe muonsu,[143] Maweja-Nangila neakunyemeshe kumpala kua baluishi bebe. Bualu, anu Mvidi Mukulu nkayende ke udi mua kunuambuluisha bua nutshimune, nansha kuambuluisha badi mua kunutshimuna nuenu.

⁹Amashiya kukonka muambi ne: — Makuta amvua mupe bena mvita aa neaye penyi? Muambi kuandamuna ne: — Maweja-Nangila udi ne bukole bua kukupesha makuta makuabu mapite bungi.

¹⁰Amashiya kupingaja bena mvita, bavua bafume ku bukalenga bua ku mutu, kuabu. Bena mvita abu, kupingana kuabu ne tshiji tshikole, bafikile bena bukalenga bua Yuda munda.

¹¹Amashiya kukolesha muoyi, kupita kumpala kua mulongu wa bena mvita bende, kuya mu tshibandabanda tshia Luepu.[144] Kushipayemu bena mvita ba bena Edome binunu dikumi.

¹²Bena Yuda kukuata bena Edome bakuabu binunu dikumi, kuya nabu pa mutu pa lubuebue lule. Kubasakilabu mu lubuavu bua badishinde panshi, bafue bonsu.

¹³Nanku, bena mvita ba bena Izrayele bavua Amashiya mupingaje kuabu, mubapumbishe mua kuya nende mu mvita, kubuelabu mu bimenga bia bena Yuda, bivua pankatshi pa tshimenga tshia Samariya ne tshia Bete-Orone. Kushipabu bantu binunu bisatu ba mu bimenga ebi. Kukuatabu bintu bia bungi, kuya nabi.[145]

¹⁴Pavua Amashiya ufuma ku mvita, mumane kutshimuna bena Edome, uvua muambule mpingu ya mvidie ya bena Edome. Kushalayi mvidie yende. Uvua uyitendelela, uyilambula milambu ya manananshi.

¹⁵Maweja-Nangila kufikila Amashiya munda. Ke kutumaye muambi kampande bua kumukonka ne: — Udi utendelela mvidieivua kayiyi ne bukole bua kukunyenga bantu bayi bua tshinyi?

¹⁶Kadi, mukalenga Amashiya kukabula muambi ku diyi, umukonka ne: — Ndi mukuteke mufidi wa ngenyi mu bukalenga anyi? Puwa, tshianana nebakuenzele bibi. Muambi kuanji kupuwa. Pashishe kuambaye ne: — Ndi mumanye ne: Mvidi Mukulu mmumane kujadika bua kukushipesha, bualu uvua muenze bibi, mubenge mua kuteleja diyi dianyi.

¹⁷Amashiya, mukalenga wa bena Yuda, uvua ulonda meji makuabu. Kutumaye bantu kudi Yowashe, mukalenga wa bena Izrayele, muana wa Yowakase, muikulu wa Yeku, bua kumuambila ne: “Fika kunu! Tuluangane nebe!”

¹⁸Yowashe kuandamuna Amashiya ne: “Dituku dikuabu, mutshi wa meba uvua pa mukuna wa Lebanone. Kulombawu mutshi wa sedre ne: Anyisha bua muananyi wa balume asele muanebe. Kadi nyama wa tshisuku, kudiatakaja mutshi wa meba awu.[146]

¹⁹Udi udisua bualu uvua mutshimune bena Edome! Eyowa, udi usanka uditambisha. Kadi somba amu ku nzubu kuebe! Kuena mumanye ne: mvita iudi ujinga ayi, neyikukebele anu makenga anyi? Bualu nebakutshimune wewe ne bena mvita bonsu ba bena Yuda.”

²⁰Kadi, Amashiya kavua muitabe bionsu bivua Yowashe mumuambile abi to. Bualu Mvidi Mukulu uvua musue kubutula Amashiya, ne bena mvita bende, bua pavuabu banemeka mvidie ya bena Edome.

²¹Ke Yowashe, mukalenga wa bena Izrayele, kuya mu mvita. Bena mvita bende kuluangana ne bena mvita ba Amashiya mu ditunga dia bena Yuda, mu tshimenga tshia Bete-Shemeshe.

²²Bena mvita ba bena Izrayele kutshimuna bena mvita ba bena Yuda. Nanku bena mvita ba bena Yuda bonsu kunyema, kupingana kuabu.

²³Yowashe, mukalenga wa bena Izrayele, kukuata Amashiya, mukalenga wa bena Yuda, ku Bete-Shemeshe. Amashiya, muana wa Yowashe, uvua muikulu wa Akaziya. Yowashe kumuka ku Bete-Shemeshe, kuyaye ne Amashiya mu Yerushalayime. Kupulaye bimana bia tshimenga atshi metre bu nkama ibidi, biangatshile ku tshiibi tshia Efrayime too ne ku tshiibi tshia Ditumba.[147]

²⁴Yowashe kuangata tshiamu tshia mpawungi, tshiamu tshitoke tshia mushinga mukole, ne bintu bia mushinga bionsu, bivua mu nzubu wa Mvidi Mukulu, bivua Obede-Edome mulame. Kuangataye kabidi bintu bivua mu nzubu wa bukalenga, muaba uvuabu bateke bintu bia mushinga mukole. Pashishe, Yowashe kukuata kabidi ne bantu lukole, kupingana nabu mu tshimenga tshia Samariya.

²⁵Yowashe, mukalenga wa bena Izrayele mumane kufua, Amashiya, mukalenga wa bena Yuda, kushala kabidi ne muoyi bidimu dikumi ne bitanu.

²⁶Malu onsu makuabu a ku ntuadijilu ne a ku ndekelu a mukalenga Amashiya, mbaafunde mu mukanda wa bakalenga ba bena Yuda ne ba bena Izrayele.[148]

²⁷Tshikondu tshivua Amashiya mutuadije kubenga Maweja-Nangila, bantu ba mu Yerushalayime kuelelabu Amashiya tshifufu tshibi. Dituku dikuabu, Amashiya kunyema, kuya mu musoku wa Lakishe.[149] Kadi, kumulondakajabu mu musoku awu, kumushipelamu.

²⁸Pashishe, kutekabu tshitalu tshiende mu ditempu dia mvita, kupingana natshi mu Yerushalayime. Ditempu adi, bavua badikoka kudi nyama ya tubalu. Kujikabu Amashiya mu nkita ya bena diku diabu.